 |
Questa pagina a no l'è stæta corretta. | |
Un stagnin, ûn spegassin,
Un garson de massacan,
Pochi færi e quattro moîn,
Presto presto se ne van
In t’un posso drite drite,
E coscì ti guägni a lite
Co-e grondann-e e contro i toæ,
Perchè allöa son licenziæ.
Ma bezêugna ascì exiliâ
Çerte insegne appeize all’aja
De grandezza straordinaja,
Che fan proprio soffocâ,
E zacchè ti hæ e moen in pasta,
Se porriæ.... ma pe aoa basta,
Ne parliemo ûnn’atra votta
Per no strenze troppo a scotta.
Mi frattanto con coraggio
Vaddo a fâ per l’aja ûn viaggio;
Doppo aveìne provôu tante,
Andiö in t'ûn ballon volante
Per scrovì ben da lontan
Lazzù a-o mondo cose fan;
C'ûn cannocciale a due canne,
A-a Congreve, a ûzo Cocranne,
Me leviö de cûxitæ ,
E scroviö de gren veitæ.
Fasso in Acqui o primmo passo
Per dâ un pö de caænn-a a-o brasso;
Se no giasso, o no derrûo,
Ve contiö poi per menûo
Cose aviö visto, e sentïo,
Bonn-e feste, parto, addïo.
