Esopo Zeneize 1822/O Cavallo Ministro
| ←O Ratto in ta Formaggia, e o Gatto | Esopo Zeneize de O Cavallo Ministro |
A Scimia, o Gatto, e o Spegio→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
O Cavallo Ministro.
Quando e Bestie se piccavan
D’êse giuste, e raxonavan
Comme i Ommi ciù assennæ,
No sò ciù in te che Çittæ,
Sotto o regno fortunôu
De Leon primmo tanto amôu
Un bellissimo[1] Cavallo,
Fedelissimo[2] vassallo,
Ancon ben de fresca etæ,
Pe-a so grande abilitæ
O fû eletto da-o Regnante
So ministro, e governante.
Questa cosa a ghe fè onô,
E pe-o paize o fè furô:
Basta dî che ogni Animâ
Se gh’andava a rallegrâ,
Fava parli ognun de lê,
Con portâlo a-i sætte Çê,
E de seja, e de mattin-na[3]
O l’aveiva a casa pin-na;[4]
Aoa l’Aze, chi o leccava,
Aoa o Bêu, chi l’adulava,
Gatti, Chen, Lovi affammæ,
Tigri, e Vorpi in quantitæ;
Tutti i giorni senza fallo
Gh’ea cocagna da-o Cavallo,
Se mangiava, se beveiva,
E nisciun ninte spendeiva;
O Cavallo o se sciallava,
Che de cêu[5] ste cose o fava;
Ma fortun-na, chi è incostante,
Ao levò da governante,
E per causa d’un bûffon
O cazè in disgrazia a-o Leon:
O perdè l’impiego, e un Lô
O fû eletto a tanto onô;
E lì subito i sò amixi,
Diventon tutti nemixi;
Chi o passava pe' ignorante,
Chi dixeiva, o l’è un birbante,
E de tanti, ch’o n’aveiva,
Manco l’Aze o[6] diffendeiva,
Anzi i ciù benefichæ
Diventon nemixi zuæ.
Povea bestia de Cavallo!
Per calunnia cheito in fallo,
No trovando un Gatto, un Can
Chi ghe desse un pö de pan,
O finì per porze a sampa.
Così[7] vedde anchêu chi campa;
Fin che l'Ommo hà di dinæ,
O l'hà amixi in quantitæ,
Se per caxo o ven despeôu,
Scentan tutti, e o l'è schivôu.