Piaggio M. - Poesie 1846/Esopo Zeneize/A Vorpe e a Beccassa
| ←O Lô e a Grûa | Esopo Zeneize de A Vorpe e a Beccassa |
A Scimia, o Gatto e o Spëgio→ |
Unn-a Vorpe vegia e finn-a
A disnâ ûn giorno a l’inviò
A Beccassa so vexinn-a,
Che per smorfia a l’aççettò,
E sciccomme a çercò o moddo
De bûrlâla, a gh’appaeggiò
Unn-a pignattâ de broddo,
Che in t’ûn testo a ghe versò.
A Beccassa a s’affannava
Con o becco de pittâ
Quello broddo, ma o scûggiava
Senza poeîne mai collâ;
L’atra incangio a o leccò presto
Co-a so lengua longa e affiâ,
E a lasciò ben netto o testo
Ciù che ûn drappo de bûgâ.
A Beccassa a se n’andò
Affammâ e mortificâ,
E lê ascì a Vorpe a l’inviò,
Onde réndighe o disnâ:
Pe appattâse a gh’appaeggiò
Da broddella consûmmâ,
Che in t’ûn fiasco- a ghe portò
Con pregâla de mangiâ.
A Vorponn-a a se rodeiva,
Quello fiasco a l’annastava,
Ma a so lengua infiâ a no poeiva
In to collo, e a ghe bägiava.
A Beccassa a se ne rieiva,
Perchè o becco zù a l’infiava:
Lecca, Vorpe, a ghe dixeiva,
Che mi lecco, e a mincionnava.
No stâ a fâ tanta gazzæa,
Disse a Vorpe inveninâ,
Con a mæxima monæa
Che t’ho dæto, son pagâ.
Chi fa inganni aspëte inganni,
Chi dà danni aspëte danni,
E chi vêu de bûrle fâ,
Burle ascì se pêu aspëtâ,
Senza aveìselo pe-a mâ.
