L'Amandoin de Bonassêua, 1858/O spëgio

←E campann-e e o resto apprêuvo

L'Amandoin de Bonassêua, 1858 O spëgio

Questo mondo→

da-a Libraja de stoia moderna e contempoannia de Romma

RAXONANENTO TERZO

---

O Spëgio.

Mi tant'è no posso stâ
Se no parlo ûn pö de figge
Se no-e fasso ûn pö arraggiâ
Discorrindo a-e so famigge
Pcrchè tanto me conven,
Che me vêuan sempre ciû ben.

L'Amandoîn sciä l'ha ancon scrîto?
L'Amandoîn sciä l'ha finïo?
Quante cöse sciä n'ha dïto!
– Povë figge! son pentïo,
Ghe rispondo da Can vegio,
E m'attacco drito a-o Spëgio.

Cös'o gh'intra? – eh, scignorinn-e,
No me fæ da innocentinn-e
Perchè tanto serv'assæ,
Mi sò quanto pezæ!

E de ciù stæ ûn pö a sentî
Cös'ho l'animo de dî:

Son segûo che se ve fessan
Quest'offerta, e ve dixessan:
– Chi gh'è ûn majo fin d'anchêu,
Ma che spëgi o no ne vêu,
Cosicchè tutte e mattin
Ve spëgieì sott'a-o bronzin,
No gh'è dûbbio, scignorinn-e,
Che restiësci ancon fantinn-e,
Perchè ûn majo, l'è ben vëo,
Ve-o sciorbiësci tûtte a rëo,
Perch'o rende o coêu contento,
E o l'ammorta o rödimento,
– Ma o spëgiâse a tempo e a leûgo
Leva o coêu de d'in to fêugo

Seì a ûn ballo? – vegnî rôuze
Se no gh'eì de spëgi in gïo,
Che ve päi l'ûmasse[] bôuze,
Ve pä d'ese senza brïo
Per no poeìve amiâ o muccetto
Se l'eì ben sott'a-o frescetto,
Se ve scappa i piccaggin
Di ripieni, o di strassoîn.

Seì in Gëxa? – ve vortæ
T[u]tto o tempo da-e mammæ:
– Mïme ûn pö com'ho o colletto!
Assegûime ûn pö o frexetto!
Sta mantiglia a me ven sciù,
No me-a vêuggio mette ciù!

Intræ a-o Teatro? in t'ûn palchetto?
– No gh'è manco o so spëgetto! –
A l'è a primma osservazion
Che fæ fâ a quello mincion
Chi aviâ fæto, meschinetto,
Oltre a speiza do bigetto,
Chi sa quanto pe attrovâve
Quella seja forse a ciave!

Miæ un pö quante inconvenienti,
Che porrieìvan evitâve
Questi ommûssi, se ciû attenti
V'appaèggiassan da spëgiâve!

Ma lö invece, miæ ûn pittin
Che contrasto d'opinioîn!
Quande veddan che vegnî
In t'ûn scito tûtte lì
Cö cappūsso fêua da testa
Traversâ in mezo da festa

Dixan sûbito: – chi sà
Pe quant'öe a se sä spëgiä

Quell'antigo d'ûn Petrarca -
Finn-a lè^[sic] o piggiâva barca
Contro i spëgi, e o giastemmâva,
Se a so Laura a se spëgiâva,
E o dixeìva: – « Ve spëgiæ
« E de mi ve ne scordæ!
« Sono stecchi per li fianchi,
« Quelli spëgi micidiali
« Che in vagheggiar voi stessa avete stanchi! »

Ma bezêugna, a dî a veitæ
Che di spëgi in quantitæ
Sta sciä Laura a ghe n'avesse
Dappertûtto li davanti
Da stancâne coscì tanti!

Mentre, oh quante ghe ne sæ
De voî-atre, anche sposæ,
Che ghe dæsci ûn brassaletto
Per ûn spëgio a cavalletto!

Co-a gran modda tanto ciù
Di contûssi tûtto zù
Che ve crêuvan finn-a i pê,
E imbottii sorva o panè,^[sic]

C[']o sæ ûn gûsto proprio immenso
Poeìse amiâ per ogni senso!

Raxonando sorv'a-o spëgio
Mi tant'è ghe vegniæ vëgio!
– No gh'è tema in questo mondo
Comme o spëgio ciù fecondo
De matteje e de costûmmi
Da stampâ di gren volummi!
Perchè proprio han troppi pregi,
Scignorinn-e, i vostri spëgi.

Son l'exempio da caitæ,
Perchè quande ve spëgiæ
No ve dixan bello o brutto,
Ma ve lascian credde tûtto,
Tûtto quello che ciû pâ
Ne-a manëa d'ogni pensâ.

Se ogni vegia chi s'amïa
Se dovesse trovâ puïa
Tûtto o giorno pe a Çittæ,
Quanti sbraggi se sentiæ!

E poi anche o disgraziôu,
Non è mâ s'o l'è lasciôu,
Pe no dâlo ä despeazion
Ne-a so façile illûxion.

Son ascì l'exempio tûtti
Da virtù perchè son mûtti
Perchè lö no fan a spia
Mai ne-a mæxima famiggia
Quante votte se gh'amïa
Ciù a mammà, che a serva, o a figgia,
E no dixan a-o pappà,
C[']o se cöre a pëtenâ
De sprescion tûtte e mattin,
Tûtte e sëte, i vasettin
Che a moggê a ghe mette in notta
Sotto o nomme de carotta
De savoî, de pan, de vin,
E no contan tûtt'e öe
Che consûmma e so scignöe
Lì davanti a pëtenâse,
A vestîse, a despûggiâse.

Mi se penso a stì pappæ
Pövei ommi inverdûghæ
Vestii d'angeo coscì ben,
Oh che pæsta che me ven
Quande dixan – oh a mæ Din,
Mi no fasso anzi per dî,
Ma a travaggia dä mattin

Finn-a a l'öa d'andâ a dormî! –
E li tïan sciù a testa drita
Che ghe pâ d'aveìla dita!

Mi vorriæ saveì chi parla!
– Un che all'alba o s'incaminn-a,
E o no torna che a disnâ,
Per ch'o trêuva a scignorinn-a
Tûtta bella pëtenà,^[sic]
E in salotto a recammâ,
(Doppo ûn'öa ch'a sä levà)^[sic]
Con davanti o cuscinetto,
(Solo averto pe o spëgetto;)
Perch'o vedde a casa netta,
E i so abiti allûghæ
Co-e so cöse belle stiæ,
– Lè^[sic] o tïa fêua fîto a cannetta
E o se sciorbe dä moggê
Ch'a l'è a figgia chi fà lè!

Eh, mæ cäi, ghe vêu pazienza!
Queste moæ son a semenza
Da rovinn-a di figgêu,
Pe-o so stolido bon coêu!

Tanto ciù ä giornâ d'anchêu
Che pe effetto de progresso

Non è ciù o femmineo sesso
Destinôu a sopportâ
Tanto o giogo da mammà.

Che seì ben che pe-o passôu
L'ëa proverbio inveterôu
Che dovesse in te famigge
Tiâ o carretto sempre e figge,
Mentre i mascci ëan destinæ
A-e carezze de mammæ.

Nè mi intendo de dî mâ
De sto moddo d'operâ
Quando fosse stabilïa
Ma in sce-o serio pe -i figgêu
Quella giûsta scimetria
D'ûguaglianza e de bon coêu
Che dovieìvan sempre attenti
Conservâ tûtti i parenti.

Ma ä reversa mi me pâ
Che ciù sempre andemmo in là
Se veddiä l'edûcazion
Abolïa da l'ambizion;
– Nè mi posso pensâ megio
Che attribuîne a colpa a-o spëgio,

Quande e figge l'ëa proibïo,
Per non ese segnæ a dïo,
De poeì mettile in sce-o bêutto
Tûtto o ciù finn'a-i dixêutto,
Quelle figge, ean fortûnæ.
Perchè finn-a a quest'etæ
Stavan savie in ti so panni,
Nè sentîvan cresce i anni,
Finchè poi se presentavan
Tanto belle che innamoâvan,
L'innocenza a l'ëa con lö
Co-e graziette de l'amô;
Brave donne, brave moæ
Diventavan da majæ,
E se andavan a spëgiâse
N'ëa ciû miga pe adûlâse,
Perchè i anni do giûdizio
Ghe mostravan che o caprisio
De paeì belle se nö son
L'ëa unn-a sciolla pretenscion.

Ma sti pövei bambinetti
Smaliziæ da-i discorsetti
Do galante e da sposâ
Che da-i grandi sentan fâ;

Sti pettûssi de figgette
Da pattælo e da braghette
Che se veddan passeggiâ,
Tiâ sciù o naso, presentâse
Dappertûutto e o c..... locciäse,
Corrî apprêuvo a-i zovenotti,
Fâghe a caccia in ti salotti,
E in famiggia fâ tremâ
Serva, fræ, pappà e mammà,
Comme diascoa pêuan vegnî
Bonn-e moæ per l'avvegnî?

Coltivæ a ûn edûcazion
Oltre a sfera do so ton,
Pövë vittime da coæ
Ambiziosa de mammæ
Che se pascian de mostrâle,
De parlâ zà de majâle,
Stan da-o spëgio – e se pän belle,
Ghe pâ d'ese tante stelle,
Comme sän forse realmente
Pe-a so anima innocente,
– Ma ancon prive d'esperienza
Ghe pâ eterna a so avvenenza,
E che i ommi pe sposâle

N'aggian atro che d'amiâle,
Coscì ognûnn-a s'incaminn-a
Con sto moddo ä so rovinna!

Vegno dunque ä conclûxion,
Che me pâ che segge o Spëgio
Comme ûn libbro grammo e bon
Ch'o pêu rende pezo e megio
Se chi l'arve pe stûdiâ
L'è ciû attento a-o ben, o a-o mâ.

Scûzæ tanto, Scignorinn-e
Se v'ho fæto da pappà,
Ma gh'eì çerte cösettinn-e
Ne-a manëa do vostro fâ
Che ogni bestia chi v'amïe
No pêu reze senza rïe;
Son difetti che conven
Criticâi pe-o vostro ben.

Quindi mi pe dimostrâ
Che no parlo pe voeì mâ,
Vêuggio dâve o gran segretto
Da speranza do majetto;

Nè ve diö che lascæ o piano,
Che lascæ d'andâ a ballâ,
Ma o l'è ûn verso in bon toscano

Che o poeì sempre recitâ,
Gran riçetta pe aveì majo:
– L'ago, il fuso, e l'Arcolajo.