Cava in to remoin 1930/A TRAMONTANN-A

Da Wikivivàgna
In to remoin de Gioxeppe Cava
A tramontann-a

[p. 32 modifica]A TRAMONTANN-A

Che bellessa andâ pe Sann-a
quando o sciûscia a Tramontann-a,
fra pûvioin pin de moinelli
e regatte de cappelli,
che ghe dan pe andâ ciû forte.
Xêuan de ciappe, sbattan porte,
cazzan veddri con fracasso,

[p. 33 modifica]

se scadenn-a Satanasso.
Vegnan zû di fûmaiêu,
ve s'addescia ö battichêu.

Da ogni parte a v'assalisce
ve maschezza, ve inorbisce,
ve scigôa drento de oëge,
ve solleva comme nëge,
v'intra sotta, a taggia o sciôu...
Ah, che vento maedûcôu!

Se a l'incontra de scignôe,
pä a se treppe, a se demôe,
in to tiaghe sciû e röbette,
seggian vëge o zovenette.
A-e descrêuve finn-a a-a schenn-a,
a-e scarpenta, a-e despëtenn-a;
a no-e lascia camminâ,
da-o despëto a-e fa sbuttâ,
specie se, pe mala sorte,
han de gambe magre o storte.
Che bellessa andâ pe Sann-a
quando o sciûscia a Tramontann-a!
Feûa de ciongio se camminn-a,
spalle avanti, a testa chinn-a,
e ve tucca puntâ i pê
se no voei andâ inderê.
Ronsa, ronsa, Gioaninetto,

[p. 34 modifica]

va de boenn-a, fa ûn passetto;
se fatiga andâ pe Sann-a
con sta brûtta Tramontann-a.
Se de puppa ve a trovae,
cai figgiêu sei rovinae.
A ve spuncia cö vigore
de 'na macchina a vapore:
ve fa fâ 'na maratonn-a
con i pinci e a no mincionn-a,
né a ve lascia, né a s'arrende
fin che in taera a no ve stende.

Dio v'avvarde quando o ciêuve!
no gh'é ninte chi ve crêuve.
Se arvì ö paegua a l'incappella,
a ve o sguara, a ve o streppella,
a ve lascia in man ö bacco,
e restâe ûn macacco.
No gh'é ninte che ghe a posse
a ve bagna finn-a a-e osse,
scicché quando tornae a câ
parei gente cheita in mâ.
Che bellessa andâ pe Sann-a
quando o sciûscia a Tramontann-a!