Piaggio M. - Poesie 1846/Esopo Zeneize/A Scimia, o Gatto e o Spëgio
| ←A Vorpe e a Beccassa | Esopo Zeneize de A Scimia, o Gatto e o Spëgio |
A Mosca e o Moscin→ |
FOA XXXIX.
C’ûnn-a bella cornixe tûtta indoâ
Pinn-a d’intaggi fæti zù a feston,
Unn-a lûxe de Spëgio assæ stimmâ,
In t’ûn salotto a l’ëa promê a ûn barcon,
Dä quæ passando e donne, o belle o brûtte,
Pe ûn quarto d’öa se ghe spëgiavan tûtte;
Passò ûn giorno d’avanti a questa lûxe
A caxo un Scimiottin, che l’ëa de Stæ,
E in to vortâse per çercâse e prûxe
O vedde là sto müro da bughæ,
O resta stuppefæto, e o dixe ohibò!
Ma sciollo, o no s’accorze ch’o l’è o so;
Nè o se ne poeiva accorze pe-a raxon
Ch’o fù piggiôu in t’ûn bosco assæ piccin,
Che de Scimie o n’aveiva visto ancon
(Meno qualche elegante Damerin),
E veddendo sta bestia là promê,
Ghe vegnì vêuggia d’accostâse a lê;
Ciancianninetto dunque o s’avvixinn-a
D’avanti a-o spëgio, e poi se cianta lì,
Primma o l’ammïa ben ben, poi co-a sampin-na
O se mette a toccâla, e quella ascì,
O s’allarga, o s’accosta, o s’ïsa in pê,
O vedde, ch’a fa tûtto comme lê.
Presto presto o l’ammïa derrê da-o spëgio,
Ma in non vedde nisciûn, forte ghe sbraggia:
E chi ti è mai, brûttô, müro de vegio,
Mostro deforme, che ti metti raggia?
Vatt’asconde... «Va ti cö to cû peôu,
(Ghe disse ûn Gatto bardo lì accucciôu),
« E ti no veddi, nescia, che ti è ti;
« Ti t’è fæta giûstizia da to päo,
« Ti è Scimia, ti hæ da vive, e moî coscì.
« Conoscite ûnn-a votta, e vanni a-o diao...
« Séguita.... cosa caa, bocchin da baxi....
« Séguita a fâ o to elogio... e che! ti taxi ?..
O Scimiotto restôu mucco e avvilïo
O se davan in to spëgio, e a lê di êuggiæ;
Ma quando o s’accorzè ch’o s’ëa tradïo,
E che o Gatto dixeiva ûnn-a veitæ,
O piggiò presto o spëgio, e da-o venin
Paffete in tæra!... ö fesse in menissin.
Questa Foëtta do Spëgio, che ho contôu
A l’è quella, che o sciollo a fa sciallâ
Perchè o vedde o Ritræto ben copiôu
Do so compagno; ma se poi ghe pâ
De spëgiâse lê ascì, ch’o manda a-o diäo
L'Autô cö libro, o Spëgio, a Scimia e o Gnäo.
