Piaggio M. - Poesie 1846/Arçi-Riçetta per fâ e Cabale
| ←Revista, Anno 1843 | Poexie de Arçi-Riçetta per fâ e Cabale |
Indovinello façile→ |
| (ediçion Pagan - 1846) |
Segretto per fâ e Cabale
Trovôu in t’ûn Tontilio
Da Moæ da Ninfa Egeria
Ne-a grotta de Pompilio.
In primmo lêugo imbindite
Comme Cupido, e Recipe
Un Mortâ gianco d’Ebano,
Co-a Peixe ben nettezzalo,
Con l’æguaforte sciûghilo,
E con do Visco liscialo;
Recipe ûn gran fascicolo
De sciôette de Scixærboa,
Un fêuggio de Bettonica,
E un tomo d’Assafettida
Giascia ben tûtto, e pectilo;
Recipe ûn gran de Sûccao,
Mezo gottin d’Arsenico,
Læte de Vegia ûn scrupolo
Sangue de Stria quattr’amoe;
Recipe mezo dramma
De Figgiêu sciacchæ a mamma,
Denti de Cagna vidoa,
Nasi de Vorpe Vergine,
Sampe de Gallo celibe,
E Gatti verdi ad libitum.
Fanne do Scioppo in solidum
E beivitelo tûtto.
Recipe quantum sufficit
Çivette, Sbrazzoe, Alocchi,
Ratti penûghi a tocchi,
Axôu di sette laddri,
Caccàloe d’Aze a quaddri,
Træ pilloe d’Ancoa, ûn Spegio
Un Cudegugno vegio,
Quattro Stivæ da tromba,
Un Furgao, meza Bomba,
Un Ciaravalle nêuvo,
Brûtto de rosso d’êuvo
Un pessettin de Grotta,
Træ Macchinette elettriche,
Unn-a Pignatta rotta,
Un Circolo astronomico,
Unn-a Lanterna magica,
Un Canocciale elastico,
E ûn Compasson geometrico;
Mettite tûtto in spalla
E per mez’öa camalla.
Recipe ûn Bêu d’Avanna
Con bajonetta in nanna,
Da Calamitta in puvee,
Fêuggie de sciô de Ruvee,
Ortiga ben frettâ
Co-e moen pe ûnn-a giornâ,
Un Eûvo d’Elefante
E o Brasso d’ûn Gigante;
Metti sta roba insemme,
Tia zù de gren giastemme,
Misce, et remisce, menn-a
Con lunga côa de Vacca;
Lascighe o fî da schenn-a
Fin che no vegnan Triacca,
Et adde ûn bottiggion
D’Inguento de Scorpion.
Passa tûtto a-o siassetto
Fæto de peì de micco,
Menûo in t’ûn fornetto
A cêuxe[sic] ne-o lambicco,
Vestite in neigra cappa,
Piggia ûnn-a longa trappa,
Fà sætte säti riondi,
Rompi quattorze tondi,
E con ûn turtajêu
Tappite a bocca, e dille,
Fintanto che a distille,
Ciù presto che ti pêu
Per berlicche — per berlocche
Cicche-Ciacche, Cicche-Ciocche,
Mangia e fighe, lascia e brocche
Per berlicche - per berlocche !...
Tegnighe drento ûn dïo,
Quando a l’ha ben bugïo.
Mettila in t’ûn gran vaso,
Dagghe drento do naso;
Perdi magara a vista,
Brûxite a lengua, assazzala;
Frettighe drento a Lista,
Mettighe a nomme Cabala,
Eccote Cabalista.