Esopo Zeneize 1822/O Roscignêu, o Fanetto, e o Figgiêu

by Martin Piaggio

←O Falchetto, e a Formigoa

Esopo Zeneize de Martin Piaggio O Roscignêu, o Fanetto, e o Figgiêu

A Çerva, e a Vigna→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.

FOA IX.

O Roscignêu, o Fanetto, e o Figgiêu.

Un Roscignêu, e un Fanetto,
Ean tutti dui in prexon
In t’un-na bella gaggia
Appeisi da un balcon;

O Roscignêu o passava
A raggia con cantâ,
Cacciando çerti trilli
Da fâ strasecolâ;

In casa, e fêua de casa,
E gente che passavan
A quello bello canto
Co-a bocca averta stavan.

A-o Figgio do Patron,
Asperto Ragazzetto,
Ghe vegnì un giorno vêuggia
D’avêi quell'Oxelletto,

Da sò Pappà camin-na,
Se mette a fâ o sappin
Baxandolo, o ghe dixe,
Vorriæ quell’Oxellin.

Scì cao, Pappà rispose,
Te o dò^[1], ma ti l’aviæ,
Se in gaggia o bravo mûxico
Frà i dui ti distinguiæ:

O chin-na a gaggia in tæra:
Eccoli chì, ti pêu
Çerne e piggiâ, o ghe dixe,
L’Oxello, che ti vêu.....

O i squaddra tutti duì,
O vedde o Roscignêu
Co-e ciûmme brutte, e scûe,
Quello piggiâ o no vêu,

O vedde incangio e belle
Ciummette do Fanetto:
Scialla! o l’è questo, o dixe,
O bravo mûxichetto;

O l’arve a porta ö piggia,
Ma appen-na o l’è sciortîo,
O Roscignêu d’in gaggia
Ghe caccia un barbacîo,

E o canta çerte notte
Flebili, e delichæ,
Che paiva, ch’o dixesse:
Un torto ti me fæ;

A vedde o Figgio allöa
Pin de vergêugna^[sic], e raggia
Ammiâ fisso, e confûso
L’atro Oxelletto in gaggia

Giâse a-o Pappà cianzendo,
Chi rieiva a ciù no dî,
Ma che o ghe disse: Figgio,
Impara, e stà a sentî:

Non creddi all’apparenza,
Perchè a te pêu ingannâ,
E da-o vestî ch’o porta
L’ommo non giudicâ.

1. ed. 1846: dö