Rime diverse in lengua zeneise/Se questa è neive chi ven da ro cé

Da Wikivivàgna
Sata a-a navegassion Sata a-a serchia
Rime diverse in lengua zeneise de Poro Foggetta
Se questa è neive chi ven da ro cé
acento grave = vocale curta - acento aguçço = vocale longa
clicca o nummero da paggina pe 'n rafronto co-a transcriçion diplomattica
[p. 10r modifica]

Se questa è neive chi ven da ro cé
Come a ra sò gianchezza vei me pá
Come diavo ghe puoe drento stá
Ro fuoego, chi me bruxa si crudé?

Se l'è un marmaro giancho dritto in pé
Come ra sò durezza puoe mostrá,
Come diavo fallo a caminá
E a tirá frecchie come un barestré?

Ma se l'è Donna pù de carne, e d'osse
In terra come a pá, ben hò certezza
Che vei chiù bella cosa no se posse.

Che l'è chiù bella dra mesma bellezza
E chiù bella sareiva s'a no fosse,
Chiù dura ancora dra mesma durezza.