Chittarin zeneize 1881/321 Prollogo
| ←Ringraçiamento | Chittarin zeneize de Prollogo - Pe 'n academmia de l'Instituto gratoito muxicâ |
Diallogo→ |
| reçitao o 28 nov. 1838 inte 'n zeneize teribilmente toscanizao, foscia pe via da prezença tra-o pubbrico de tanti personaggi "distinti" (G. Musso) |
PROLOGO 1
Magnifichi Scignori, ûdiensa rispettabile,
Sesso virile illûstre e bello sesso amabile,
Imbarassôu me trêuvo, me sento palpitâ
Dovendo dâve ûn schisso de cöse andemmo a fâ
In questo filarmonico e pio stabilimento,
Con questo odierno nostro pûbblico esperimento.
Veddendose onoræ da ûn nûmero imponente,
Contro ogni nostro merito, de scelta e dotta gente,
Me sento cazze e brasse; ma, fætome coraggio,
Ve diö in breve, signori,[sic] che andemmo a dâve ûn saggio
Do stûdio e di progressi ne-a nostra mûxicale
Intrapreisa carriera vocale e strûmentale
Sotto di bravi meistri, zelante direttô,
Che ninte han trascûrôu, perchè se femmo önô.
E, per teddiâve meno, in aja de demoetta,
Per fâ ûnn-a cosa nêuva, sentiei ûnn-a farsetta
De duî atti, composta de sprescia espressamente
Per comici novizj e ûn pûbblico indulgente.
Noî semmo prinçipianti e allievi, e ben savieì,
Che nisciûn nasce meistro coscì, ne comportieì,
Façendo o sordo e o mûtto a-e nostre dissonanse
E l’orbo per no vedde e nostre gren mancanse.
Con questa gran fidûcia a presentâ s'andemmo
Davanti a ûn dotto pûbblico, do quæ a bontæ imploremmo.
Chi ha ûn chêu ben fæto e grande, sa vedde e tollerâ,
E generoso e nobile sa incoraggî e lödâ.
Comme o mâ chi riçeive in te sò vaste scciûmme
Tanto ûn fussôu da ninte, quanto o ciû grosso fiûmme;
Onde se lûxinghemmo d’ëse da voî sentii
Ben visti e ben accolti, prottetti e incoragii.
Quello che posso dîve, scignori, é ascicûrâve[sic!]
Che grande è assæ l'impegno de tûtti in contentâve,
Per dâ ciû lûstro e credito a questo zà avoxôu 2
Nêuvo stabilimento a Eûterpe dedicôu,
Nasciûo dall’amô patrio, alimentôu, diretto
Da-o genio filantropico, incoraggïo e protetto
Da illûstri mecenati, da socii generosi,
Che de vedde brammiescimo ancon ciû nûmerosi
Pe approfondîne e reixi, azzunze di elementi
Da navegâ ciû in poppa con prosperosi venti,
Che vêu dî in bon zeneize, parlando ciæo lampante,
Aveighe ciû risorse e a cascia mai vacante,
Per coltivâ i talenti e o genio svilûppâ
Di sempre ciù crescenti alûnni da giornâ;
Voto che a-o Çê porzemmo e che o vegniä exaudïo,
Zacchè non parlo a sordi.... Scignori, m’ei capïo.
Corrï con chêu magnanimo e man ben allargâ
Di nostri mecenati a lista a prolungâ;
Rendeive benemeriti, con dâ ûn pö de tribûto
A questo adolescente patrio ûtile Institûto.
Scignori e scignorinn-e, o Prologo è finîo,
Sentî a nostra Accademia e poi ciocchæne. Addio!
.jpg)