Piaggio M. - Poesie 1846/Prefazioîn e Reviste da Çittæ/1828
| ←Prefazion, Anno 1827 | Prefazioîn e Reviste da Çittæ de Prefazion, Anno 1828 |
Prefazion, Anno 1829→ |
| (ediçion Pagan - 1846) |
*
Vintisette, ti æ finio,
Va co-i atri che t’infio
In ta resta di passæ,
E in to libbro dell’etæ,
Dov’è scrito in prosa, e in verso:
Tempo guägno, e tempo perso.
Va in ti quondam, che ti è chêutto:
Cedi o posto ûn pö a-o Vintêutto
Ch’o l’è chi ch’o se presenta
C’ûnn-a faccia ben contenta,
Mento cûrto, naso affiôu,
L’êuggio drito ûn pö serrôu,
Unn-a masca fresca e rossa,
L’atra secca, e cô da tossa,
Bocca e denti da elefante,
Oëgie e lengua da mercante,
O l’ha un brasso regaggïo,
Sottî l’atro e arrensenïo,
Gamba drita instivallâ,
Ranga l’atra e descäsâ;
O l’ha in testa mille scioî,
E vestïo de tanti coî,
Ch’o pâ propio ûn Arlecchin,
O caminn-a, e o va ciannin,
O l’ha e stacche tûtte pinn-e
Da salûte, e de roscinn-e,
Ma o r ha in man çerta cascetta,
Che gh’ha dæto a Sciâ Cicchetta,
Dedicâ ä Necrologia
Da-i nemixi de Galeno,
Che s’o l’arve, a mette puia....
O perdesse a ciave almeno!
L’è chi l'anno co-i speggetti;
Pin de spinn-e e fenoggetti;
Te salûo Vintêutto cäo,
Seggi sempre o ben vegnûo
Pe-o riccon, pe-o poveo diäo,
Fa ûn pö cæo dove gh’è scûo,
Bagna ben dove gh’è arsûa,
Secca e reixi all’impostûa,
Scrêuvi o spegio da veitæ,
Fa trionfâ l’abilitæ,
Taggia e gambe a-e malazioîn,
Alza a testa a tûtti i boîn,
Çerneggiando megio i ommi,
Dà un’annâ de galant’ommi;
Fa che chi vêu travaggiâ
Mai all’ozio posse stâ,
E chi ha coæ de fâ o pötron,
Mangie in giûsta proporzion.
Intra dunque, cäo Vintêutto,
Va adaxin per fâ ciù rëo,
No portâ tempeste e zëo,
Ma abbondanza de beschêutto,
Fa che s’impe trêuggi e tinn-e
D’êujo e vin, che ne-e cascinn-e
Se gh’ammûggie do gran fen,
Che ghe n’è o bezêugno ben;
Fa che nasce pe-i cucchetti
De gren çerse, e pe-i porchetti
De gren giande, che l’è giûsto
Che ognûn mangie de so gûsto.
Se ti poesci semenâ
De gren case d’andâ a stâ,
Ma però senza grondann-e ,
Saeivan megio che e meizann-e,
Perchè çerti pixiouanti
Pâ che gh’aggian di diamanti
Co-e so case, che vêuan véndie
Tûtti i anni co-a pixon
Pe aumentâ do doggio e réndie,
Che belliscima invenzion!
Cioè diabolico segretto,
Regittôu da qualche ghetto,
Per guagnâ ûzûraicamente,
E frosciâ barbaramente....
Anno nêuvo, vegni avanti,
E consola tûtti quanti
Co-a salûte e co-i dinæ,
No portâ ciù novitæ;
Fa che regne a-o mondo a quete,
No scrovî ciù de comete,
N’ingrandî ciù e maccie a-o Sô,
No fâ stradde sotto i fiûmmi,
Nè ciù gaz pe avanzâ i lûmmi,
Manco macchine a vapô.
Grazie ä Paxe, e ä sciâ Vaccinn-a,
No gh’è ciù carnificinn-a,
E crescendo de mioîn
Se ne va e popolazioîn.
Se dovieiva, mi me pâ,
Anzi accresce, no ammermâ
O travaggio a tante braççe,
Dunqae andiä ciù all’aja e straççe,
Che grattandose e zenogge,
A pignatta a no ghe bogge:
E.... ma torno a ti, Vintêutto;
Ti me gûsti pe-i duî êutto,
Se te poëse vedde o terso,
Compensieiva o tempo perso.
Fa che i Meghi co-e meixinn-e
Staggan sempre in te officinn-e ;
Fa piggiâ a rûzze a-e lançette,
E in ta so ægua moî e sanguette,
A-i Dottoî, Procuoeì, Curialibus
Dagghe festa in Tribunalibus,
Fa che o caroggin do fî
Vadde drito da San Loenso,
E che regne ciù o bon senso,
Che o saveì da no capî.
Se per caxo ti veddesci
Bonnafede e Costantin,
Digghe che vegnimmo nesci
Per trovâli, ogni pittin,
Che l’è ben lasciâse vedde,
Dunque ciù nisciûn ghe credde,
E intoppando o Sciô Arpagon
Cö so socio Pignaverde,
Fagghe intende ûn pö a raxon,
Che no staggan, digghe, a perde
Ciù o çervello per stûdiâ
Comme poeì megio sûssâ
Tutto o sangue impûnemente
Per soccöre a povea gente....
Fagghe vedde da lontan
A cascetta che ti hæ in man,
Che se mai per qualche verso
S’emendassan.... tempo perso!
Anno nêuvo, per caitæ
Fa ûnn-a cosa necessaja,
Leva i zêughi d’ægua all’aja,
Che scöxiscian a Çittæ,
E fan ben dî mâ de lô
Quando ciêuve, e lûxe o Sô.
I Foestê restan stordii
Di palazzi greminii,
Fabbricati sorprendenti,
E di insigni monûmenti
Da sûperba nostra Zena,
E so scituazion amena;
Van gûstandone e bellesse,
Decantandone e ricchesse
Co-e preziose raritæ,
Restan poi ben mäveggiæ
In sentîse coscì scoâ
Da ogni teito e da ogni toâ,
E ghe fâ troppo ghignon
E grondann-e con raxon,
Che se ciêuve e cessa l’ægua,
Tanto a Zena ghe vêu o pægua,
Perchè ciêuve ancon pe ûnn’öa
Pe-a belliscima demöa
De fontann-e che tegnimmo
Sempre all’aja, e se gödimmo
Comme tante raritæ.
Oh grondann-e giastemmæ!
E no l’eì ancon capïa,
Che bezêugna che andæ vïa,
Perchè seì troppo insoffribili,
E do tûtto incompatibili
Co-e belluïe, i megioamenti,
Teatro, stradde, ingrandimenti
Che veddemmo fâ in Çittæ;
E co-e ciasse nettezzæ
Pe i barchî mezi bandii,
Co-i caroggi ciù ingrandii
Pe-e bûtteghe in ritirata
Pretendeì de stâ in parata?
Faesci megio andâve asconde,
Ciù un pittin ve o diggo donde....
Per piaxeì, Vintêutto cäo,
Fanne ûn pö ûn regallo a-o diäo,
Che con lê forse sciûghiän,
E coscì no ne bagniän,
Nè arraggiemo ciù dä bile.
Tocca a ti, Anno bisestile,
A mandâghe ûn bon exploi
Comme o scioppo de Le Roi....
Fagghe presto o so processo,
E motiva e concluxioîn
Dall’aumento de pixoîn.
Co-a cäçinn-a e un pö de gesso,
Con due o træ bande stagnæ,
Quattro legni appuntellæ,
Un stagnin, ûn spegassin,
Un garson de massacan,
Pochi færi e quattro moîn,
Presto presto se ne van
In t’un posso drite drite,
E coscì ti guägni a lite
Co-e grondann-e e contro i toæ,
Perchè allöa son licenziæ.
Ma bezêugna ascì exiliâ
Çerte insegne appeize all’aja
De grandezza straordinaja,
Che fan proprio soffocâ,
E zacchè ti hæ e moen in pasta,
Se porriæ.... ma pe aoa basta,
Ne parliemo ûnn’atra votta
Per no strenze troppo a scotta.
Mi frattanto con coraggio
Vaddo a fâ per l’aja ûn viaggio;
Doppo aveìne provôu tante,
Andiö in t'ûn ballon volante
Per scrovì ben da lontan
Lazzù a-o mondo cose fan;
C'ûn cannocciale a due canne,
A-a Congreve, a ûzo Cocranne,
Me leviö de cûxitæ ,
E scroviö de gren veitæ.
Fasso in Acqui o primmo passo
Per dâ un pö de caænn-a a-o brasso;
Se no giasso, o no derrûo,
Ve contiö poi per menûo
Cose aviö visto, e sentïo,
Bonn-e feste, parto, addïo.