Ms. Ricci 176/Incoronation dro Serenissimo Alexandro Spinnora Duxe de Zena
| ←torna a l'endexo | Poesie in lengua Zeneise de Incoronation dro Serenissimo Alexandro Spinnora Duxe de Zena |
In lode de Viadanna→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
1
Desciate Musa, no buttá in spremesso
Ro tempo, e tira fuoe l'arpa sonora;
Oura si, che conven frugá in tro spesso,
Ch'atro che ninte o gh'è da mett'in Tora.
Tra fuoé re cicigate e stamm'appresso,
Mi canterò, ti ghe faré ra pora,
Despegollam'un po dotrei fioretti
E sgonfiettame chi quattro mottetti.
2
Se m'abbarluga in tra serenité
De sto só de virtù ro gran sprendó,
Intraghe o' Musa ti, perche ti sé
Che ro to primm'oggetto e' l'è ro só,
Anzi da tanta luxe illuminé,
Asscadé da si nobile caró,
Esci un Aquila ti per contempraro,
Quando no sé mi un cigno per cantaro.
3
Stanco appointo ro só da ro travaggio,
S'era za acoregoù la sotto terra,
Ra nuoette a[r]viva sensa fá dramaggio
Tant'oeggi in Cé, quanti a ne ciode in terra,
Brillava in paxe ro sprendente raggio
Dra stella inamaorá dro Dé dra guerra,
Quando per indozí re nostre feste,
Eccate da ro Cé Donna Celeste.
4
Da nuvera d'Argento circondá,
In rosso manto, Maestosa, e seria
Con tromba d'oro a loù stand'assettá
Sciù un carro d'invisibile materia,
Cose ch'in feti fan strasecolá
L'intendimento dra nostra miseria,
Con sent'oeggi com'Argo, o' Maraveggie!
A l'havé sento lingue, e sent'oreggie.
5
Maestosament'allegra remirando
Fin donde nasce, e donde muoe ro giorno,
Tutta in fin se fermà, così diggando
Dro Dé Bifronte a ro reá contorno.
Sciù, sciù famosi heroi, che meggiorando
Oura ro tempo ven de dase attorno,
Speggieve pu miré comme reluxe
Ra gratia antiga intorno a nuoevo Duxe.
6
Lé ro nomme ha de quello, che scorrendo
Ro mondo in sà, in là senza sparagno,
M'obliga mi con ro való stupendo
A daghe in fin ro titolo de Magno,
Che ra brilla a Bucefalo mettendo,
Fè pompa d'un servello così stagno,
E con ro senno ancora, e con ra man
Desfè si ben ro groppo Gordian.
7
Quello chi fava, quand'o compariva,
Fin re statue suá dro grand'Orfeo,
Che sò poere collava ra sariva,
Stimand'un regno scarso a tanto hereo.
Quello che ra vittoria in man tegniva,
Onde lé mesmo scorrattando a reo,
Vidde ch'a un hommo chi no pò stá in posa
Ra grandessa dro mondo è poca cosa.
8
Tutto s'aggiusta chì ni ciù ni men,
In un grand'Alexandro senza fallo,
Che manezando dra raxon ro fren,
Dominando dro senso ro cavallo,
Rè de lé mesmo essendo così ben,
Per ese re dri atri o l'intra in ballo,
Ottim'estreto, e pura quint'esensa
D'onó, de fe, bonté, senno, e prudensa.
9
Così virei ben presto desgroppoù
Da ro sò gran való felisementi
Quello groppo si grand'e ingarbuggioù,
Ch'in tri pé v'han caccioù serti leventi,
Si no conven lasciaro ingauggioù,
Se besuoegnasse metteghe ri denti,
Ni me sté a dí, che grand'è l'aversario,
Che con pochi Alexandro vensè Dario.
10
All'hora si, che per offitio mé,
In veiro fá si ben de sò personna,
Virei suá per erzero a ro cé
Quanti canori Orfei va in Eliconna,
Diggando, che s'in fronte o porta lé
Ciù de gloria che d'oro ra coronna,
Per lé Zena l'è poco, ch'in restreito
Per un Lixandro tutt'un mond'è streito.
11
Per un Lixandro imitató veraxo
Dri suoe Maggioi, che fuoin de le menoí,
Per lé, che primma de regná a Paraxo,
O regnava in ro cuoe de tutti vuoi,
Onde ro Cé chi no fa ninte a caxo,
A ri besuoegni alluoega ri favoí,
Dopp'haveiro creoù d'imperio degno
Oura per ben commun ghe dà ro regno.
12
Regno in ro quá l'antigo onó retorna,
E rè si degno in pristino ro mette,
So che per sò virtù veggo che torna,
Un di ra Traccia Lunna a sottomette,
E mentre un manto rosso oura l'adorna
Ro secolo dell'oro, o ve promette,
Comme portand'un bello giorno ancora
Ro só ven rosso, e puoe ro mond'indora.
13
E se lasciù ro gran Pianeta eterno,
Ch'oura mostr'in barcon l'arba sò figgia,
Con giusta Norma d'un vorrei superno
Dà luxe a tutti, e da nisciun ra piggia,
Questo gran só con ottimo governo
Lumme e sprendó de così gran famiggia.
Ma tè mi assì son nescio, se me penso
Cresce a un só luxe, e mesurá l'immenso.
14
Così disse ra fama; e in quell'instante
Stanca in dí ben no satia sparì via,
Onde mi veggo, si n'oré dí tante,
Ch'a dí che ro só luxe l'è pazzia.
Non può un topetto sollevá un gigante,
E tant'in sciù no va bass'armonia,
D'Appollo, Appelle, e de Lisippo è vanto
Mostrá un Lixandro in terra, in saxo, in canto.