Cava in to remoin 1930/LIETO EVENTO

by Gioxeppe Cava

←A tramontann-a

In to remoin de Gioxeppe Cava Lieto evento

A di ninnoli de stoffa→

LIETO EVENTO

A bönn-a donna rossa e sorridente^[1]
a l'ha criôu allegra: – A l'é ûnn-a figgia!
ûnn-a biöndinn-a!... sciâ no se lamente
a reginetta a siâ da sêu famiggia.

Sciâ mie comme a l'é snella, a pä ûnn-a sbiggia;
a l'é ûn pommin de rêuza veramente...
sciâ a lasce cresce e sciâ veddiâ che figgia,
con 'sta faccetta rionda e promettente.

Sciâ l'é impaziente de piggiâla in brasso,
de däghe dui baxin?!... ma sciâ l'aspete,
finiscio de fasciâla e poi ghe a passo,

coscì sciâ se estaxiä de sêu graziete...
Va, popponinn-a, va con quest'ommasso,
se o no te piggia ûn po' no l'ha ciû quete! –

1. Bönn-a donna: levatrice, dal francese sage-femme.