Piaggio M. - Poesie 1846/Prefazioîn e Reviste da Çittæ/1841
| ←Prefazion, Anno 1840 | Prefazioîn e Reviste da Çittæ de Prefazion, Anno 1841 |
Prefazion, Anno 1842→ |
| (ediçion Pagan - 1846) |
*
O Quaranta, graziadio,
Eiveo là, zà cêutto[sic] e peôu!
Ben o mâ l’emmo passôu...
E n’è o mondo ancon finio,
Comme voeiva a Profezia
Destannä da di Antiquaj,
Non se sà in te che sganzia,
Spantegâ da-i Vixionaj
Ai figgéu per mette puia,
E per spaventâ e donnette...
Mà, a dëspeto[sic] de gazzette.
E di opuscoli stampæ
Da ciù d’ûn per fâ dinæ,
Dio lodôu, vivemmo ancon,
Voî ghe seì, e Mi ghe son...
E nisciûn hà coæ de moî;
Corteziscimi Lettoî
Do mæ patrio Almanachetto;
Anzi, vegno c’ûn biggetto
Recammôu, in pappê velin,
A streppâve o sûnaggin
Pe angûrave a Tûtti, e dâve
Bon Prinçipio e megio Fin
Do nêuv’anno Quarantûn,
Voî però, per no tediâve,
Mi per n’ësive importûn,
Fæme dî che no ghe sei,
Che per modda, e per doveì,
A chi m’arve o porzo sûbito,
E contento e scäe preçipito;
S'incontriemo poi per stradda,
E se dæmo l’abbrassadda,
Mugugnandose in ti denti
Quelli tali complimenti
« De proteste senza fin,
« Che se porta all’aja i venti
« O se perdan per camin!...
Ma, aoa chì parlemmo sccietto;
Femmo no pö de bilancietto,
C’ûn schissetto de ritræto
Do Bisestile preterito,
Ch’o s’è ben distinto in merito
Pe-e vicende che ghe stæto
E i fûnesti avvenimenti
(Grazie a Dio, da noî remoti)
Che han sconvolto i elementi...
Vulchen nêuvi, Terremoti,
Oraghen. Inondazioin,
Çittæ andæte sottotëra!
Sepellie Popolazioin!!
Pæsta, famme, incendj, guëra;
E per zunta, tradimenti
E politiche questio
Da fâ nasce di armamenti
E allarmâ tûtte e Nazioin;
Fondi pûbblici cadenti,
Speculanti in angonia,
Vendie, perdie, fallimenti;
O commercio in stagnazion,
Confidenza andæta via,
Morta a pûbblica opinion;
Un Trambûsto generale!
Onde ëa cosa natûrale,
Da-e burasche circondæ
Che se stesse in anscietæ
De doveìse ûn pö bagnâ...
Anzi, chi lezzeiva i fêuggi
Ghe veddeiva pin de schêuggi
Da no poeìli ciù schivâ...
Che angosciosa prospettiva
Tûtti i giorni a noi s’offriva!
Coscì ognûn pensava ao mâ;
Chi da guëra aveiva puia,
Chi do blocco e carestia,
Chi de bombe e canonæ!...
Possidenti e Negozianti
Ascondeivan zà i contanti,
Scarsezzava zà i dinæ
O Banchê serrava i conti,
Zà Commessi licenziæ,
Passaporti e baûli pronti,
Legni lesti e zà attacchæ
Per partî... ma dove andâ?...
Troppo brûtto gh’ëa in Oriente
Començava a fûlminâ;
Trunnezzava da Ponente,
Lampezzava a Tramontann-a,
Ne gh’ëa cæo dä Meridiann-a...
Sempre ciù e cose imbroggiæ
Diventava e complichæ
Da no poeìse desgruppâ...
Che crûdele agitazion!
E che trista scituazion!
Sempre ciù gh’ëa da sospiâ...
Basta, doppo tante puie,
Tante brûtte previxioin,
Terminò tûtte e rouxie
Con sparâ pochi canoin,
E se fè capî a raxon
Ao tremendo Saraceno
Gran Bascià do Bakalon.
Comparì l'Arco balleno,
Spuntò bello o Sô in Levante
Da ûn’Aurora indoâ e fioria,
Ecclissando a meza Lûnn-a
Rossa, aççeisa e minacciante
Chi n’aveiva de sciscia...
E per nostra gran fortûnn-a,
E a trippûdio ûniversale,
E Burasche se calmon,
E Potenze s’abbrasson,
Restò a Paxe generale.
Doppo tanta traversia,
Tanti batticoeu e sospij,
Se ne semmo ben sciortij
Solo c’ûn pittin de puia!...
Ringraziemone o Segnô,
Perchè dunque o l’ëa ûn orrô,
S’incendiava o mondo tûtto,
E doveivimo sentî,
E forse ëse spettattoî
De Rovinn-e, Stragi e Lûtto!!!
Stemmo dunque d’allegria
Perchè a crixi a l’è finia,
Se pêu fâ di affari assæ,
Travaggiâ in tranquillitæ,
Senza aveì nisciûnn-a puia
Ne de guære e de corsæ.
Mà, è ben fâ in questa occaxion
Unn-a giûsta riflescion:
Supponemmo o caxo dæto,
Che qualcûn ghe fusse stæto,
Che da guëra ben persuaso,
Imbeveôu, tentôu, spunciôu,
O l’avesse speculôu?...
O gh’aviæ dæto do naso!...
Per trovâse caregôu
De custose mercanzie
Senza poeile realizâ
Che con perde de mialie!
E infrûttuoso o so dinâ!...
Gran Lezion pe-i Speculanti,
Grande Avviso ai Commercianti,
De pensâghe primma ben,
De rissolve e d’impegnâse,
Che all’orbetto non conven
Caminâ, per ingolfâse;
E o Proverbio no scordâse:
Chi và cian, caminn-a san,
N’imbarcâte senza pan,
Vendi e penti; ma pascemmose
D’atre cose, e divaghemmose.
Aoa vêuggio ûn pö osservâ
Con sto lungo Cannocciale,
Che m’han dæto da provâ,
Chi fa vedde a-o natûrale
Tûtte e cose dä lontan,
L’hò da restituî doman:
Vêuggio ammiâ ne l’Anno nêuvo
Cose diàscoa ghe descrêuvo...
Stæ a sentî, che o piggio in man:
Ohimè!... o locciâ... o peiza... sûo...
No ghe veddo... o me fa scûo...
Aoa rosso... aoa turchìn...
Aoa giano... aoa moellin...
O pâ ûn prisma!... tira, molla,
Molla, tira... zitto! o ven...
O l’è a segno... veddo ben,
Meno o brasso chi me scrolla:
Quanti Tonni in ato mâ!...
Son scorrij da-i Pescispâ!...
Van incontro a-i Pescichen
Che stan là co-i denti affiæ
Per mangiâsei... son mangiæ!
E diventa rosso o mâ!!
Cose gh’è? sento sparâ...
Son træ Squaddra pavesæ
Là, che tian de canonæ,
Scialla!... salve d’allegria...
Tian con balla!... scappa via!
Quante Trûppe gh’è per bacco!
In te quella gran ciannûa
Accueghæ a fûmmâ a-o bivacco...
Mangian, trincan... che allegria!
Balla e Vivandee cö sacco!
Paxe, paxe... oh quanta pûa
Dä lontan!... Cavalleria
Chi galoppa a sciabla nûa
Pe affettâle!... scappa via!...
Quanti campi pin de gran,
E de biava, e de granon!
Abbondanza!... aviemo o pan
Bello grosso, e a prexo bon...
Quanta gente!... Granattin
Pe incettâlo... pan piccin!...
Oh quant’ûga!... figgi cai!..
Gh’è ciû rappi ancon che fêuggie,
L’è imposcibile o contâi...
Quanto vin se deve acchêuggie!...
Ne beviemo finalmente
Un pittin de sccietto e bon,
E a bon prexo... quanta gente!
Vinaçê, e tutti Osti son
Pe incettâlo!... vin tempeôu
Se o n’è têuscego, o sä axôu!!
Oh!... quant’Uive gh’è in Rivëa
Da ponente e da levante!...
No se n’è mai visto tante...
E quant’êujo, se no zëa,
Ne gh’è a camoa, devan fâ,
O veddiemo ûn pö chinâ...
Ma, gh’è troppo Speculanti,
E o veddiemo zëâ e camoâ
Ne-i so trêuggi, per moutâ
Tûtti i giorni!... andemmo avanti:
Cose ghælo[sic] lazzù in fondo?
Unn-a Fiera? oh quanto mondo!
Ommi, Donne, Bestie insemme,
Tende e Banchi senza fin,
Bettoe, Zêughi, Crij, Giastemme,
Bûsciolotti, Burattin,
Cavadenti, Saltimbanchi,
Gren Caccioeì con carubinn-e,
Canne doggie damaschinn-e?
Cose scuran?... di Cûgianchi!...
Botte a vêuo... lazzù se dan...
Svenimenti, convûlscioin!...
Quanti imbriæhi in carossin!...
Me pâ d’ëse a San Çeprian:
Cose fan tanti assettæ
Lazzù intorno a quella Tôa?...
Mangian? nò!... gh’è di dinæ...
Zêugan?... scì, gh’è ûnn-a Scignôa
Ellegante vispa e bella...
Zûghian dunque per demôa...
Corre i luiggi!... bagatella!...
Gh’è Madamma in frenexia
I cavelli a se streppella...
Gh’è ûn chi caccia e carte via,
L’atro e sguara... se rattella...
Stili all’aja!... se minaccian...
Ohimè mi!... se dan, s’ammassan!
Centi, sbraggi, imprecazioin!
Dinæ persi! despeazioin!
In che diäo de Lêugo son?
Gh’è de fêua questa Inscrizion:
In questa casa - ghe son due porte
Unn-a da speanza - l'atra da morte
De chì se gh’intra - de là se sciorte.
Lazzù gh’è di Zuvenotti
Che camallan di fangotti,
Van con passo straordinajo,
Fûti, giani, invexendæ...
Han bezêugno de dinæ!...
Dove van?... da ûn Ûzûrajo
Chi ghe i presta in sciû[sic] momento
Per caitæ, cö pegno in man,
Solo ao çinquantûn per çento!!...
Lazzù veddo ben lontan,
Tante belle raritæ...
Un Fattô de bonn-e annæ,
Un Villan ch’insegna a creanza,
Un Sûnnôu chi n’impe a pansa.
Un Dottô chi aggiûsta i Clienti,
Un Procûôu chi è senza denti,
Un Scrivan chi scrive ceo,[sic]
E ûn Senzâ chi dixe o veo;
Là gh’è ûn Mego chi è nemigo
De Riçætte; ûn Barbê amigo
De Sanguette; e ûn Farmacista,
Che in ti libbri o perde a vista;
Veddo ûn Poeta castigôu,
Un modesto Letterato,
Un Pedante senza sciato,
E ûn Stûdioso fortûnôu;
Veddo ûn Ommo ben majôu,
Unn-a Bella in fedeltæ,
Un Amante pin de flemma,
Un Avaro fâ caitæ,
Un Zûgôu chi no giastemma,
Duî Rivali che se baxan!
E due Donne insemme, taxan!!
Lazzù s’arve ûn Tribunale...
Mà, per bacco! in to ciù bello
Se me guasta o Canocciale...
Ve o lasciö pe indovinello,
Che son stanco; allegri, vale.