Esopo Zeneize 1822/O Cöu, e a Farfalla

by Martin Piaggio

←A Crava, e o Lô

Esopo Zeneize de Martin Piaggio O Cöu, e a Farfalla

O Leon, e o Ratto→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.

FOA VI.
O Côu, e a Farfalla.

Un-na Farfalla bella,
Luxente ciù che l’öu,
Sentindose appettitto
A se posò sc’un cöu,

Ma in to sussâghe e fêuggie,
Come angosciâ, a sbraggiò:
Ohimè! che odô cattivo!
Che savô brutto! ohibò!

A questo complimento,
Ghe disse o Cöu piccôu,
Farfalla ti ê vegnûa
D’un gusto delicôu!

T’ho conosciûo piccin-na
Non così ben montâ,
Quando un-na gatta ti êi
Te davo da mangiâ,

Oh comme ti gustavi
Alloa tutte e mæ fêuggie!
Ma de cangiâ de stato
Ti æ ascì cangiôu de vêuggie,

Vattene, sconoscente,
Ma no te stâ a scordâ,
Che un giorno ti porriesci
Ancon Gatta tornâ.

O voi, che anchêu per caxo
Seì ricchi ciù che vêi,
N’alsæ tanto de naso,
Arregordæve chi êi,
E a chi seì obblighæ
Ingrati no seggiæ.