Pagina:Malinverni C. Bolle de savon 1921.pdf/105

Da Wikivivàgna
Natale in tempo de guaera

Ûnn-a votta Natale e poexia,
ö san tûtti, vegnivan a taggio;
comme saeiva campann-a e battaggio,
fûzo e rocca, pestello e mortâ.

O portava sto giorno ûnn-a notta
tûtta sò, - casalinga, de paxe;
de raoxie no restava che e braxe...
ma scentavan do tûtto a disnâ.

E in famiggia, co-i pê sotta ä töa,
ûn campava, in te ûn giorno, çent'anni,
e o dixeiva: - no gh'é tûtti i danni
se no manca ûn bon gotto de vin,

se i figgiêu vegnan sciû a vista d'êuggio,
e - che miäcoo! - a moggê a no tarocca,
e se intanto che ciêuve e che fiocca
gh'é de legne e m'ascâdo a-o camin. -

Za pe tempi, se fava chì a Zena,
ûnn-a festa ciù grossa, ûn ravaxo;
se portava o confêugo a «Paraxo»
e «a ro Dûxe» parlava l'«Abbôu».