Piaggio M. - Poesie 1846/Esopo Zeneize/A Mosca e o Moscin
| ←A Scimia, o Gatto e o Spëgio | Esopo Zeneize de A Mosca e o Moscin |
I Progettisti→ |
L’ëa do meize là d’agosto
Quando e grigoe fan l’amô,
E che secca a tæra e o costo
Da-o gran cado che fa o Sô;
Un Villan senza magagna,
Co-a so faccia brustolïa,
O l’arava ûnn-a Campagna
In ti cien da Lombardïa;
Tutto suento o s’affannava
Per guiddâ l’aratro e i bêu,
Con gran stento o gh'aggiûttava
Perchè andassan dov’o vêu.
Unn-a Mosca assæ arrogante,
Tûtta pinn-a d’impostûa
Con ûnn’aja da importante
Sorve o cäro a l’ëa vegnûa,
Sghêuando forte, e mosconnando,
E corrindo ciû ch’a pêu;
A l’andava rondezzando
Sorve l'ommo, e sorve i bêu;
Impaziente a no se pösa,
A vêu fâ da necessaja,
Che ghe pâ d’ëse qualcosa,
A va zù ch'a spacca l’aja.
Mentre a l’ëa coscì in faccende,
Ghe passò appresso ûn Moscin,
O l’ammïa, ma o no comprende,
O ghe dixe, ma ciannin:
« Dimme un pö, dove ti væ,
« Mosca caa, coscì affannâ?
« Cose diascoa mai ti fæ,
« Che ti cöri invexendâ?
Ghe rispose con baldanza
Quell’insetto indispettïo:
« Grandi affari d’importanza!
« Ti n’hæ d’êuggi! o ti è stordïo?
« Semmo quattro chi occûpæ,
« Ti domandi cose femmo,
« Pezzo d'aze! ti nö sæ?
« Semmo chi che a tæra aremmo.
Sta risposta presuntuosa
A fè rie finn-a o Moscin,
Ch’o lasciò a Mosca affannosa,
E o l’andò per so cammin.
A l'è assæ comûne usanza,
De stimmâse a-o di d’anchêu
Personaggio d’importanza
Da chi è Mosca, e non è Bêu.
