Lunaio Regiña 1835/Campagnata

Da Wikivivàgna
Lunaio zeneize compilao da-o sciô Regiña & C. pe l'anno 1835 de Martin Piaggio
Campagnata
Zena, Stampaja di Fræ Paghen, Ciaçça Nœuva n. 43 - exemprâ conservao inta Libraja Britannica


[p. 54 modifica]
CAMPAGNATA


Se no fusse pe abuzâ
Da bontæ de chi me sente,
Ghe vorrieivo raccontâ
Un-na mæ Gita recente
Che m’han fæto fâ de filo,
(E che hò fin vergêugna[sic] a dîlo)
A-o Pertuso in compagnia
De person-ne d’allegrìa,
Che m’han tanto invexendôu
Co-a so grande ciarlaxìa
Che in to sacco m’han cacciôu.

Ah mai ciù l'avesse fæta!
A se m’ëa dipinta bella,
Ma pe-a mæ maligna stella
Brutisciscima a l’è stæta!...

Tante cose l’è accadûo
Che me son fin-na creddûo
D’ëse stæto perlenguôu!

Ma aoa son mëzo avvisôu,
Mai ciù fasso Campagnate
Con de Guerse, Zembi e Ranghi
Che me paiva d’ëse ai Fanghi!

Se creddeivo ae donnettate,
No gh’andavo coscì fito
Perchè a Serva a me l’hà dito:
Sciâ no vadde! a sôn de tromba...
Stæ a sentî che vegno a bomba.

L’ëa composta sta partïa
De sett’ommi e çinque femine

[p. 55 modifica]

Tutta gente, excepto nemine,
De bon becco e gironïa;[1]

Faccie tutte per mi nêuve,
Frà e quæ avanti che me trêuve
Sä un pittin diffiçiletto,
No ghe vaddo ciù davveì!...
Ve ne fasso chi un schissetto
Stæ a sentî se e conosceì.

Primmezzava a Sciâ Leonöa
Vidua, ricca, brutta, möa,
Ciacciaron-na, e de bon coêu
Cortezzâ da-o Sciô Grighêu,
Gran zugôu d’oca e de damma,
Fac-totum de Madamma,
Promotô da Campagnata,
C’un-na gamba in ritirata,
Ch’o l'andava cö baston
In sà e là sempre in giandon;

Gh’ëa so Nessa Petronilla
A breviori dita Cilla,
Olim bella, zà d’etæ,
Tûtta pin-na de gnæ-gnæ;

Con so majo l’Avvocato,
Chi n’ha fæto mai de sciato,
Stæto sempre a studiâ a töa
I Digesti con Leonöa.

Non so ciù o nomme da terza,
Me sovven ch’a l’ëa ben bella,
Ma da un'êuggio meza guersa
E c’un pö de tarantella;

[p. 56 modifica]

A gh’aveiva per patito
Un Gobbetto bullo e drito
Co-i mostasci ä militare,
Che o parlava fito fito,
E ogni pö pe intercalare
O dixeiva to-pulito!

Un-na giara paiva a quarta
De ciù grosse, Donna Marta
De Cudogno, chì vegnûa
A piggiâ pe un-na freiddûa
Qualche bagno d’ægua sâ,
Spiritosa e inspiritâ,
Perchè a l’ëa meza poetessa;
Se a n’aveiva o goscio e a barba,
A sæ stæta un-na bellessa;

A gh’aveiva con lê o Barba
Ch’ëa vestïo mëzo da abbate,
Cudegugno de velûo
Giasciucôu, cô de tomate,
Co-e reverteghe de scûo,

Lungagnon, rosso buffûo,
Naso affiôu c’un purinetto,
E un voxin da muxichetto,
Che o parlava stralunando
Sempre i êuggi e cacchezzando;[2]

Un-na figgia a quinta a l’ëa
Porsemuin-na de Rivea,
Impromissa a so Cuxin
Negoziante de limôin,
Vegnûa a Zena pe accattâ
Tutte e bæce da Spozâ,

[p. 57 modifica]

Con ra so Amera e o Cugnâo
S’aspettava ascì o Spozâo.

A l'ëa brutta de figûa,
Un tappetto de statûa,
Ma a parlava, a dî a veitæ,
San Remasco ben assæ.

Due carosse s’ëa fissôu,
Cioè, per dî e cose ciù vee,
S’ëa fissôu due rebellee
De ciù belle, (e a bon mercôu!)
Da doveise a êutt’öe trovâ
In sciä Ciassa da Nunziâ.

Mi gh’andeì precisamente,
Ma nisciun se ghe trovò,
Questa cosa a m’angosciò;
Passeggiavo.... finalmente
Da træ parti un ne spuntò;

Quello avanti a un-na panêa,
Questo apprêuvo a un-na lettêa,
L’atro c’un fangotto in man
Che o l’ansciava comme un can;
Ecco a cosa comm’a l'ëa:

Per n’andâ coscì ä sprovvista,
Grighêu, ommetto de recatto!
O mandò un pö de provvista,

Per exempio un bello piatto
De bescêutto[sic] ben guarnìo,
Un rosbiffe, duì bonnetti,
Pin de triffoli e oxelletti,
Un nasello zà bugìo;
Un’enorme çimma pin-na,

[p. 58 modifica]

E un-na torta pasqualin-na,
C’unn-a cassarolla grossa
Con do gran tucco de rosto,
Che fù tutto misso a posto,
In sciâ scocca da carrossa,
E ligôu bello pulito
Da-o Scignor T-O-to-Pulito!

No vegniva, e l’ëa nêuv’ôe,
Mai nisciun-na de Scignôe,
Mugognava i Carossê,
E s’accabbanava o Çê,
Ne luxiva ciù de Sô,
Se vegnì de mal'umô!....

Tutt’assemme capitò
Quella möa cö parasô;

Don Grighêu cö saccanò
E un salamme per baston;

A Sciâ Cilla in convulscion,
Perchè in casa a se o scordò,
Ma a l’aveiva a banderetta;

A Poetessa in dominò
C’un assazzo de scuffietta;

E a Spozâ coscì piccin-na
C’un-na grande capellin-na
Chi a croviva tutta a reo,
Che a me paiva un funzo veo;

L’atra per crovî i diffetti
In gran vello con speggietti
Obblighæ a uzo tartaggia.

L’ëa zà tosto a ciassa pin-na

[p. 59 modifica]

De cujosi a stâne a miâ
Che metteivan proprio raggia;

Mi me paiva ëse ä berlin-na
E d'aveì o c.... de paggia
Che sentivo muscon-nâ....

Dove vâlo o Sciô Reginn-a
Con sto tempo?... o và a negâ!
Dove diàscoa son sciortìe
Tante faccie là proibìe!
O se và con lô a demoâ?
O mettiemo in to Lunajo!...

Miæ che bell’antifonajo!
Ah!... l’ho fæta troppo grossa!
Finalmente se partì,
Sei divisi per carrossa,
E resteì, ve diö con chì:

Co-a Poetessa, e co-a Spozâ
Mi in to mezo, dirimpetto
Barbottin, Guærsa e Zembetto
(Bello terno da zugâ!)
E notæ, ne-a Rebellëa
Dove a gran Provvista gh’ëa.

Se và a ciocchi de scurriâ;
N’eimo ancon da-i quattro Canti:
Ferma, ferma!... sento criâ,
Tanti garsonetti avanti
A carrossa fan fermâ;
Mi ghe sbraggio « Olà! birbanti!
Chi ælo chi ne fa piggiâ?...»

Se presenta da-o portello
Un Scignor senza capello,

[p. 60 modifica]

(Perso in stradda pe-a premûa)
Tutto pin de bratta e pûa
Domandandone affannôu,
Fêua de lê tutto sciattôu,
C’un-na tibba da fornâ
E un-na bocca da lavello....
E dov’æla a mæ Spozâ?
Pimpinetta?... son mi quello,
Sciâ se ferman!... l’ho trovâ!...

Sci scignore, o l’ëa o Spozôu
Togninetto, meschinetto,
Per espresso capitôu
A cavallo a un'azenetto
Pin de ciumme e de frexetti....

Presto a porta se gh’arvì,
Con do stento sciù o vegnì
(Per motivo di speggietti)
O tegniva o scemellan
A cavessa sempre in man,
Se a levâghea no me sbrigo,
O ghe fà montâ l’amigo...

E o l'ëa tanto invexendôu
Ch’o se m’ëa in scosu[sic] assettôu
Pertuzandome, o bibbin,
E cäsette co-i sperôin!

Primmo guagno che hò piggiôu,
Con restâ de ciù schissæ
Comme tanti pescisæ,
Ch’eimo sætte diventæ
E de posto mi cangiôu;

[p. 61 modifica]

Basta, andemmo; quando semmo
Per passâ e Porte da Pilla,
A-o Vettuin, testa de scemmo,
(Stæ a sentî ch’a l’è ben bella)
Che scûggiò d’in man a brilla,
O và adosso ä sentinella,
Che a ghe slicca un-na seppâ,
Che i Cavalli a fà inombrâ...

In t’un pilastrâ picchemmo,
Un-na relincâ piggemmo,
Che o creddûo che se desfemmo;

Scuggia zù a Sciâ Petronilla
Arëlâ comme un’anghilla;

Ven a l’atra a tarantælla,
Che ghe voeiva a camamilla;

A Spozâ se m’ëa attaccâ
Streita comme un-na pattella
Aa borsetta da perûcca,
Ch’a me l'hà tutta sbëlâ;

Mi piccheì un-na cornâ,
Che m’hò fæto un borlo ä nucca
E no poeivo ciù parlâ;

O Spozôu in pê sätôu
O sbraggiava: schêuggio! schêuggio!

Criava o Barba inspaximôu,
Stralunando ben de l’êuggio,
Cò-cò-cò... (o paiva un galletto)
Cosa c’è?... disse o gobbetto,
Chi no poeìva stâ in pê drito,
Ribaltemmo! to-pulito!

[p. 62 modifica]

Questa chi a l’è l’avertûa
Da mæ Campagnata in Rûa;
Stæ a sentî che ven o resto,
Taggiö curto per fâ presto,
Ma n’aggiæ tanta premûa.

Eimo tutti scilenziosi
E s’ammiavimo in ta cëa
(Cioè in to muro) penscierosi
Comme i condannæ in galea;

Ma fràtanto a Rebellëa
A l’andava ao so destin;
Quando semmo a San Martin,
A quell’aja, vegnì famme
(Meno a mì pe-a lun-na imbösa).
Lasciù dunque se fà pösa,
Presto l’Oste che se ciamme!...

Per fâ un pö de colasion
Ghe corrì tutto o baston
Gregoriano, cioè o Salamme,
E un-na cêutta[sic] de pan fresco.

Per piggiâ un pö de rinfresco
Se sciûgon ciù d’un fiaschetto
De superbo vin nostrâ,
Chi fè sûbito adesciâ
O Febëo estro ä Poetessa
Che a l'improvvisò un Sunetto
In elogio da Bruttessa,
Dall’Udienza assæ gradio.

Togninetto s’ëa addormio
Co-a so Venere ciccioando,

[p. 63 modifica]

Comme un mantexo runfando,
Con cacciâ qualche sospio....

O tombava ogni pittin
In sciu[sic] zembo do vexin,
Che o sbraggiava futo, e fito:
O me strêuppia! - to pulito!

Mi gh’aveivo o Lungagnon
Tutto addosso chi pippava
(Senz’aveìne a permiscion)
Do tabacco chi impestava;
Tutto o fumme o me cacciava
Sempre in ti êuggi, che inorbivo
E toscivo che m’arvivo.

E per zunta sto mincion
O me me mette pe astrazion
In ta stacca da marscin-na
A so pippa aççeisa e pin-na!...

Se l’odô mi no sentivo
De Strinôu de Sciô Regin-na,
Ciù un-na stissa bruxo vivo,
De ciù, senza a pansa pin-na!
Poeì pensâ cose g’hò dito!...

O Mustasci o s’affannava
D’ammortâme, o se bruxava
E dixeiva to-pulito!

O gran fumme o soffocava,
E un-na spussa gh’ëa da muî!
Questo è ninte, stæ a sentî:
(Ciù che posso in breviatûa).

Quando semmo verso Rûa,
O Vettuin per negligenza,

[p. 64 modifica]

O inorbïo dunque dä pûa,
O l’investe a Diligenza,
Chi ne porta zù in t’un fosso!...

A sentî, che scinfonìa!
Tutti lì dosso e bordosso,
Spaventæ, e morti dä puia!...
Mi sunnâvea no ve a posso.

Un-na cianze, l’atra a cria;
Ven a quella o goscio grosso.
E a quell’atra e convulscioin!...

Criava o Barba comme un scemmo
Cò-cò-cò... cà-cà... cazzemmo!
E parlando con licenza
O s’imbalsama i cäsoin...

Traspirava a quinta essenza;
Mi taxeivo pe-a decenza,
Ma m’ëo dæto zà per frito...

O Zembetto, ch’ëa restôu
Suffuccôu, ammalluccôu
Sotto e gambe do Spozôu,
O dixeiva fito fito:
O m’ammassa! to - pulito!
Che l’avieìvo scciaffezzôu.

Criava e Donne: aggiutto! aggiutto!
Per fortun-na in t’un momento
Sbuccò gente da per tutto,
Che adrisson, non senza stento,
A Carossa e chi gh’ëa drento.

Me son parso rinasciûo,
Ma resteì sempre ciù tristo
In pensando all’avvegnûo;

[p. 65 modifica]

Figgi cai, s’avesci visto
Quelli griffi longhi tiæ,
Giani, verdi, inspaximæ,
E sentïo tanti lamenti,
Gh’ëa da muî dall’anscietæ!

Questi son divertimenti?
Ghe n’è pochi comme i mæ!
Ma aspëttæ l’ultima riga.

Se va a passi tardi e lenti,
Cioè ciù adaxo che a formiga
Pè un Cavallo, ch’ëa scuggiôu,
Podragoso diventôu.

Viva sempre e Donne Marte!
(Quelle cioè che son Poetesse)
Se a n’ëa lê chi fesse carte,
E che allegra stâ a no fesse
Co-i so versci a Compagnia
(Che dä barba ghe sciortivan
In scie cose che seguivan)
Addio Venere! addio Marte!
A Cocagna a l’ëa finïa,
Ciù ao Pertuzo no s’andava,
Anzi a Zena se tornava,
Tanto ciù che verso o mâ
Se sentiva trunnezzâ.

Doppo tanto batti batti,
Caccio a testa fêua o portello,
Veddo sotto pin de gatti,
E sentivo un odô bello
De Ragò, de Fracassâ...
Ahimè! cai, sempre zazzûn,

[p. 66 modifica]

Me ven tanto da bägiâ,
Che l’affëro a tutti a ûn pe ûn,
E bägiemmo quanti semmo
Per mez’oa, che se sbocchemmo.

Se metteiva a baixinâ...
Ghe mancava giusto l’ægua
A vegnîme ascì a frusciâ,
(Frà mi diggo comme un scemmo)
Ch’eimo tutti senza pægua!

Tutt’assemme sento scûame[sic]
Zù pe-e spalle, e in to vortâme
Veddo a cappellin-na brutta
Da Spozâ, chi stissa tutta...
E quell’atre tutte pin-ne
D’ægua neigra!... Sciâ indovin-ne?

O l’ëa o tucco sciù versôu
In ta scocca, e zù filtrôu,
Chi n’ha tutti accomodôu
Ben pe-e feste!... e sciâ gh’azzunze?
Che (oh disgrazia!) fêua dell’unze,
Tutta quella gran provvista
De Grighêu a no s’è ciù vista;
Meno a Çimma pin-na, e o Rosto,
Che reston per mauma a posto,
I Bonetti, a Capponadda,
Torta, e Pescio andon pe-a stradda!

Restæ tutti a quello moddo
Assuppæ de tucco e broddo,
E condij comme i taggiaen,
Ve poeì ben immaginâ
Se no paivimo magnen!...

[p. 67 modifica]

Se mettemmo a nettezzâ
Con pazienza, e se sciûghemmo
L’un con l’atro ciù che poemmo
Per no fâse caregâ...

O malemmo o giastemmava
Comme un Turco, e i pê o pestava
Tanto forte, che o sfondò
Un-na toa chi mollezzava
E zù a picco o se n’andò...

Se a so gobba[3] a n’ö tratten,
E se no l’acciappo fito
Pe-i mustasci streito ben,
O l’è lesto! o va a Cocito!...

Pù segôu da quella töa,
Sempre lì co-a morte ä göa,
O dixeiva ancon ciù fito
To-pulito! to-pulito!
Che l’aviesci menissôu;

Miæ che bella Campagnata?
Son veamente fortunôu!
Ho piggiôu proprio a collata!

Ma no n’hò vosciûo de ciù;
C’un-na scuza chineì zù,
Che no voeivo passâ pe êuggio,
Me ne son andæto a pê,
Vagabondo a uzo Strassê
Navegando schêuggio a schêuggio,
Comme fà Patron Battin...

Ma respiemmo un momentin,
E piggemmose per bacco
Un-na preisa de tabacco,
Ve contiö da chi a un pittin.


[p. - modifica]


[p. 76 modifica]
SEGUITO DA CAMPAGNATA


Me ne son andæto a pê
(Comme ho dito in l’atro fêuggio)
Raccontâ chi no ve vêuggio
I mjôin de puntapê
Che piggiavo man per man;

Quante votte son scuggiôu
Pe-o terren tutto bagnôu,

Che all’odô do rosto un Can
O m’ha e stacche roziggiôu;

Che un-na Vacca in to passâ
A m’ha tiôu un-na cornâ,
E son cheito in t’un spinon,
Che me son tutto frixôu;

E che un Aze grande e grosso,
Ciù che mì, per attrazion,
O me voeìva vegnî adosso,
E o m’hà dæto un-na dentâ,
Che ne porto i segni ancon...

Manco vêuggio chì contâ
A gran puja che m’hò trovôu
Pe un vestïo da Pellegrin
C’un-na faccia da assascin,
Che caitæ o m’ha domandôu,
E gh’hò dæto quanto aveivo
Pe un steccon che ghe veddeivo,
Chi m’hà fæto un pö ghignon!...

Tutte cose vertadee,
Che a contâle no paan vee,

[p. 77 modifica]

E che a mÌ successe son,
Ma vegnimmo ä concluxion.

Stanco, frûsto, dizossôu,
Posso dî, per miacö, vivo
Finalmente poi gh’arrivo
A-o Pertuzo dexideôu!
(Chi me fesse serrâ o coêu.)

M’aspëttava o Sciô Grighêu.
Co-a so bella Compagnia
Anscietosi pe-o mæ arrivo....
Che me fen festa e allegria,
Criando: evviva! Scignoria!
Me rallegro!.. Sciâ è ancon vivo?...
Co-Cò-cò - Cà-cà - carissimo...

Grazie! grazie! rispondeivo;
Obbligato — obbligatissimo;
Ma ciù rëze no me poeivo.

In spalletta me piggion,
Me sguarron meza a marscin-na,
Comme in trionfo me porton
Drito drito ne-a Cuxin-na
Do Locale da Pappata,

M’imboccon un-na broddata
Tanto cada chi m’hà peôu,
Mà a m’hà un pö refucillôu.

O Padron de sto Locale
O l'ëa un atro originale
De Cabirda, senza denti,
Tutto pin de complimenti,
Che o parlava sempre lê,
C’un-na perrucchetta möa

[p. 78 modifica]

Co-i scciuppetti de pappê,
E.... un Filosofon ciantôu,

Giudicâlo poeì dä töa
Che o n’aveiva preparôu
In to mezo da cuxin-na
Co-a tovaggia ä Capuçin-na,
Tondi neigri scamuræ,
Con de fêuggie per toaggiêu,
Gotti verdi, fiaschi blêu,
E posate in legno uzæ!
De pennacche per cottelli,
Per careghe di scambelli
Per credenza un-na potron-na;
Ma!...o gh’aveiva a Cêuga[sic] bon-na,
Che a l’aveiva rimediôu
(Grazie ä so Filosofia)
Ae provviste andæte via
Con Cappôin, do gran Stuffôu
E un-na bella Lazagnata
Co-a spussetta, pe-a Brigata
Impaziente d’andâ a töa.

Rincresceiva ä Sciâ Leonöa
E ä Poetessa de disnâ
In campagna da un fugoâ!

Ghe ven coæ de fâ a mozion
(A giornâ essendo coverta)
De disnâ un pö all’aja averta
Per rescioâse o coêu e o pulmon.

Brave! tutti gh’applaudìn,
E se destinò o Giardin
Dä Cuxin-na un pö lontan,

[p. 79 modifica]

Dove gh’ëa per guardia un Can,
Chi no fava che bajâ,
E o me dava da pensâ.

Ommi e donne in procescion
Ogni cosa là porton,
Destendendola per tëra
In t’un campo de crescion
Ao Bivac comme in guëra.

Chi mangiava d’assettôu,
Chi d’in pê, chi d’in gatton;

Mi me gh’ëo mezo accuegôu
E m’andavo pittussando
Qualcossetta e recillando
D’osservâ in accampamento
Quello bello assortimento
De famosi Combattenti,
Armæ tutti de boin denti,
Devastando, annichilando
Quanto ghe cazzeiva sotto:

Oh che stragi se façeiva!
Scciuiva sangue da ogni gotto
Che coraggio o gh’infundeiva,
E da Eroi se combatteiva.

E Madamme no burlavan
Manco lô, che intrepidiscime
Se batteivan comme Amazzoni
E a vittoria contrastavan
Con belliscime diffeize...

Ma lascIemmo stâ e metafore,
E parlando in bon Zeneize;

[p. 80 modifica]

Se l’impivan, s’imbriægavan,
Se godivan, se cinciavan,
E.... veddeivo d’arescoso
Che o Spozôu vegniva gioso,
Ve o crediesci? do Filosofo;

Che Leonöa và in irascimini
Con Grighêu pe-a Muza decima,

Che o Dottô studiava o Bartolo
Co-a Bellezza tarantellica,

Che cö Baffi a Petronillica
A piggiava a so revincita,

E o Cò-cò - Cà-cà - Carissimo
Trastullavasi allegrissimo
Or con questa, ed or con quello...

Cose voeì? in to ciù bello
Ven un lampo chi inorbisce,
Un-na saetta[4] chi insordisce,
E se mette tutt’assemme,
Non a ciêuve, a diluviâ,
Che bezêugna dizertâ
E lasciâghe o ciù chi premme....

Scappa! scappa!... chi è o ciù lesto
E o ciù bravo; e per fâ presto,
Tiavan zu mille giastemme!

Chi và storto, chi và drito;
Mi son cheito per fâ fito
Nell’alzâme, e m’è schittôu
A perrucca in to stuffôu!
Ghe ghe l’hò dovûa lasciâ...

Me tegnivo e moen in testa,
Per no poeìmela fasciâ,

[p. 81 modifica]

Vaddo, scappo, e per ciù pæsta
Me bajava o Can apprêuvo...

M’invexendo, e ciù no trêuvo
O cammin pe andâ in cuxin-na,
E m’infïo in t’un-na cantin-na;

O spruin d’ægua m’inorbiva,
Monto addosso a un chi dormiva,
Che o s’adescia ancon imbriægo,
Dà de man fito a un baston,
E me vêu mandâ a Legnægo!...

Me vegnì incontro o Patron,
Che a brassetto o me piggiò
E all’orbetto o me portò
Pe un-na scaa de legno brutta,
(Che ciù un pö me a piggio tutta)
Appullôu, desperuccôu,
Dove gh’ëa tutta a Brigata,
Chi me fesse un-na cioccata
Per no veddime negôu;

Se sciugavan tutti a-o fêugo,
Ma per mi no gh’ëa ciù lêugo
De sciugâme; poeì capî
Scûavo[sic] pezo che un Barchî
E ve baste, che dov’ëa
(No ve conto de fandonie)
Ghe formeì un-na peschëa...

O Patron complimentoso
M’ammassava da-e çeimonie,
E o me dè tutto festoso,
Per cangiâme un pö a marscin-na,
(D’ægua, maccie e sguari pin-na)

[p. 82 modifica]

Un-na specie de röbon
Giano, fæto ä biscochin-na,
Che me paivo un gran limon:

O m’hà poi coverto a succa
Co-a so mæxima perûcca,
Ch’o m’ha proprio arrecuveôu,
Perchè m’ëo zà magagnôu
E no favo che stranûa[sic]....

Mentre o stavo a ringraziâ,
Acciappandolo pe-a man,
Veddo a gambe capitâ
Quello maledetto Can,
Chi se cianta fisso a miâme,
A anastâme, e a... rinfrescâme!

E accorzendose o fillon
Che hò a perûcca do Patron
(Stæ a sentî ch’a l’è grania)
In to collo o se m’asbrïa
Per levâmela, o m’addenta,
Oeggie e naso me scarpenta;

Comme un’Aquila sbraggiavo:
Dæghe, dæghe a questo diavo,
Ma l'aveivo sempre addosso;

Me diffendo ciù che posso,
Streppa, agguanta, molla, tia...
Per fortun-na a se sguarò,
A meitæ o se ne piggiò,
Che bajando o portò via,
L’atra in testa a me restò.

Frà i scrullôin, frà e botte, a puia,
E e vicende da mattin,

[p. 83 modifica]

N’ëo ciù in caxo de parlâ,
No me poeivo ciù mesciâ
E cazzeivo a tocchettin.

Coscì bello e regagïo
Me porton presto in lettin,
Dove (dixan) che hò dormio
Finn’all’indoman mattin;
Comme un Putto in sciu[sic] tettin.

Ecco cose m’è seguio
Ne-a mæ bella Campagnata
Parlo solo dell’Andata,
Che ancon pezo fù o Ritorno

Ve o contiö, ma un atro giorno,
Che ancon troppo ve seccavo,
Stæme allegri, ve son scciavo.

  1. giromïa inte l'ed. do 1846
  2. checchezzando inte l'ed. do 1846
  3. ghêubba inte l'ed. do 1846
  4. sæta inte l'ed. do 1846