Bolle de savon/Natale in tempo de guaera

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Natale in tempo de guaera
[p. 105 modifica]
Natale in tempo de guaera

Ûnn-a votta Natale e poexia,
ö san tûtti, vegnivan a taggio;
comme saeiva campann-a e battaggio,
fûzo e rocca, pestello e mortâ.

O portava sto giorno ûnn-a notta
tûtta sò, - casalinga, de paxe;
de raoxie no restava che e braxe...
ma scentavan do tûtto a disnâ.

E in famiggia, co-i pê sotta ä töa,
ûn campava, in te ûn giorno, çent'anni,
e o dixeiva: - no gh'é tûtti i danni
se no manca ûn bon gotto de vin,

se i figgiêu vegnan sciû a vista d'êuggio,
e - che miäcoo! - a moggê a no tarocca,
e se intanto che ciêuve e che fiocca
gh'é de legne e m'ascâdo a-o camin. -

Za pe tempi, se fava chì a Zena,
ûnn-a festa ciù grossa, ûn ravaxo;
se portava o confêugo a «Paraxo»
e «a ro Dûxe» parlava l'«Abbôu».

[p. 106 modifica]

Cöse vëgie do mille trexento...
e a contâvele manco me metto:
pe menûo ve ne parla Çervetto
in te ûn libbro da ûn pesso stampôu.

Ma a poexia de natale pe st'anno
a l'ha perso a fragransa de primma:
a l'ëa sciamma: a no l'é che ûnn-a zimma
in ta çenie do nostro fogoâ:

a s'asconde, a se strenze, a zemisce,
affreidoîa, mucca, nescia, zenziggia;
a n'ha ciù posto in casa: - in famiggia
gh'é ben ätro da dî e da pensâ.

Gh'é da leze giornali e dispacci,
aspëtando ûnn-a bonn-a notizia:
- s'é piggiôu l'ätro giorno Gorizia?...
Trento e Trieste ë piggiemo doman.

Aegua, neive, aççidenti, malanni,
non han preiza in sce-o nostro sordatto:
pä c'o l'agge cö diao faeto ûn patto;
e nîsciûn pêu guägnâghe de man.

Vëo! - bezêugna però arregordase
che no manche l'aggiûtto civile:
chi no dà e sò palanche l'é ûn vile,
e o meitjae de Balilla a sasciâ.

[p. 107 modifica]

Bêussai! bêussai! zeneixi, e poi torna
bêussai! bêussai! pë scarpe, pe-a lann-a;
giorno e nêutte se sêunne campann-a
a martello pe acchêugge dinâ.

Tutto quello che andava in leccaja
in pandosci, candii, gobelletti,
vadde in mûande, cäsette, corpetti,
in... no sò, ma sò ben che capî:

e i figgiêu diggan tûtti a-e sò gente
pe quest'anno no voemmo demôe;
diggan: no voemmo modde, e scignôe,
pe no fäse da-o mondo scöxî.

Vegniâ giorno... mi o spero, mi o sento,
che aviâ faeto l'Italia promëa,
che in sce Trento e Trieste a bandëa
se portiâ da-o sordatto italian.

Che natale, zeneixi, quell'anno!
ritorniemo a-e ûsanse de primma...
Aoa intanto co a povia mae rimma
fasso ûn brindisi a-o nostro doman!..

1916.