Esopo Zeneize 1822/O Ratto in ta Formaggia, e o Gatto

by Martin Piaggio

←A Vorpe, e a Beccassa

Esopo Zeneize de Martin Piaggio O Ratto in ta Formaggia, e o Gatto

O Cavallo Ministro→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.
In notta e diferençe co' l'ediçion do 1846.

FOA XLV.

O Ratto in ta formaggia, e o Gatto.

Un-na votta un-na Camêa,
Meza cêuga^[1], e despensêa,
A sentiva remesciâ
In despensa, e rozziggiâ,
A se mette in aguaitêua^[2]
Da-o pertûso da ciavêua,
A descrêuve un bello Ratto
Chi mangiava^[3] un-na formaggia,
Tutta pin-na alloa de raggia
A cammin-na a piggiâ o Gatto,
E ghe o særa presto drento,
Rodilardo ben contento,

Coraggioso acciappa o Ratto,
E ghe dà presto^[4] recatto,
Poi co mæximo coraggio
Mangia o resto do formaggio.

Quanti, e quante ghe son,
Che pe' ignoranza, e senza riflexion^[5]
A-o mâ vêuan rimediâ
C'un rimedio ciù pezo assæ do mâ!

1. chêuga
2. aggueitêua
3. sgrannava
4. Ghe dà sûbito
5. riflescion