Rime diverse in lingua genovese/Per quella frecchia Amò che ti tirassi

Da Wikivivàgna
Sata a-a navegassion Sata a-a serchia
Rime diverse in lingua genovese de Viçenço Dartonna
Per quella frecchia Amò che ti tirassi
da-e Rime diverse in lingua genovese, Bartoli, Pavia, 1588
cangiòu e u in v e viçeversa; clicca i asterischi pe l'errata corrige
[p. 109 modifica]
V, D,


Per quella frecchia Amò che ti tirassi
Per contentà to Moere, a Marte in sen,
Ra quà fo caxon può che ti mandassi
Ro meschin de to Poere a cornigien;*
Ro peto che l'atrè ti m'inchiagassi
Con ra tò frecchia d'oro, a fin de ben
Sanna te prego, e con l'atra inchiongià
Pertuxame ro cuo con ra corà.

2.
E se pù questo Amò fà ti no vuo
Quando giusto ti sei come me crao
Con ra mesma veretta, a quello cuo
Chi è contra mi de freidda giazza armao,
Tira te prego e fa che come muo
Mille votte esto amante appassonao
Per le ro giorno, cosi* muere ancon
Quella per mi chi è dro me mà caxon.

[p. 110 modifica]


3.
Perche ra leze vuo se no m'inganno
Che quando un zove ven da ti ferio
E che pe rà so donna, o sente affanno
Che quasi s'o no caga, e l'espedio
No dighe l'ingratonna l'è so danno
Gran caxo, badamenti, e me ne rio
Como me dixe a mi quella cagnume
Quando à me ve cangià vita, e costume.

4.
Ma se patisse ro meschin dorò
Che o no se posse asperme reze in pè
Como segue a chi caze in questo errò
(Perdoname Segnò) si tristo e rè
Che quella chi ro priva dra megio*
Parte che ro tapin se trove in lè
Aceixa restè* da si cado fogo
Ch'a no posse trovà posso, ni logo.

5.
Che me crao certo Amo,* che se ti vissi
Zò che per quella bissa atossegà
Fazo, e de l'atra banda ti sentissi
L'amara vita che a me fa gustà,
E no voggio za di che ti morissi
Ti mesmo de dorò che ti è inmortà
Ma sò ben che si giano ti verressi
Che mezo morto in vista ti parressi.

[p. 111 modifica]


6.
Donna priva d'Amo* senza pietè
Chiù freidda che ra neive Zenarinna,
Inimiga dre cose innamorè
Asse* chiu che dra vorpe ra gallinna
No sala che o conven dre so pecche*
Che presto a rende quinto ra meschinna
Perche me pa ch'aggiemo Pasqua in cà
Tanto presto rò tempo se ne và.