Esopo Zeneize 1822/O Falchetto, e a Formigoa

by Martin Piaggio

←O Leon, e o Ratto

Esopo Zeneize de Martin Piaggio O Falchetto, e a Formigoa

O Roscignêu, o Fanetto, e o Figgiêu→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.

FOA VIII.

O Falchetto, e a Formigua.

Un giorno gh’ea un Falchetto
A beive in t’un laghetto,
Ghe và un-na Formiguin-na
A beive, ma meschin-na
L’ægua a se a porta via,
A l'ea lì per negâ,
O Falchetto l'ammìa,
Caitæ! ghe ne fà mâ,

O piggia un-na fêuggin-na,
O a caccia in to laghetto;
Quella a se gh’arrampin-na,
E comme in t’un gozzetto
Navegando a l’arriva
A salvamento ä riva,
E a vedde lì un Cacciôu
Descàso zà impostôu
Cö scciêuppo chi s’affìa
Per ben piggiâ l’ammìa
A-o Falchetto chi sgêuava,
O l’ea lì ch’o scrucciava,
Presto a gh’addentò un dîo
De pê, ch’o bûttò un crìo
Sbraggiando tanto forte,
Che ô Falchetto ô sentì,
E giandose ô scrovì,
Così o scappò dä morte.