Rime diverse in lengua zeneise/Frottora dri schiapoei de legne
| ←A quelli tempi antighi si laudé | Rime diverse in lengua zeneise de Frottora dri schiapoei de legne |
Se questa è neive chi ven da ro cé→ |
| acento grave = vocale curta - acento aguçço = vocale longa clicca o nummero da paggina pe 'n rafronto co-a transcriçion diplomattica |
Con re piccozze in orde, e aparegié
Per schiapave re legne chi vegnimo
E s'intri boschi lavorá ne fé
Ro lavó se no chiove ben compimo.
E a voi chi rente a vei schiapá ne sté
Ro cuo no men dre legne ben v'arvimo
Se ben ro cuo chiu duro ve trovemo
Che re chiu dure legne che schiapemo.
2
Se ben re legne verde ve trovemo
Tanto ben ve re semo nui schiapá,
Ch'attacaghe ro fogo presto femo
Senza che troppo ghe fassé sussá.
E boggí ra pignata ve fassemo
Como missa l'havei su ro brandá
Ben che sen legne verde in sugo ancora
Che bruxando ro lete zu ghe scora.
3
Se legne sotta verde hemo d'Arví
Quando ferle novelle dí se pon
Megio, e chiu vorenté i uzemo arví
Ca quando per vegiezza secche son,
Donca fin che i havei verde e gentí
Schiapavere dei fá da schiapao bon
Che fá schiapá re veggie no trové
Sarvo se ro schiapao no strapaghé.
4
D'arrobá legne sacchi no portemo
Com'atri schiapoei fan pe ro contorno
Anzi noi che d'Amó bersaggio semo
Tente frecchie amorose hemo datorno
Che some, e fassi a voi dá ne possemo
Pe ra pignatta vostra, e pe ro forno
E ben de bruxá, donne, merité
D'este frecchie d'Amó, ch'accende fé.
5
Da i oggi donde Amó prexon fé voi
Un'amoroso fogo n'esce fuo
Che re verette ch'hemo atorno noi
N'accende, e fa bruxá fin a ro cuo,
Ma de bruxá per così chieri soi
Como son ri vostr'oggi no ne duo.
Anzi bruxá per ló tanto gustemo
Ch'intro fogo un pareizo noi gustemo.
6
E intro vostro d'honó bosco divin
Chi è sempre verde, e chin de mille odoi
Con ra picozza de l'inzegno fin
Vorenté, donne, v'intrereimo noi
Onde se voi vorrei seira e mattin
Fassi de groria ve faremo a voi
Che per ló vive sempre ve faremo
Se ben schiapoei de legne ve paremo.
7
Zà s'accosta ra notte, se ben voi
Parei da mezo giorno ancora fé
Ch'in cangio d'oggi havei si chieri soi
Che l'Orba Zena tutta illuminé,
S'arví donca vorrei ri boschi a noi
Che ra luxe in voi manche no aspeté
Che ro dì presto passa, e notte ven
Che intrá chiu pe ri boschi no conven.