Piaggio M. - Poesie 1846/Prefazioîn e Reviste da Çittæ/1842
| ←Prefazion, Anno 1841 | Prefazioîn e Reviste da Çittæ de Prefazion, Anno 1842 |
Prefazion, Anno 1843→ |
| (ediçion Pagan - 1846) |
*
Finalmente, graziadio,
Quarantûn, ti hæ ûn pö finio!...
Ti n’hæ dæto da pensâ
Pe’ ûn pessetto, e ben da sûâ!...
Vanni, vanni per caitæ,
De to grazie n’emmo assæ,
E con ti portite via
O spavento e l’anscietæ,
Con quell’atra brûtta puia
Chi n’ha fæto buggî a pança!...
Lascia stâ con noî a speranza,
Che non voemmo perde ancon...
Anno fâso e mascarson!
Chè se no gh’è stæto guëra,
Semenôu ti hæ da per tûtto
Stragi, orroî, rovinn-e, e lûtto
E discordie in tûtta a Tëra!...
In congiûra i Elementi,
Tëremoti, Venti ardenti,
Pioggie d’Ægua rossa e Sasci,
Pesci, e Bestie co-i mustasci!...
Invrersæ tûtte e Stagioin,
Neivi estive, Inondazioin,
Oraghen, Tempeste, Fûlmini
E Gragnêua comme i briccocali!...
Annæ perse, Carestie,
Pesta, Incendj, Epidemie,
Bastimenti naufraghæ,
Vapoî all’aja, o sprofundæ!...
Fallimenti ogni pittin
Da per tûtto de Mjoin;
Bersaggiôu o Commerciante,
Ecclissôu o Speculante,
O Banchê in agitazion,
O Sensâ in malinconîa,
L’Indûstrioso in convulscion,
O Commesso in frenexîa,
E tranquillo mai Nisciûn!!...
Anno brûtto Quarantûn!
Con raxon preconizzôu
Per fatale e climaterico,
E ciù ûn pô vegnûo Chollerico!
Finalmente ti è pettôu!...
Vatt’asconde, per caitæ,
Nell’abisso di passæ,
Chè te gh’emmo zà mandôu.
Ma parlemmo d’allegria,
Chè a burasca a pâ finia...
E a l’è cosa natûrale
Che dopp’ûn gran Temporale
Lûxe o sô, se calma o vento,
Ne ciù tribula o Mainâ,
Ma cantando e con trincâ,
Intra in porto a salvamento;
Pe’ëse storico veridico,
E levâme tûtti i scrupoli,
Devo di che «o diao n’è mai
Coscì brûtto comme o fan,
E che in mezo a tanti guai
Do fatale Quarantûn
S’han guagnôu tûtti do pan
E inricchïo se gh’è ciù d’ûn;
Ch’emmo avûo da tûtte e bande
Provvenienze e arrivi in grande
D’ogni qualitæ de generi
Tanto indigeni, che ezotici,
Che n’ëa o Portofranco pin
E de fêua, e pe-i magazin,
E gh’ëa tanto movimento
Che se ghe passava a stento:
Caravana e Ligaballe
A frûstâse ë brasse, ë spalle:
Impieghæ e Spedizionê
A inciastrâ do gran pappê,
I Casciæ a tiâ martellæ
E inguersî co-i so çerciammi;
I Pezoeì sempre impregnæ
Pe’ appartoî di kilogrammi;
I Commessi in gran facende
Galloppando comme Chen;
Sempre in gïo Senzæ e Mezzen
Pe’ accattâ (in segretto) e vende.
Se veddeiva solo ozioso
L’Impotente e l’Accidioso,
E chi travaggiâ no voeiva!...
Dä Dogann-a no se poeiva
Ciù passâ, chè gh’ëa stivôu
Da per tûtto e bariccôu
De Cariaggi, Mû, Cavalli,
E barrunde de Camalli
Che han ciù giastemmôu, che sûôu.
Onde se pêu argomentâ
Che gh’ëa ben da travaggiâ,
E da questa antecedenza
Ven per giûsta conseguenza,
Che «se tûtti han travaggiôu,
Avian tûtti ascì guagnôu.
Unn-a prêuva assæ evidente
O l’è o lûsso, e l’ambizion
Che regnon generalmente,
E o gran sguasso specialmente
In ta bassa Condizion.
Me n’appello all’Accassêua,
Ae Funzioìn, ae passeggiâte,
E quell’atre carozzate,
Campagnâte e begûdäte,
Che no vêuan de borsa vêua,
Ma che exiggian gren dinæ
Guägni con façilitæ!...
Aoa, che ogni Bûttegâ
N’ha ciù Mete da osservâ,
Che a capriççio vende o pêu
Tûtta a röba da mangiâ
E montâla quando vêu,
Unn-a gran bella vignetta
O se fà ne-a bûtteghetta,
Son risorse da giornâ:
Se aoa ognûn pêu fâ o mestê
Che ghe piaxe, e esercità
L'arte che ciù gûsta a Lê,
Senza aveîla da imparâ...
Un minciôn ch’aggie de mutte,
O l'è bravo a fâle tûtte,
O diventa Professô.
E s’acquista fama e onô
Pe-i gren lûmmi da giornâ;
E aoa senza ciù stûdiâ,
Basta aveì dell’Impostûa,
Chi è ciammâ Dixinvoltûa,
Faccia franca, Ciarlaxïa,
Êuggi fin, pronta Boxia;
A chi capita se vende
Per milìa röba avariâ,
A Bûttega a fà facende,
A diventa presto avviâ
E s’intrêuggia di quattrin
Pë scoverte, e invenzioîn
E i progressi da giornâ....
Poi per tûtti gh’è a rissorsa,
Se ûn no sà ciù cose fâ,
O và intrûso Agente ä Borsa
E ghe trêuva lì o Compâ!...
Pacciûgando Operazioîn
A onta, e danno do passôu
Sensâ vëgio accreditôu!...
Ma con tante digressioîn,
Me scordavo de parlâ
Do ciù bello (se no fallo)
Do ciù comodo, e ciù megio
Che n’hà dæto l’anno vegio
Quæxi, quæxi de regallo...
Cioè quelli Omnibus belliscimi
E per tûtti comodiscimi,
Dove, con pochi çenteximi,
V’imbarchæ per carozzâ
Da Levante e da Ponente,
Sempre con da nêuva gente,
E sbarchæ quando ve pâ
Senza vixite nè sciâto:
Un gran bello ritrovato,
Che se a tanti o no ghe piaxe,
E o scontenta quello Tale....
Quando o gûsta in generale,
Ghe conven dâseghe paxe,
Perchè i Omnibus n’andian
Ciù inderrê, ma progredian,
Tanto ciù co-a proibizion
Dell’Imbriego e do Strasson,
E da gente spûzzolenta,
Perchè fan raggia e ghignon...
(N’adesciemmo can ch’addenta
E finimmo a Prefazion.)
Cose diö de l’anno nêuvo,
Aoa intrôu Quaranledui?...
Poco, o ninte posso dî,
Zacchè imbarrassôu me trêuvo
Per n’aveì ciù quello tale
Mæ famoso Canocciale
Chi scroviva l’avvegnî,
Che hò lasciôu - l’anno passôu
Cäi Lettoî - presso de Voî,
Nè me l’eì ciù ritornôu,
Ve o tegnieì, bon pro ve fasse...
Parliö dunque coscì a brasse
(Chi sà che no l’indovinn-e!)
E ogni Ben pronostichiö
In ti Campi, in te Carasse,
In ti Boschi, in te Collinn-e,
In ti Fiûmmi, all’Aja e in Mâ;
E per fâve ben sciallâ,
Di affaroni v’annunziö,
Guagni larghi, gren Dinæ,
Lunga Vitta, Sanitæ,
Paxe, Amô, Concordia, Union
E Majezzi a battaggion;
No ghe deve ciù restâ
Figge brûtte da majâ,
Nè veddiemo ciù ûn Fantin,
Manco mezo Cicisbeo!...
Regolæ vegniä e Stagioîn,
Freido Inverno senza zëo,
Primmaveja bella scioïa,
A Stæ cäda, e non bugïa,
C’ûn Autûnno delizioso:
No vediemo ciù ûn Vizioso,
Manco Povei, nè Strûppiæ,
Perchè saan tûtti allûghæ;
Regniä sempre ne-i Contratti
A Lindezza e a bonn-a Fede,
Paxe fin fra Chen e Gatti,
A Memoja dell’Erede,
Nell’Avaro a correntezza,
In chi serve a Fidatezza,
A pazienza ne-o Padron,
In chi vende a Discrezion;
Onestæ ne-o Trafficante,
Equitæ ne-o Giûdicante,
E con tûtto o resto apprêuvo
De gûstoso e consolante
Che veddieì nell’anno nêuvo
Da restâne edifichæ,
Che taxiö per brevitæ.
E con questo, Cai Lettoî
Di mæ patrj Lûnajetti,
E zeneixi struffuggietti,
Me congedo anchêu da Voî ..
Doppo avei per vintêuttanni
Sostegnûo ûnn-a Campagnata
Reginesca, senza inganni
Vêuggio fâ a mæ Ritirata,
Perchè ho militôu assæ;
E serrandome in fortezza,
Corteziscimi Lettoî,
Ve ringrazio da bontæ
E da vostra gentilezza
Che m’eì sempre dimostrôu
In gradî, gûstâ e applaudî
Co-i Reginn-a che ho stampôu
A Rivolûzion bernesca
Contro i Ommi, animalesca,
O mæ Ezopo, e Canzonette,
Ciaravalli, Caballette,
E Sciaradde, i Sûnettin,
Epigrammi, Aneddottin,
Viaggi all' Aja, in Tëra, in Mâ
E Reviste co-a Comâ,
Con tante atre mæ Poexïe
Scrite senza pretenscion
Per passâ a gnagnoa, e per rïe,
Senza poetica licenza,
Co-a dovûa circospezion,
Per n’offende l’Innocenza,
A morale e a Religion;
Se de votte hò scantinôu,
E son stæto ûn pö piccante,
Ve confesso o mæ peccôu,
Fù per ëse Criticante,
(Non per odio o per livô)
Ma per zelo e patrio amô)
Di travaggi da Çittæ
Imbastij e mai terminæ,
Per marcâ e cose da fâse
E i Abûsi da levâse,
Che ghe n’è ûn’infinitæ!...
Se de votte ho staffilôu
Çerte Prodûzioîn nojose,
Indecenti e leppegose,
Che in te moen m’è capitôu,
E spacciæ con impûdenza,
Ne son stæto ben lodôu
Per voeì perdine a semenza,
Se.... ma è tempo de finî,
Gentilissimi Lettoî,
Ve ringrazio eternamente
Con riconoscenza vëa,
E ho speranza nêuvamente
Che sä fæto bonn-a cëa
A quest’ûltimo de man
Rampolletto Reginian....
Che co-a solita bontæ
O vegniä letto e gradïo
E onorôu comme i so Fræ,
Sempre vivi, graziadio,
Ne-o Parnaso Portoglian,
Dove ben presto sciortian.
Chi ve lascio, e me retïo,
Senza tiâ ciù Cannonæ,
A quartê d’Inverno ... Addio!
Regordæve Martin-bæ
Chi v’aviä ne-o coêu presente;
Stæme sempre d’allegria,
Ve son servo riverente,
Pöso e armi.... Scignoria.