Poesie drò Signò Giurian Rossi/Viaggio de Venetia con Dame/Canto primmo
| ←Personaggi | Ro viaggio de Venexa de Canto primmo |
Canto segondo→ |
| da-o manoscrito Ricci 177 do Comun de Zena, www.storiapatriagenova.it clicca in sci asterischi pe de verscioin alternative da-i atri ms. da collession Ricci |
1
Le Donne, i Cavaglier, l'arme, e l'amori,
L'horribil casi, giubili, e Rizate,
Refrigeri de coè, feste, e resciori,
Soenni, Vigilie, brindesi, e panzate,
Gondole, Galleazze,* e Bucentori,
Papette, Buscolai, viste beate,
Moneghe, Campanin, Lavoi de Giexa,
Eccove ro viaggio de Venexa.
2
Fior di Spina, Rosalba, Angerinetta,
Patronne son dra bella Compagnia,
Re Camerere son Cattarinetta,
E rà mè cosa cara Anna Maria,
E ri Patroin, che portan ra Bachetta,
Olindo, Emilio, Ergasto, e Poro Andria,
Poè frà tent'atri, un serto de poch'ere,
Nicheroso Rostio quondan sò Poere.
3
L'anno sinquanta e sinque in ra saxon,
Che portan re serexe prè assazzo,
Quando cantan rà sorfa, e ra canzon
Ri Rossignoè da Basto pe ro ciazzo,
Un giorno, che n'haveijmo in concruxion,
Pre divera intr'un scioù, sette de mazzo
Disse unna voxe, ovia che ressorvemo.
Demmo nuì andà? Ogn'un responde, andemo.
4
Così tutt'in fretton chi fà fangotti
Chi dà ro sugo, chi sbatte ra pura
Chi stira borse, ch'impe valixotti
E chi ra lama, e chi ra Guenna scura
Chi mette a loego argenti, amore, e Gotti,
Chi dra Borza, e buccolica hà rà cura,
Chi serca in un, chi fruga in l'atro loego,
Và in broddo de faxioè finna ro Coego.
5
Chi trà foera reverteghe, e scosè
Chi accomoda ra chiave a ra cascetta
E chi fà dase un bon pà de stivè
Chi de pelle sottì, chi de vacchetta,
Partendo infin da Zena invexendè
Cantando ogn'un da coè ra Girometta
Van verso Campi, e Nicheroso in tanto
Con ra chittarra i aspieta lì sciun canto.
6
Onde, che li stimandoro un Orfeo,
S'innaxillan rè mure draà Carrozza
E perche lì, gh'era dell'egua à rieo
Vatt'à piggia re Dame intr'unna fozza
Ad te clamavi in toto corde meo
Comenzavan a dì con voxe grossa
Ma con Camalli, e con diversi agiutti,
Sciuti, e* bagnè andamo in sarvo tutti.
7
Così lì a Campi tutti in pavarinna
Raxionando, e cantando per trastullo,
Trovamo pronta a Cha' de Fior de Spinna
Unna de quelle senne de Lucullo
E all'honò drò viegio con ra* panza pinna
E ciorla, e viva, e impi ro baullo
Brindisi à quello, che à ro son dro Gallo
Doman sarà rò primo da Cavallo.
8
Van poescia in letto, e à penna à ra mattin
Ro Trombetta dro giorno se resente,
Che fuzando rè stelle à legioin,
Se leva un sò a Levante, e doì a Ponente,
Rosarba, e Fior de Spinna, en quelle infin,
Che dan luxe, e fan annimo à rà Gente,
Così in un batti d'oeggio tutt'in riga,
Chi se troeva à Cavallo, e chi in Lettiga.
9
E à Nicheroso lì per sò aventura,
In ra confusion dro piggia para,
O ghe toccà unna pertega de Mura,
Che per montaghe sciù gh'osse unna scara,
Ghe n'era lì unna longa per ventura,
Se misse Nicheroso à rebellara,
Poescia o l'arremba, e monta, ò quest'è bella
A ri seze scarin o s'atrovò in sella.
10
Cattarinetta fra tant'animè
A n'haveiva* un chi haveiva* mangioù rostie,
Ro qua schiuppando de ventositè,
O n'osse fà schiuppà tutti de rie,
Anna Maria con chiu comoditè
Con Nicheroso cavarcava lie
Sciu un Muretto piccin de mieza canna
Ch'a fà un miggio ro di l'era rà manna.
11
Sussesse* a Don Giovanni li dapoè
L'orrendo caxo dro compà Menghin,
Che andava rò sò Aze à sercà foè
Si o gh'era sempre adosso à cavallin
Così ro veivi sì da bon figgioè
In bestia come i atri per camin
Ch'o sercava ra spà tutt'astizzoù
Si a ghe fava din din lì da rò lou.
12
Così trottando lì de compagnia,
Gorghezando ciascun rà sò canzon,
Scontrammo Don Martin lì pè rà via,
Con doi bigotti à coa de scorpion;
Chere* venir con nos vossignoria?
Ghe disse all'hora Olindo; à stà raxion,
Respose Don Martin, si señor,
Porque soy d'estas Damas servidor.
13
E con questo compagno li de chiù,
Andammo a sentì Messa à rà Chiappetta
Da ro Preve Farcon, poè de lasciù
Se misse all'orde ogn'un ra Pistolletta,
Dapoescia, alliegro ogn'un montando sciù,
Buttando mille baxi à rà bocchetta,
Trovammo un groppo d'osse foè de lie,
Ch'intro montà pattiva ciu che mie.
14
E mentre Anna Maria si stangoscià,
Batteiva rà sò Bestia da descosto,
Andammo in somma à Ottaggio à reposà,
De mescià ben ro mento ogn'un desposto,
Ne dè Ambroexio Scorza un bon disnà
Con dri Pesci depenti, e quagie à rosto,
Si ben che ro disnà de quello giorno
Ro parì Nicheroso de rettorno.
15
E così stanchi lì da ro travaggio
Se repossammo fin à e dixinoeve,
Poè nò contente d'esse stete à Ottaggio,
Mostran gusto re Dame d'andà à Noeve,
Coscì eccave un sgroexoro, un dramaggio
Piggia chì, chiappa là, ogn'un se moeve,
Avanti infin che foisse noette scura
Arrivammo à rà vista drà chianura.
16
Onde vegnine incontra li se veiva
Con diversi Cavalli accompagnoù
Un Canonico Maino chi parreiva
L'Abbate de Cocagna lì spuoù*
E lì chi saruava, e riveriva,*
Chi dixe ben vegnuo, chi ben trovoù,
E viva Emilio, Ergasto, e a ro so honò
Viva ra cortesia dro Bonsignò.
17
Così lì à Noeve d'intre l'imbrunì
Eccate incontra ro scio Carl'Andria,*
Ro qua per esse rubbi trenta, e doì
Non possando montà de compagnia
De no sò quanti dì prima, che noì,
O s'era con trè Bestie misso in via,
Ch'unna sotta de liè ghe perse un'anca,
E doe, se no schiuppan, poco ghe manca.
18
In ro scontrase in somma re cazasse
No se poè crè ri giubili, ri rixi
Parè che ogn'un a Carl'Andria* intonasse
Ben viegne ro Carzoè dri nostri amixi
Puoè à chà dro Preve ro bon prò ve fasse
Intre felicitè dri Campi Elixi
Senamo, e in fin de Tora ghe scuggian
Dixioetto formaggette de Cassian.
19
Poè fassendo* ro sato dro Pootron[sic]
Andan tutti a dormì fin à ra mattin*
Quando a ra fin ro sposo* de Titon
Tirà foè dro* barcon ro Lanternin
Così eccote un sgroexon*, un fretton
Ogn'un monta in carrozza a* fà camin
Va insemme Anna Maria, Angerinetta
E Nicheroso à piè a* Cattarinetta.
20
Per stradda à Don Martin ch'era à Cavallo
Ghe parse vei unna quagia sciù ra chianna
E liè da buon Caccioù, senz'intervallo
O te gh'allivelà ra sarbatanna*
Ma boettà* ro meschin ra balla in fallo
Perche no gh'era quagia, ni faxanna
Si che restando Don Martin lì mocco
Fù* trasmigroù ra quagia in un orocco.
21
E intanto re carrozze allegramente
Passavan re confinne dro Zeneize
Eccate un Trombettiè, Cavalli, e Gente
Che ne mandava incontra ro Marcheize
Veggando comparì lì tanta Gente
Con insolite arme* da ra poira preize
Restan re Dame, e poè senza fandonie
Sparà tutta ra poira in seremonie.
22
Poè caminando pe ra stradda bonna
A poco, a poco con soavitudine*
Andamo à veì re Moneghe à Tortonna
E lì disnammo a son de dositudine
Onde unna serta Hostessa forfantonna
Con Nicheroso usando ingratitudine
Se o n'era lesto in ro cangià dri scui
A ghe vorrè impetà* sciu bolle d'agui.
23
Lasciando infin re Moneghe, e l'Hostezza
Tutte re Dame, et ogni Cavagiero
S'andan a piggià unna vista dra Fortezza
E dapoescia allondon, tocca cocchiero*
Così lì con ra solita allegrezza
Alonghimo ro passo con pensiero
D'andasene a Voghera ancon de dì
E così giusto à pointo a ne riuscì.
24
E li trovando infin, che in l'Hostaria
Non gh'era gueri stantia* pe re Dame,
Fra tutti ri atri Olindo, e Por'Andria
Comenzan sciù sta cosa a fà l'exame,
E ghe foì dito, che lì a mieza via
Unna Viegia, non sò come a se chiame,
Gh'havè unna caza lì apparà de feto,
Pre un Personaggio chi se n'era andeto.
25
Mentre sciù questa cosa se rezeiva,
Se ne va Nicheroso in quello pointo
Da sta Signora Viegia, chi pareiva
Ra Madonnava lì de* Carlo quinto
E a trapella che a o collo a l'haveiva*
Che a sè quella Revertega me quinto
Che in tempo dro Cangin l'amia Bazoffia
Portava à Zena feta a moeo de Troffia.
26
Te ghe fè Nicheroso un'ambascià
Treta lantora d'intro scattorin
Onde che lie stimandose honorà
Ghe manda in somma a dì che son Patroin
Così andando lì subito a senà
Restà a dormì re Dame, e ri minchioin
Restan de foera, idest all'hostaria
Ergasto, Nicheroso, e Poro Andria.
27
E stanchi ancora lò da ro travaggio
Se n'andan tutti in letto pre conforto
S'adormì chiatto Ergasto com'un Baggio
Che ro lume lì ancon non era amorto
Eccate Poro Andria, chi boetta un sbraggio
Criando, ò Nostra Donna, che son morto
In questo Nicheroso boetta un crio
Digando, ò meschin mi, che son ferio
28
Eccate à meza Camera un Colosso
Che* pareiva Tesifone ra furia
Un lume in man, meza Camixa in dosso
Cercando un'arma gianca d'uria e buria
Questo era Poro Andria, che à ciu no posso
Invexendoù criava tutt'in furia
L'è chì mille Diavi a tormentame
Vegnui in forma de simixe à scanname.
29
Mentre che quello per i Canti o fruga
Sempre diggando Giexo con ro coè,
E mentre s'intaffura, e intanabuga*
Spaventoù Nicheroso intri lenzoè,
Ghe pà sentise adosso unna Tratuga
Chi te ghe tire unna morscià da coè,
Liè stà sciusa, et acciappa un battorezo,
Stramendori lì così a ra pezo.*
30
Ma infin ra guerra piezora, e l'inciampo
Ghe ven da mille simixe da parte
E un lietto chi de Venere foì Campo
D'esta maniera ven Campo de Marte
Pà Nicheroso lì ro tron, e ro Lampo
D'ogni corpo unna simixa o te sparte
E fra tant'atri, o Simixon horrendo
Che a terra ond'o regnà mordè morendo.*
31
Morto ro Capo, in quella parte, e in questa
Va ro sanguigno essercito scapando
E contra i ostinè chi favan testa
Adoevera Nicheroso ro fiero brando
Biaoù chi ha ciù a fuzì ra gamba lesta
Mentre lì o so sangue vendicando
De tante ciaghe de chi moè, e chi langue
Trà Nicheroso ro so proprio sangue.
32
Frusto, e non satio de fà tanta guerra,
Di polver, di sudor, di sangue asperso*
In sciù so moere, idest, sciù ra terra
Nicheroso s'accorega à reverso,
Ma à penna meschinasso l'oeggio o serra,
Ro Gallo arve ra bocca*, e tira un verso,
Quasi dicat, ò là scior Nicheroso
Serbisi a miglior uso il suo riposo.*
33
Ogn'un se leva, e feti ri fangotti
Ciascun monte* à so loego, e andemo via
Poè pre camin no se poè crè ri Gotti
Che arrobà un'homo à ri Hosti pe ra via
Alliegri à son de frottore, e strambotti
Arrivamo à ra vista de Pavia
In l'hora che dro Sò ra Lampa ardente
Stà fra o Levante o so Sentro e l'Occidente.*
34
Così con re Carrozze intrando dentro*
Dro gran ponte coverto tutt'in riga,
Pareiva d'esse lì senza bestento,
Senz'uscì de carozza dentr'in* Lettiga,
E osservà dro Texin ro puro argento
Mentr'i Cavalli batteivan l'esperto auriga*
Buttando un'oeggio in quell'egua chi brilla,
Cattarinetta vi mescià un'anghilla.
35
Dando mancia a ra Porta andamo in fin
A chà d'un miè Patron dra Croxe gianca
E li dalli, chioven* Quagie, e Cappoin
Ra pansa pinna, e ra ganascia stanca
Con ra zucca assupà d'ottimo vin
Andammo tutti à reposà un pò l'anca
E li sciampraddi,* in quiete, e senz'affanno
Chi no dormì trè hore sè so danno.
36
Passoù l'hora dra cagna in canti, e rixi
Se fesse un pò de Carlevà ro viegio
Poè pre no trascurà ri soè servixi
Li de modo tenendi fen collegio
Perche se ben che l'homo è in casa* d'amixi
Ro mirase à ri piè stà sempre miegio
Perche sovente avien col buon consiglio
Che l'huom ripari il mal con il periglio.*
37
Un de lò incomenzà parlando all'hora
Va l'Axia tutta, e va l'Europa in guerra
Se scontremo quarch'un semo in mall'hora
Però mi no approevo andà per terra
Se ben per egua o gh'è perigo ancora
Perche m'è steto dito in questa Terra
Che un tà struzzo con furbi in compagnia
Scorran intro Pò* con ra Cavallaria.
38
Taxè ciò dito, e tutti de seguiro
In ro so parei, e ad ascotaro intenti*
Se ben per questo struzzo, se don diro,
Un se giasciava un non sò che intri denti.
Approvaou ro parei per essequiro
D'andà per egua infin tutti contenti,
Comenzan homi, e Donne à invexendase,
Ch'ogn'un desiderava d'imbarcase.
39
Accordamo li subito unna Barca
Pe ri Patroin, e un'atra pe ro Coego
E li come Noè ro Patriarca
Ro Teologo nostro tutto foego
Metteiva per provedene intre l'arca
Volatili,* e quadrupedi a sò loego
Si ho quintoù dì che in serte barche raze
Me parse fin de vei ro Porco, e l'Aze.
40
Mentre a vei ra Cittè de Dame andan
Per fà partenza a l'un deman mattin
Mille atre cose in tanto s'accattan
Tora, Arneixi, Carreghe, e Strapointin
Sà, Oerio, Legne, Carne, Pesci, e Pan
Frute, herbe, oeve, salami, e Piaxentin
Con mille atri regalli, fin dre niegie
Fra i atre, un vin da fà firà re viegie.
41
Da vei re belle cose dra Cittè
Vegnin re cose care de rettorno
Da diversi cavagieri cortezè
Che all'amiè ri moscoin stan sempre attorno
A miez'hora de noette lì arrivè
In quell'allogiamento se fè giorno
Pareiva che dixesse ra candeira
All'arrivo dro Sò non gh'è chiù seira.
42
In tanto ri Patroin stavan digando
A Don Martino: venga la comida
E lié s'invexendava, repricando
A che viene sennor, mi Rey, m'invida
Senamo Don Martin lisentiando
E Don Martin ra Cara nostra guida
Da quanto ei pote, prende, e tu nol vedi
Cattarinetta, gli ultimi congedi.
43
Senè che foimo, ogn'un s'accoregà
Poè se levamo in tro schiattà dro dì
Ra compagnia dro Marcheize andà
Si foin ben regalè da non sò chi
Poescia ogn'un con ra Neive s'imbarcà
Dando mancia a ciascun, che apointo mi
N'ho visto cosa sciù de là chi svoera*
Presto d'in man come re Parpaggioera.
44
A prepoesito chi bezoegna rie
Nicheroso dre Doppie descangiava
Tutti imbarchè si l'aspetavan lie
Ma meschinasso liè no ro stimava
E mentre favan tutti frenesie
Stando attenti a vei se o sparegava
Liè stava con re soè solite ballottore
Là in miezo à ra Brigà vendendo frottore.
45
Ma mentre ra so cara Anna Maria
Gh'amatava d'in Barca da un pertuso
Montà sciù Nicheroso, e andando via
S'attroeva intr'unna meizera confuso
Sente de gratia un pò Vossignoria
Ciattò è ro ricco edificio, e intro chiu chiuso*
Doe stantie ben fasciè comme se dè
E un Barcon, come in l'Arca de Noè.
46
Questo serve per Porta a ro Patron,
Quando li sciù ra Poppa o monta a vezo
Per tegnì a ra senestra ro Timon
Chi pà de Colletton ro battoriezo
De sà, e de là ra primma stantia ancon
Sotta ro teito ha doì pertuxi à miezo
L'atra stantia de Proa feta è de paggia
E unna stoera ghe serve pre muraggia.
47
Doì Marinè stan sciù ra proa in piè
Senza scarpe vogando lì all'Ingreize
E sì s'accorda ogn'un tirando à liè
Comme fan ri Ferrè chi dro Paeize
Ma gh'haveimo un Patron che a parei miè
No gh[']è de miegio in tutto ro Paveize*
Alliegro, homo da ben, corteize serto*
Ro qua se nominava Patron Berto.
48
Cantando L'è un'herbetta d'intre l'horto
Tutto Moere mi moero se non l'ho
Arrivamo onde Febo poco accorto
Amortà ra gran Lampa d'intro Pò
Cattarinetta cara mi son morto
Mantiegnime Barascio in gratia tò
Fetonte odì che in Pò cadde, e mor'io
Intendami chi può che m'intend'io.
49
Foera re burle, in fin, burle burlando
Sorcando dro Texin ra rubiconda*
Zemmo in Pò, non ro Struzzo lì trovando
Ma Filomena sciù ra verde sponda
Che pareiva a dixesse gorgnezzando*
Seguite pur, o gente vagabonda
V'arrida il Ciel, ne guerra apportin l'armi
All'opre vostre ,a vostri dolci carmi.
50
O Zoventura, mentre un bello mazzo
Dra vostra fresca ettè manten ro verde
Govei de prime frute pù l'assazzo
Chi ha tempo, e tempo aspieta, tempo perde
E poè ro tempo chi ro boetta in frazzo
Cose chì o ve despenza, là o desperde
Cattarinetta cara, miè Amò, ma quando
Esse ti porrè riamà amando.*
51
In fin dirà quanch'un, che con destrixe
Sempre sciù Cattarinetta se trascorre
E cosa cara là in principio o dixe
Quando d'Anna Maria l'Autò descorre
Aura pà, che ra Musa se desdixe
Mentre onde doè ro cuoè, ra lengua corre
Seì, che l'è, ro negaro è tempo perso
Disse così per agiustà ro verso.
52
Ro Poere Apollo in tanto intro meriggio*
Bruxava pe ro Pò deto a Palin
Ch'o se stimava havei trovoù so figgio
Ingannaoù da doì Soì ch'eran vexin
Fra tanto Por'Andria lì da bon figgio
Disse, Signori, sto foego Landrin
Chi bruxa in l'egua, estingue non ro poemo
Se con ro Vin zeroù non l'amortemo.
53
Tutti inteizan ro zerbo, e invexendè
Ro Coego, ro Trinciante, e o Credenzè*
Destendan quella poca caritè
Poè, chi assettoù, e chi mangia d'in piè*
L'amigo dixe, brindesi a chi ha sè
Ma prima quattro votte o chiorla liè
Noi nettezammo miegio infin ri piatti
Che in tempo de Capitolo ri Fratti.
54
Gh'era fra i atri un tà chi havè desvitto
E desguernì sei Piatti in men d'un ame
E con quello dietto sì politto
No mondavan zà nespore re Dame
Dixan l'egua sarà mette appettitto
E mi diggo, Ra dose, mette fame
Poè, chi canta, chi dorme,* chi fa ben
Così ra Barca va, ra noette ven.
55
Cantando infin ro verso dro Petrarca
Passa la Nave mia colma d'oblio
No scuggia, no[,] precipita ra Barca
Andemo in zù con un piaxei de Dio
A quello Luoego in somma arriva l'Arca
Che in nome, e in feti, è dro piaxei ro nio
Piaxenza amata, et honorata tanto
Quel che seguì dirò nell'altro canto.