Bolle de savon/Nêutte de San Giambattista
| ←Stemmo all'occi | Bolle de savon de Nêutte de San Giambattista |
Natale in tempo de guaera→ |
Nêutte bella, nêutte pinn-a
de fragranse di giardin,
de fragranse da collinn-a,
de terrasse e di barcoîn!
nêutte de zûgno schillente
ch'a l'invita a stâ de fêua,
e in ti viali all'Accassêua
andâ in gïo, soli, con lê,
con lê, soli, in gïo, a braççetto,
e sentî de sotto a-e ciante,
con l'odô do limonetto,
a peschëa che pâ ch'a cante,
con lê soli, in mëzo â gente
comme spersci in t'ûn deserto,
e lì a-o fresco, e lì all'averto
contâ e stelle che l'é in çê.
Nêutte bella! - in sce l'artûa
lûxan case e palassinn-e,
lûxan in te l'äja scûa
e ciaebelle bordellinn-e:
dove gh'é lampa o candeja
gh'é o Battista in te ûnn-a niccia;
no se sbaglia, gh'é ûn Baciccia
dove l'é aççeizo ûn falô,
dove fischia o fûrgao, biscia
luminosa chi va sciù,
fêugo, sciamma, lûxe, striscia
che poi cazze morta zù,
dove rompe o scûo da seja
ûnn-a riga de lumetti,
ciarle, canti, sorrisetti
da-i barcoîn, sotto a-i bersò.
Nêutte bella! - dixe a nonna
che se sente pe-a cittae,
in sciö tardi ûn lûo de donna
che terrô mette e pietae...
che se sente - dixe a nonna -
passâ in äto, a sghêuo, a Miodinn-a,
e ûnn-a voxe dî: - camminn-a...
... camminn-a....