Lunaio Regiña 1835/Sêunno
| ←I raviœu | Lunaio zeneize compilao da-o sciô Regiña & C. pe l'anno 1835 de Sœunno |
Campagnata→ |
| Zena, Stampaja di Fræ Paghen, Ciaçça Nœuva n. 43 - exemprâ conservao inta Libraja Britannica |
Oh che sêunno stravagante
Son andæto mai a fâ!
No me stæ a ciammâ seccante,
Se ve o vêuggio un pö contâ:
Me trovavo, no saviæ
Se in Campagna, oppù in çittæ,
Ma in t’un lêugo dove gh'ëa
Pin de roba da mangiâ,
Cêutta[sic], crûa, cada, giassâ,
E ciù sciato che in galëa,
Pe-e gren Bestie che parlavan
Comme i Ommi, e caminavan
In sà, e in là tutte affannæ;
Domandeì a un Pappagaggio
Cose gh’ëa, per cuxitæ.
Vanni a vedde un pö in to staggio
(O me disse con magon)
Meschinetto! gh’è o Patron
Chi se trêuva a mâ partïo,
E zà' dæto per spedïo.
Vaddo e veddo (con licensa)
Un sciô Togno stramezuôu
De salute in apparensa,
Mà dä grascia suffucôu;
Gh'ëa d’attorno un orecchiuta
Bestia (o Mego de conduta),
Chi ghe dava di buggiêu
D’un purgante-vomitivo
Fæto d’êujo de vetriêu
Per rimedio esecutivo.
Ahimè mi! me manca o coêu!
(Criava o porco semivivo)
Fræ diletti, per caitæ!
Ciù meixin-ne no me dæ;
L’è deciso da mæ sorte,
No stæ a cianze, che da forte
Vaddo allegro incontro a morte,
Ma per muî un pö ciù contento
Vêuggio fâ o mæ testamento.
Son chi mì (rispose un Can)
A riçeivio, son Scrivan,
Perchè scrivo in tutti i canti.
Stæ a sentî cose o dettava
Mentre o can tutto notava
Con applauso di ascoltanti.
« Lascio i Êuggi aì Debitoî
« Per ammiâ i so Creditoî;
« Lascio mezo Nazo brutto
« Ai Cujosi, e Cætellosi
« Per ficcâlo da per tutto;
« L'atro mezo aì Superbiosi,
« E gh'azzunzo ascì e Bazette;
« Lascio a Lengua ae Battinette;
« E mæ Oeggie e lascio ai Sordi
« E o Cervello o dö ai Bettordi;
« Lascio i Denti ai Uzuraj,
« E a Lunetta ai Antiquaj;
« Lascio o Peì da schen-na fin
« Per aguggia ai Savattin;
« Lascio o Sangue ai Berodæ
« I Ventraggi ai Formaggiæ,
« O Fighæto co-i Rugnôin
« Ai Spujosi Spacchettôin;
« L’Arfê o lascio ai Invidiosi,
« E e mæ Gambe ai Podragosi;
« Item lascio ai Laddri i Pê
« E o Côdin ai Labardê;
« A mæ Carne ben pestâ
« Con da Vacca insemme missa
« A lasciö per fâne fâ
« Do Salamme, e da Säsissa;
« Se a Gramegna ghe trovassan,
« Tanta Carnesâ ne fassan;
« O mæ Struto o ciù perfetto
« Lascio ae Donne pe-o Belletto;
« Lascio a Cuiga ai Intriganti,
« Lascio e Osse ai Litiganti,
« Lascio e Cêuscie[sic] pe-i Prezutti,
« E un pittin de Lardo a Tutti.
« Lascio ai Cêughi[sic] a mæ Nettixe,
« Ai Mangiôin a mæ Aspertixe,
« Ai Leccaæsi o mæ Ritræto,
« E ai Potrôin o Staggio fæto;
« Lascio... lascio... e chì per bacco!
O lasciò un longo sospïo
Che piggieì pe un’öa tabacco;
O n’aveiva ancon finïo,
Che pe eccesso de caitæ,
Disse un so diletto Fræ,
Che l’ëa megio fâlo muî
Per levâlo da patî.
Approvon tutti l'idea,
(Meno o Porco, ch'o dixeiva
Con gran stento, ch'o no voeiva).
L’asbrion sorve un-na lettêa,
O porton frà quattro in Peêa
Dove i giorni o terminò,
In che moddo mi nö sò,
Che un-na pruxa a m’hà adesciôu:
Cose diascoa m’hò assunnôu!