Ms. Marston 56/De li trenta grai de messê san Ieronimo/10

←Oraciom

Manoscrito Marston 56, 1465 De li trenta grai de messê san Jerömmo Lo decimo grao si è confessiom

Penetencia→

azonto maiuscole, pontezatua, tratin inte forme interrogative e diacrittichi (segondo a prononçia do XVIII sec. e e reggole do Prien do 1745; ecetto "ë" = æ, "ö" = œu);
lasciao a tirde in sciâ "n", in corscivo i atre ligatue, in apiçe e coreçioin posterioî; tra e parentexi quaddre e lettie da azonze, tra e tonde quelle da esponze;

Lo decimo grao si è cofessiom ^[sic]

Lo decimo gra^[sic] si è confessiom. De la quâ Xe. disse in lo Evangerio: "Chi me manifesterà davanti li homi, e mi lo manifesterò davanti lo mê Paire de cell." E si dixe a li levroxi: "Andai e manifestaive a li previ."

E Davit proffeta dixe: "E' dissi che manifesterea la mea iniquitae e pöa e' remetereiva la pietae de lo mê peccao."

E san Poro dixe che la confessio^[sic] de la bocha zoa monto a la salvaciom.

E san Jacomo dixe como li sacerdoti sum integnui de pregâ a li peccoi che manifestem lo so peccao.

E san Poro dixe che quelli chi sum lavai de le lor peccë per vertue de la santa conffesiom, e pöa che retornam a peccâ, de questi se po dî che seam semegeivi a lo can, chi mangⁱa quello chi amo rozigao e incresse a tuti quelli de caza. E cossì è lo peccao chi dapöa la confessiom torna a peccâ, de che o fa fastidio a tuta la santa Zexia, si che questo è cassao de tuti li mereti de la santa Zexia e de li fideli crestiani.

E Xe. dixe: "Pöa che lo rê sprito è insîo föra per la prefeta conffessiom, e' pensa che o possa tornâ de unde e' l'è insio e pigⁱâ sete spriti pezoi e fallo pezo sete vota pu che o non era avanti", so è a dî, che cossì como um segnô perdesse um so castello e lo vegnisse a recoverâ, ello lo fareiva pu forte che ello non era, e si ge congregereiva tute quelle cosse per che o l'avesse perduo, asochè o non lo poisse pu perde, e cossì fa lo demonio, che se ello perde quarche homo per esse vegnuo a penetencia e che o ge retorne per lo peccao, ello lo redogⁱa de tute le sete peccae mortë.

E de so Xe. dixe che: "Piaschuna vota che lo peccao pecca e sarà convertio a la soa rea via e' non me arecorderò mai de ello ni de le soe iniquitae."

E Saramon dixe: "Chi asconderà le soe peccae o non sarà reduto a la drita via."

E santo Agustin dixe: "Cossì como lo povero mendigo mostra vorentera la pu trista vestimenta che ello aiha per avei pu limoxina, cossì dè fâ lo peccao quando o va a lo preve o ge dè mostrâ lo peccao che ello a faito e non ge dè mostrâ lo bem, e cossì o reseverà ogni mizericordia. E cossì como quello chi è inpiagao chi mostra la soa piaga e non la cröve avegnachè a sea vergognoza, e questo o lo fa per esse pu pietozamenti meigao, e cossì dè fâ lo peccao quando o va a lo preve, che ello ge dè dî tute le soe peccae e tanto quanto lo peccao è pu vergognozo ello lo dè vorei pu tosto dî e confesallo per essene pu tosto assoto."

E santo Anbröxio dixe che Dee fa lo contrario de li zuxi terem, persochè li zuxi terem zuigam quelli chi confessam e asolvem quelli chi se schuzam, e lo zuixo de Dee non è cossì, chè Dee asolvem quelli chi s'acuzam.

E santo Agusti^[sic] dixe che nissuña persona non dè dî: "E' non me vögⁱo conffessâ perssochè non me posso goardâ da peccâ." Non vegamo noi che quando lo homo e preizo e misso in prexom, che ello non a forssa de poisse deffende, ma se ello poisse ronpî lo ligame de che e' l'è ligao o se deffendereiva? Cossì è lo peccao, che quando o pecca e' l'è preizo e faito servo de li demoneij, e tante peccë como ello fa, tanti segnoi ello a, e se ello vem anchora a la conffessiom ello è liberao de questa servitudem e si se po megⁱo defende da li demonei e goardasse da peccâ.

E san Griö^[sic] dixe: "Quando Dee aspeta longamenti lo peccao e o non torna a penetencia, o lo fragella pu longamenti e pu duramenti."

E san Poro dixe che como la forte lisîa leva le grande tache, cossì la contrita conffessiom neteza le grande machulle de le peccae da la anima.

E santo Anbröxio dixe che se um avesse sete piage mortë e ello mostrasse le sexe e aschondesse l'una, certo quella lo metereiva a la morte per quella secreta cossì como per le sete, e cossì lo peccao chi averà tute le sete peccë mortë, se ello confessa le sexe e lo setimo per vegögna o l'aschonde, abi per fermo chi quello va cossì a lo inferno per quello peccao che l'asconde como per tute sete.

E san Jeröⁿⁱmo dixe che cossì como lo homo ferio non po goarî se avanti o non ne trâ la marsa föra de la piaga, cossì lo peccao non po esse salvo fin a tanto che le ree hövere non seam butë föra per la conffessiom.

E santo Agustim dixe: "Cossì como lo homo se po aschonde in la caza unde o se penssa devei pöi invorâ e dâ man a li atri söi conpagni, cossì lo peccao aschozo ^{de lo homo} lo demonio ge ne meña assai de le atre, le quë fan che la anima non po vei la gloria de lo altissimo Segnô nostro Ihu. Xe.