Piaggio M. - Poesie 1846/Esopo Zeneize/O Ratto Romito
| ←O Berrettin Magico | Esopo Zeneize de O Ratto Romito |
I Bûffoîn→ |
FOA CIV.
Quando d'inverno a-o fêugo a Madonnava
Co-i so speggetti a se metteiva a fiâ,
Ciù belle foette sempre a me contava
Da fâme in mæ veitæ coscì sciallâ,
Che me scordavo a çenn-a e a colazion,
E quanto aveivo in casa de ciù bon.
Aoa e guære di Grilli contro i Ratti,
Aoa l'Aze chi ammassa ûn Elefante,
Aoa e nozze da Vorpe con treì Gatti,
O a sfidda d’ûn Moscin contro ûn Gigante,
Dunque e bûrle do Spirito folletto,
E o Barban co-a Bazara sotto o letto.
Me sovven che ûnn-a bella a ne contò
Un giorno doppo aveìla assæ pregâ;
Ma primma ben o naso a se sciûsciò,
A l’arvì a so bocchella desdentâ,
A bägiò quattro votte , a spûò, a toscì,
A tabaccò, e a disse poi coscì:
Unn-a votta gh’ëa ûn Ratto chi aiva coæ
De retiâse da-o mondo tristo e rio,
E per pûrgâse ben di so pecchæ,
E a tûtte e cose vane dâ ûn addio
O se cacciò, no so in te che cantinn-a,
Drento d’ûnn-a formaggia piaxentinn-a;
E sciccomme ghe paeiva, che o stà ozioso
A no foise ûnn-a cosa da lödâse,
Perchè per l’ozio o Ratto o ven vizioso,
O se desse d’attorno, e per mesciâse
Tûtti i giorni de seja o de mattin,
O roziggiava ûn pö de Piaxentin.
In pochi giorni a forza de laoâ,
Retiôu in ta so cella mezo a-o scûo,
O no se poeiva , quæxi ciû mesciâ,
O lûxiva ch’o paeiva de vellûo,
E o gh’aveiva piggiôu zà tanto amô
Cho l’ëa vegnûo ciù grasso che ûn Fattô;
Ma vìgne intanto in ta Çittæ di Ratti
In quell’anno ûnn-a grande carestia;
No gh’ëa de gran, manco favin co-i fratti,
Nisciûn mangiava, e gh’ëa l’epidemia
Che creppavan a mûggi, e per ciù pesta
I Gatti Stavan pronti a fâghe a festa;
O Pûbblico o speddì di Depûtæ
Cö so sacchetto a-e spalle in tûtte e bande
Pe ammiâ d’aveì quarcosa per caitæ,
Seixai, granon, faxêu, bacilli o giande,
E andòn fin da-o me Ratto per soccorso,
E ghe fèn ûn patetico discorso.
Oh! figgi cäi (ghe disse sto Romito),
Andæ in paxe, che mi no g’ho che dâve;
Me son retiôu chi apposta in questo scito
Per levâme da-i peighi, e pe insegnâve
A ben vive, e a n’aveì che ûn solo amô,
Ch’o l’è quello de ben pensâ per lô;
E poveo mi! cose ve posso dâ
Serrôu fra quattro mûäggie comme son?
Indegnamente posso o Çê pregâ
Ch’o l’agge de voî bestie compascion,
Andæ... speæ tûtti in lê... mi ninte gh’ho,
E pon! a porta in faccia o ghe serrò!!
Ah! Madonnava caa , ghe disci allöa,
Questo Ratto o l’è tûtto o sciô Tognin,
Quell’avaro ch’o temme andâ in mallöa,
Chi pensa solo a lê, ch’o fa o beghin ,
E o predica o zazzûn, ma d’arescoso
O se mangieiva a testa d’ûn tignoso.
Taxi (me disse a Vëgia assæ arraggiâ,
Smingandome ûn patton) chi t’ha insegnôu
Do to proscimo dî, o pensâne mâ?
E per questo ch’o segge decantôu
Da tûtti pe ûn Egoista, a ti no tocca
Mascarson! dîne mâ, tàppite a bocca;
Se te sento parlâ mai ciù de lê,
Te daggo ûn arregordo co-a spassoïa:
A me desse ûnn’êuggiâ da cappapê
Ch’a me sciorbì, e a me misse tanta puïa
Che fesci voto espresso da piccin
Lasciâ in paxe i Egoisti, e o sciô Tognin.
