Pagina:Esopo Zeneize 1822.djvu/15

Da Wikivivàgna

Ma a Cravetta prevegnûa,
D’arvî a porta a no se cûa,
A l’aguaita[sic] dä fissûa
   Per cûxitæ;

E lì a vedde o Lô chi ammîa,
A tremava un pö dä puîa,
Ma a ghe disse: « Lô, va vîa,
   Che ti ê scoverto. »

Alloa o Lô (rispose): Brava!
Questa chi no l’aspettava;
Vaddo, ma t’aspêto, Crava,
   In to deserto.

Eive chi cose vêu dî,
Bælle Figgie, d’eseguî.
Cose dixe so Mammà:
Chi obbedisce mâ no fà,
Se a Cravetta a-o Lô a l'arviva,
Povea lê! o se a mangia viva.

FOA VI.
O Côu, e a Farfalla.



Un-na Farfalla bella,
Luxente ciù che l’öu,
Sentindose appettitto
A se posò sc’un cöu,