Piaggio M. - Poesie 1846/Esopo Zeneize/I Bûffoîn
| ←O Ratto Romito | Esopo Zeneize de I Bûffoîn |
A Morte e o Mëgo→ |
FOA CV.
Unn-a Scimia de quelle brûtte assæ,
Che spûssan çento miggie da lontan,
Che fan ghignon, ma pû son decantæ,
A çercò per guägnâse ûn pö de pan
Tûtti i mestê, ma quello do mincion
O ghe piaxé, a se misse a fâ o bûffon;
E con fâ di gren schitti e atti indecenti
A l’ëa ben vista dov’a s’accordò,
Perchè passavan tûtti per portenti,
Nè in casa o gatto e o can ciù se çercò,
Anzi piggiavan sempre de brûghæ,
Lê in cangio a poeiva fâ cose se sæ:
Verbi grazia va in casa o sciô Magnifico
Con passo grave e ton de conseguenza,
Vestïo de neigro, ûn perrûccon magnifico
(Dove pe-o ciù ghe sta tûtta a sapienza),
A va derrê a ghe leva o perrûccon,
E o poveo Mego o resta lì ûn mincion.
Bello véddila poi méttiseo lê,
E andâ da-o letto de chi aveiva mâ,
Tastâghe o püso, ammiâghe a lengua e i pê,
Sbatte da bocca e o perrûccon scrollâ;
A paeiva proprio ûn Mego, tale quale,
Meno a parolla , e a laurea dottorale.
Aoa a piggia o scuffiotto o a cappellinn-a,
Aoa o sciallo e a bandëta a quarche vëgia
Chi voeiva fâ da bella e paeì zoeninn-a,
Poi tûtta linci e squinci a va, a se spëgia,
A se fa fresco, a fa mille rizetti
Tûtta pinn-a de gnèrtoe e de gaibetti.
A l'ëa famosa poi ne-o contraffâ
L’andata, o ton e i atti di galanti,
A véddia dâ di êuggiæ... sospiâ... strassâ
O mandillo da sûo, addentâse i guanti,
Ballâ, cantâ, sûnnâ l’amandolin ,
Nisciûn l’aviæ distinta da ûn zerbin:
Coscì con fâ ben rie, spesso a buscava
L’amandoa, o beschêuttin, cose insûcchæ;
L’è veo, che quarche votta ghe toccava
Da chi a metteiva angoscia de bacchæ;
Ma se fin l’ommo grande o l’è legnôu?
No se legniä ûnn-a bestia cö cû peôu?
Un giorno vìgne in testa a so patron,
Chi aveiva di so fæti e stacche pinn-e,
De divertïse ûn pö do so bûffon
Chi gh’andava sciätando e so gallinn-e:
Per mincionnâlo e voeìsene desfâ,
Stæ ûn pö a sentî cose o ghe fesse fâ:
O piggia ûn bon razô, presto ö repassa
Sciù e zù in ta prïa perchè o taggie megio;
Ægua cäda, baçî, savon e strassa ,
Poi tûtto desbragôu davanti a ûn spegio
S’inscciûmma ben a faccia, e se fa lê
A barba megio ancon che o perrûcchê.
Quando o l'è lesto, o lascia tûtto lì:
A Scimia chi l’ha visto, ghe ven coæ
De fâse a barba cö razô lê ascì;
A s’insavonn-a, e a se dà razoæ
Zù abbrettio ch’a se taggia o collo e a l'ûrla,
E so Patron derrê che riendo o a bûrla.
Oh voî atri che i Grendi pratichæ,
Che a-i so pasti e a-e so scaggie fæ l'amô,
Che ghe fæ da Bûffoin, che i adûlæ
Arregordæve a Scimia cö razô,
Perchè quando ciù meno ghe pensieì,
O tosto o tardi comme lê finieì.
