Bolle de savon/Stemmo all'occi
| ←Ninna-nanna | Bolle de savon de Stemmo all'occi |
Nêutte de San Giambattista→ |
Anchêu, no l'é o momento
de sciati e de demöa:
scin che no molla o vento
e no se carma o mâ,
no canta e no scigöa,
ma vigila o majnâ.
Anchêu, no se tïa fêua
pe-o brindixi a bottiggia;
scin che ghe dà a gragnêua
e picca a saeta e o tron,
l'ortoan o se beziggia
e o spëta o tempo bon.
Manco se fa a farfalla
chi treppa in mëzo ä lûxe:
scin che con l'êuggio ä stalla
gïa pin de famme o lô
no stà a scrollase e prûxe
nì o can e nì o pastô.
L'anima a segge teiza
comme ûnn-a corda, e segge
a lampa sempre aççeiza
da Patria in sce l'artâ,
e con amô se vegge
a-o monte, a-o cian, a-o mâ.
Poi... faemo Pasqua vëa:
saan furgai, saan lûmetti,
terrasse co-a bandëa,
saa Fasce tûtto ûn fôu;
spariemo i mortaletti,
balliemo in mëzo a o prôu:
portando ramme d'oiva
cantiemo gloria e osanna;
tornian e feste e i Viva!
andiemo a Cianderlin,
torniâ a çigaa in sciä canna,
e a-o peì torniâ Martin. -
1916.