Piaggio M. - Poesie 1846/Prefazioîn e Reviste da Çittæ/Revista1843
| ←Prefazion, Anno 1843 | Prefazioîn e Reviste da Çittæ de Revista, Anno 1843 |
Arçi-Riçetta per fâ e Cabale→ |
| (ediçion Pagan - 1846) |
*
Ghe son Servo, Sciô Compâ...
Finalmente l’ho trovôu...
Oh che incontro fortûnôu!
Ve riveiscio, addio Comâ...
D’in Fortezza sciâ è scappôu?
No scignora, son sciortïo...
V’ho zà visto, e riverïo
D’in sciù Ponte Levadô...
E mi ho fæto o mæ doveì,
Co-a bandëta o salûteì...
Scià l’è ûn bravo Disertô,
Che l’ho visto in compagnia
De Personn-e d’allegria....
Son Amixi, Cattainin,
Sccietti e senza adûlazion,
De Mi e do mæ Chittarrin,
Che han vosciûo che fasse ancon
Qualche Parto Reginian...
Bravi! bravi!... han fæto ben;
E mi ascì, se ghe sovven,
Ghe l'ho dito, Sciô Reginn-a,
Che sciâ andiâ da-o Sciô Pagan...
Scì, seì stæta ûn’indovinn-a,
E, zacchè ghe metto man,
Se o Segnô, per so bontæ
Me da vitta e sanitæ,
E se no me secca a Venn-a,
Ancon sætte ne slampiö
Per compî a Terza Duzenn-a.
Bravo!... e mi l’accompagniö,
Ben inteiso se campiö:
Con costanza e fedeltæ
Ne-e Reviste da çittæ...
Che, scibben che son Donnetta,
Son Zeneize sccietta e netta
E ho mi ascì, zûarisoræo!
Comme Usciâ o mæ Patrio Amô,
E me piaxe parlâ cæo...
Brava! brava!... ve fæ onô
De vegnî in to mæ caruggio
Per sûnnâ campann-e a duggio,
Caminando a tûtti i venti
Onde vedde terminæ
I stûppendi Abbellimenti
Co-i Travaggi començæ,
Che rendiän ciù bella e amena
A Sûperba e Ricca Zena,
Ch’a brilliä per ogni verso
Fra e Pattæe de l’Universo.
Coscì spero, Sciô Compâ....
Assettemose ûn momento,
Che stanchetta ûn pö me sento,
Poi andiemo a passeggiâ....
Scì Scignora, comme voeì:
Comme ve a passæ, Comâ?
De maveggia... N’ho piaxeì.
E vosciâ?... Sciben che sciûscio
In ta Fede de Battæximo,
Son ciù forte che de bûscio...
Sempre allegro. Sempre o mæximo...
Seì poi stæta sempre ben?
Dio loudôu sempre benisscimo[sic]...
Vostro Majo?... Benissciscimo;
Sempre ciù grasso o me ven...
O mangiä o pan pe-o so verso.
O s’inzegna... E li o Carlin?
O l’è tosto un Ommettin....
Ciù ûnn-a stissa o me ven guerso!
E in che moddo, Cattainin?...
Meschinetto... o l’ha vosciûo
Sparä ûn furgao chi scciûppò,
In t’ûn êuggio o ghe piccò,
Inscio e neìgro o gh’è vegnûo!...
O l’[è] stæto ûn meize a-o scûo
Imbindôu, tûtto ligôu,
E ben ben abbacciûccôu!...
Voî, percose ghe l’ei dæto?...
Per no fâlo cianze... Brava!
O smaniava, o s’addentava...
Ma che bella cosa eì fæto!
Che caitæ!... se o l’inguersiva,
Tûtta a colpa a Voî vegniva...
O l’è ûn træsto, ma l’è cäo...
E coscì voî voeì guastäo?...
O l’è solo, Sciô Reginn-a,
E bezêugna contentäo...
Cattainin... ve ne pentieì,
O ve dä di dispiaxeì...
Miæ un pö là... comm'o caminn-a!...
Oh meschin!... poveo Carlin!...
In t’ûn sascio o l'ha piccôu...
Oh che patta o l’ha piggiôu!...
No stâ a cianze... pestûmmin,
Vegni chi,.. piggia ûn baxin...
Zitto zitto... mæ carzêu,
Che te dö cose ti vêu...
Brûtto sascio, mascarson!...
Dagghe presto due pessæ...
Bravo!... picca, e pesta ancon...
Vegnî matta, Cattainetta?
No veddeì che gh’insegnæ
L’odio, l'astio, co-a vendetta...
Dæghe in cangio due maschæ,
Che o l’è cheito o biricchin
Per scurrî quello cagnin...
Piggia chi torna ûn baxetto,
E con questo pattonetto
Arregordite, Cillan,
De no dâ ciù breìga ai chen,
Perchè dunque t'addentiän...
Brava! brava!... ei fæto ben...
Pattonetto ben schissôu...
Di so avvisi ho profittôu...
Comâ caa, m’edifichæ:
Coscì fesse tûtte e Moæ.
Per no stâ chi sempre in stradda,
Passeggiando adaxettin...
Damme man... fito, Carlin,
Che ti è proprio con l’aggiadda!...
Demmo ûn pö de Repassadda
Ao Quaranteduî passôu,
Che o l’è stæto ùn Annettin
Ben co-i fiocchi e disgraziôu
E pe-o Ricco e pe-o Meschin.
Quante cose m’han contôu
De disgrazie succedûe...
E de tante Brûxatûe...
Che m’han proprio invexendôu;
Sci!... di Incendj da per tûtto,
Grazie a Dio, da noi lonten,
Terremoti, Ægue, Oraghen,
Stragi, Orroî, Rovinn-e e Lûtto!...
Bastimenti naufraghæ,
Diligenze fracassæ,
Vapoî a l'Aja, ûrtæ, investj,
Passaggiê morti o ferj,
Brûxæ vivi Viaggiatoî
Pe-i scciûppæ Locomotoî;
Ostinæ Guëre fatali
Con Battaggie micidiali.
No s’è in Paxe, Sciô Reginn-a?...
E perchè dunque se dan?...
Parlo da Circassia e Chinn-a,
Lazzù a l’Afganistan.
Sciä me parle portoglian...
Ma vegnimmo ciù vixin:
Mai finie Rivoluzioîn,
Attentati, Tradimenti,
Anarchie, Fûxillazioin,
Distruzioin, Sacchezzamenti;
Di mjoîn d’Ommi affammæ,
Fabbricanti in combustion,
Giornalieri ammûtinæ,
Zûffe, Morti, Crûdeltæ,
E civile Agitazion.
Aççidenti - ciù frequenti
Omicidj — Suicidj,
Duelli a morte, Infanticidj
E Veleni i ciù potenti!...
E per compimento d’Opera
De quest’Anno Climaterico,
I Costûmmi depravæ,
Vacillante a Religion,
I Ministri strapassæ,
Guasta a Pûbblica Opinion
E trionfante l’Empietæ!...
Anno iniquo e mascarson!!
Basta, basta, Sciô Compâ,
Son Castighi vei do Çê...
Dî beniscimo Comâ,
E o dovemmo ringraziâ,
Perchè giandose inderrê,
In t’ûn mâ de Læte semmo,
Che de ninte mai manchemmo.
Semmo tanti Rè piccin;
Ma, con tûtti i so Taccuin,
Sciâ se gh'è scordôu l'Ecrisse,
Ghe sovven?... quella mattin
Ch’o l’ha fæto asconde o Sô
E vegnî nêutte... che orrô!
Paiva che o mondo finisse
E me son creddûa de muî!...
A l’è a Lûnn-a co-e fädette,
Che zûgando a scondillô
A se gh’è missa depuî
Per fâ ûn pö giappâ e Donnette...
Sciâ g’ha sempre e so bûrlette;
Ma fratanto o fè abbortî,
O spaventò o Sciô e a Scignoetta,
Che scappon co-a so fuffetta
Pezo che i Figgiêu piccin...
Discorimmo de Stagioin
Che l’è megio, Cattainetta
Ve sovven l'Inverno avûo
Coscì lungo e coscì crûo
Chi no voeîva ciù finî?...
È nevôu finn-a d’Arvî,
O che freido mascarson!...
Mancò e Legne cö Carbon,
L'ho dovûo pagâ per bacco!
Finn-a Çinque franchi o sacco!!
Con fâ impegni, stâ a aspëtâ
E per Zunta cazze in mâ!...
Gran Mortalitæ gh’è stæto;
Quanta Gente se n’è andæto
D’ogni Sesso, d’ogni Etæ,
Ricchi, Povei, Titolæ,
Tûtti senza distinzion
Cacciæ a mûggio in to Cadeon...
Quattro Pose, e bonn-a seja!...
Scomparì a bella Stagion,
No fè grazie a Primmaveja.
A deve êse immuronâ;
Son tant’anni ch’a no ven...
A l'aviä forse da fâ
Pè aggiûstâ o Conto ai Villen.
Da-o gran Freido s’è passæ
A ûnn-a lunga e cäda Stæ,
Abbondante de Maottie,
Minacciante Epidemie,
Che per sorte son scentæ.
Emmo avûo ûn Autûnno poi
Bon assæ pe-e Sûcche e i Cöi,
Perchè l’Ægua a n'è mancâ...
E a s’è ben antiçipâ
Ne-o Dilûvio Agostinian,
Che mai ciù Tanti scordian;
Ghe sovven, n’è, Sciô Reginn-a?
Bagatella!... un pö d’Æguetta!
Se a no fè vegni a Cag....
Vegnì a pelle de gallinn-a...
E azzunzeighe i sempre vivi
Lampi e Troin grati e giûlivi!...
Quelle Saette spartilosso
Che i aveivi sempre addosso!...
Ahimè!... sciâ me lascie stâ...
Ho creddûo de soffocâ,
Che son stæta co-e moen zunte
Ciù d’ûn’öa sotto e Strappunte
Mugugnando Avemarie...
Un Dilûvio da fâ rie,
Che se o fù assæ rovinoso,
O fù ascì ben capriççioso...
Chè da-i Fraveghi o l’è stæto
Pè accattâ i öi pe-a Spuzâ,
Svalixandoi, o se n’è andæto;
O l’intrò da-i Confettê
Per piggiâ e Nozze incasciæ,
Ma o mandôn fito inderrê
Con de Conche e Spassuiæ.
Andò drito a-o Ponte Reâ,
Perchè o voeiva fâ a bûrletta
Ne-e Bûtteghe, de negâ
O Figgiêu, o Vegio e a Donnetta;
Ma no poendoghe riuscî,
O s’andò a asconde in to Porto...
Comâ caa, cose vêu dî,
Che m’ammiæ con l’êuggio storto?
No son cöse da scherzâghe,
Ma da cianze e da sospiâghe
E da fâne penitenza,
Perchè o fè di guasti assæ!...
Cattainetta, aggiæ pazienza,
No ghe fù mortalitæ,
E coscì ne parlo riendo...
Però sempre riflettendo
Co-a ciù grande serietæ
Che de giorno o l’è vegnûo,
Che se o ven de nêutte a-o scûo,
Quanti Danni ciù o causava!
Quanta Gente che negava!
In pensâghe ven orrô...
Ringraziemone o Segnô
Che a l’è stæta Provvidenza,
E celeste vea Clemenza.
Eppù in mezo a tante puïe,
Cattainetta, gh’ea da rïe
In stâ a vedde passâ a Banchi
Cöi, Tomate, Corbe, Banchi,
De Garitte drite in pê,
Disertæ da-o Granatê,
Camminanti — ninnezzanti
Comme Fraule in Ritirata,
Che g’han fæto ûnn-a Cioccata...
Casse, Tondi, Tuffanïe,
Siassi, e Poële da Rostïe,
Ammoe, Fiaschi, Ratti vivi,
Chen e Gatti semivivi,
Di Pullæ con de Ex-Gallinn-e,
Scarpe vegie, Cappellinn-e,
De Perûcche gallezzanti,
E di Rissi naufraganti...
Belle cöse da fâ rïe!...
Mi me mettan giûsto erlïa...
Ma, framëzo a l'allegrïa,
Se passò a-e malinconïe:
Cresce l’Ægua a tûtt’andâ,
S’impe i Scagni e i Bûtteghin,
Nisciûn poeìva ciù passâ
Che co-i sgampi, dunque nêuâ,
O passando da-i balcoin...
Da per tûtto se deslogia,
Manca l’ûltima risorsa,
Intra l’Ægua sotto ä Logia,
E a l’inondâ tûtta a Borsa!...
Che invexendo, Cattainin!
Ahimè!... sciâ finisce presto,
Che me ven o coêu piccin...
No, stæ allegra, e attenta a-o resto:
« Salva, salva!...» ( sentî criâ
Tanta gente lì assustâ )
« Che se nega!... ognûn se a fà.
Scappa primma i Coraggiosi
E per ûltimi i Spuiosi,
Chi va in sà, chi va de là,
Con a meza gamba l’ægua
Senza arvî manco de pægua,
Scuando pezo che i barchî...
Chè a vegniva zù a derrûo,
Comâ caa, che brûtto lûo!...
Ahimè! Sciâ me fa languî...
Ancon questa stæ a sentî,
Chè a burrasca a l'è finîa:
Duî, per mettise a-o segûo,
E levâse tanta puja,
Sguasson l'ægua, e son scappæ
Cö preterito imperfetto
Assûppôu, e tûtti appullæ,
In te l'ûltimo ballôu
D’ûnn-a casa in Castelletto,
Che n’aveivan ciù de sciôu...
Per sætt’öe ghe son restæ
Pin de famme e d’anscietæ
Meschinetti!... e n’han mangiôu
Che do Pan e do Formaggio
Che in te stacche s’han trovôu,
E per Vin, leccon quell’Ægua
Che stissava zû da-o pægua...
Che feliçe e bello Viaggio!
Cose arriva a fâ o coraggio?...
Oh, scì scì, sciâ barselette;
Ma a bon conto, Sciô Reginn-a,
Sciâ aviä lætto in te Gazzette
Che ghe fû ûnn-a gran Rovinn-a
Là dä Maenn-a... O so, s’è inguôu
I Cuniggi, e l[']e montôu
L’Ægua quæxi ai Terzi Cien...
Ommi, Donne e Figgiêu ûrlavan
Meschinetti! comme chen,
Criando: «Aggiûtto!...» s’avanzavan
Da-e Terrasse e da-i Barcoin...
Sbraggi, Centi, Despeazioin;
Paiva o giorno do Giûdizio,
Da ogni parte ûn preçipizio,
Oh che orrô?... Per bonn-a sorte
Tûtt’assemme va là e Porte,
Sbocca l'ægua, e in te mez’öa
A vâ in mâ... ahimè! respion
S’abbrasson e se baxon,
Per n’aveì ciù a morte ä göa.
E quell’atro Coraggioso
Chi s’è tanto arrezzegôu
Per stappâ ûn pûrgo tappôu
E o restò in to fango appuso...
Ben che o so, me l'han contâ...
Se no Ta in tocchi a Ferrâ,
De segûo ghe lascia a Vitta!...
Atro che a Banchi a Garitta
Co-e Cioccate... O fû trovôu
Ben vixin, fra i mauxi, a ûn schêuggio,
Che ciù un pö o passa per êuggio,
E per miäcoo l’han salvôu...
Un gran voto o pêu portâ;
Ma do resto, Sciô Compâ,
Quanti Danni e che Rovinn-e
Fè quell’Ægua dilûviâ
A-i Betoanti, a-e Besagninn-e
A-i Artisti e Bûtteghæ!
Che restòn tûtti allaghæ!
Gh’andò via Frûta, Verdûa,
Êujo, Faænn-a, Pan e Vin,
Banche, Letti, Tavolin,
E restòn Tanti ä dritûa
In sce l’astrego, meschin!...
Ghe trovò a sò seportûa
E Gallinn-e tûtte a reo,
Solo ûn Gallo s’ëa salvôu,
Ma g’han presto o Collo tiôu,
Con cantâ quæxi o Teddeo,
Perchè non reste memoja
Da gran dolorosa Istoja
Do Dilûvio Agostinian.
E da-i Fraveghi Comâ,
A l’è proprio da contâ,
E non tûtti se a creddian...
Un Testardo chi ha vosciûo
In bûttega sempre stâ,
L’ægua ä vitta gh’è vegnûo,
Ch’o l’ëa quæxi per negâ...
Per salvalo g’han porzûo
Unn-a Scaa ch’o l’arrembò;
Ma in montâla a se stoccò
E o l’è cheìto a bagnomaja
In quell’ægua appätanâ
Chi corriva comme ûn mâ,
E (a parriä unn-a mincionaja)
O l’andò, fra mille evviva,
Nêuando salvo a l’atra riva...
Ben che o sò, me l’han contâ;
O pêu asci o Voto portâ.
E lasciù da-o Castellasso
Unn-a Sæta a l’ha piccôu
Con grandiscimo fracasso
In t’ûn Scito da stûffôu;
Gh’ëa di gren Foresti a Töa,
Capitæ là de bon’öa,
Che façeìvan colazion...
E piggion tûtti o laccion.
Reston sordi, alloæ, stordij
A ciù parte tramortij,
Tûtti andæti in strambaælon...
Brûxò a bocca a ûnn-a Françeise,
Strinnò o naso a ûn Milaneize;
E ûn’Ebrea desperûccò...
A padronn-a do Locale
(Cosa proprio originale)
Drita drita o te l’asbriò
Asfixiâ, co-e osse rotte
Sotto d’ûnn-a grossa Botte
Con a faccia in fêua, sorvinn-a,
E co-a bocca sotto ä spinn-a,
Che ghe scuava drento o Vin,
Ciù ûnn-a stissa a mêue negâ,
E per mauma l’han salvâ...
Miæ che scherzi, Cattainin!
Sci, da rïe e da rallegrâ
E rescioâse proprio o coêu!!...
Ma aoa andemmose a piggiâ
Presto presto ûn pö d’Urzâ,
Perchè ho sæ... Comme sciâ vêu.
Dove andemmo?... In Ciassa nêuva
Là, in te quello Bûtteghin,
Perchè Bonn-a a se ghe trêuva...
Andæ avanti cö Piccin...
Lì gh’è a Porta... intræ... montæ...
Spunciæ ûn pö... Din din — din din...
Zizzoa?... Eccola... Træ Urzæ —
Comme?... languide o in sciurbetto?...
Due giassæ, e piccola bibbita...
Ho mangiôu... chi pe-o Gardetto?...
E ghe e vaddo a sbatte sûbito...
Duî beschêutti do Lagasso
Freschi.... Cadi, yes!... Carlin,
Vegni che te piggie in brasso...
Ohiboibò!.... l’assuefæ mâ...
Assettælo in sciö scambello...
Isa... Bravo!... Bello... Boâ!...
Doman t’accattiö o scigoëlo...
Ma lasciæme ûn pö respiâ,
O Discorso seguitiemo
Da chi a ûn pö quando sciortiemo
E parliemo da Çittæ...
Ecco chi Lagasso e Urzæ.