Esopo Zeneize 1822/O Leon, e o Ratto
| ←O Cöu, e a Farfalla | Esopo Zeneize de O Leon, e o Ratto |
O Falchetto, e a Formigoa→ |
| Zena, Stampaja Pagan, 1822 - Primma ediçion e en stæti reixi con êu e ôu. |
O Leon, e o Ratto.
In questo mondo, amixi,
Besêugna fâ do ben
Finna ai nostri nemixi,
Perchè ben spesso ven
Che o grande, e chi pêu spende
Da chi è piccin dipende,
E o forte, e o coraggioso
Da-o debole, e spuioso,
E ve ne convinçîò
Co-a foa che ve contîò:
Scappava un giorno un Ratto
Perseguitôu da un Gatto
Corrindo in strambaelon,
E tanto o caminò,
Meschin! che o se trovò
Sotto e zampe do Leon,
Che in cangio d'ammazzâlo,
Con affabilitæ
O se misse a leccâlo,
E o ghe dé a libertæ.
O Ratto o l’andò via
Tutto pin d’allegria,
Nè mai o se scordò
A generosa azion
Ch’o riçevé da-o Leon,
E un giorno ch’o passò
A caxo da un boschetto,
O vedde là accuegôu,
E tutto ingarbuggiôu
O Leon in t’un sorchetto,
Ruggindo a ciù no dî
Senza poêine sciortî,
O s’accostò cianin,
E con i sò dentin
E maggie o roziggiò,
E o desse a libertæ
A-o Leon ch’o ringraziò
Con dî patt'e paghæ.