Chittarin zeneize 1881/253 Scherço

by Martin Piaggio

←Diallogo

Chittarin zeneize de Martin Piaggio Scherço

Strofoggio→

SCHERSO ¹

I zûgoeì do goffettin
In speziaia a-o sciô Bonin.

Sciô Gaitan riveritiscimo,
Padron nostro stimatiscimo,
Se piggemmo a libertæ
De spedîghe pe-o Peccetto,
Messaggê da societæ,
Sto reginico biggetto
Per pregâlo a voeì graziâne,
Favorine, ansi accordâne
Quella tale romansesca
Bella stansa ajosa e fresca,

Dove se sta tanto ben
Per vegnîghe a consûmmâ
Ûn pûpillesco disnâ
Martedì, o primmo che ven.

Con raxon scià deve dî
Ch’emmo proprio a faccia rotta,
E che grande è o nostro ardî
Per vegnî a seconda votta
A streppâghe, a ûso Checchin,
Quello tale sûnaggin.

Ma, se noi semmo sfrontæ,
Scià n’incolpe a sò bontæ
Che a l'è grande a ciù no dî
E a sorpassa o nostro ardî;

Onde voemmo lûxingâse
Che scià vorriä ben degnâse
D’aderî ä nostra domanda;
Ma con patto e condizion
Stabilïa, sine qua non,
Che a se gh’intima e comanda
De vegnî co-a sò personn-a
A formâ bella coronn-a
E onorâ o nostro pransetto,
Che coscì o parriä ûn banchetto.

Ricûsando, no vegnimmo,
E sò grazie n’accettemmo;
Ma che sciolli!... cöse dimmo?
Scì vegniemo... ché veddemmo
De ritorno zà o Peccetto,
Ranghezzando per fâ fïto,
Con a sò risposta in scrïto
Favorevole a-o biggetto.

Bravo! Evviva! o ringraziemmo,
Sciô Bonin, e gh’assegûemmo
Che passiemo ûnn-a giornâ
D’allegressa e gironia
In geniale compagnia
Fra o bon pitto e o bon trincâ.
   
Ch’emmo tanto da sbraggiâ
E coscì forte da rïe
Che vegniä zù tante prïe
Da impî quattro casce in mâ.

E con questo, scignoria,
Se ghe fa gran riverensa.
Martin Piaggio, pe incombensa
Da goffesca compagnia.