Bolle de savon/A mosca gianca

Da Wikivivàgna
Bolle de savon de Carlo Malinverni
A mosca gianca
[p. 108 modifica]
A mosca gianca

Dopo aver letto La mosca bianca
ne «Le Avventure» di A. Varaldo.


L'ommo chi se fa scrupolo
do citto e da palanca,
se dixe... in mëzo a-e birbe,
ch'o l'é ûnn-a mosca gianca;
e in zù, dove se traffega,
s'o no l'é riverïo,
o ven, comme ûn fenomeno,
segnou da tûtti a dïo.

Coscì, ûnn-a bella zovena
che a societae a frequente,
dove tra i fiori e e fêugge
all'occio stà o serpente,
se a resta pûra e vergine,
se all'onestae a no manca,
dixan, no poendo punzila,
ch'a l'é ûnn-a mosca gianca.

Fra i maoxi da politica,
e in mëzo a-i çinqueçento,
chi no se doggia e ceiga
a ogni bava de vento,

[p. 109 modifica]

chi a sò tempo i prinçipii
no passa sotto banca
e no ha a conscensa elastica,
o l'é ûnn-a mosca gianca,

che in compagnia di fùccai
a fa vegnî da rïe...
ma e mosche gianche, diamine!
se contan in scë dïe:
son l'eccezion ä regola,
e son l'avvenimento...
Scialla! se ne ne capita
ûnn-a de semm'in çento.

De sti tempi creddeivimo
de veddila xoâ,
vegnûa dä taera libera,
vegnûa de là do mâ:
ma aveivimo e traveggole
e a testa in to ballon,
perché, tûtti, beveivimo
a-o maeximo pirron.

A-o sò arriva in Portoja
o chêu o ne se spalanca
comme ûn portâ: - l'America
a manda a mosca gianca! -

[p. 110 modifica]

Fà ûn manifesto o scindaco,
i conseggê son cädi;
guanti, marscinn-e, brindixi,
gran sciäto in ti meicädi.

Che imbriaegatûa! - ma in cimbali,
se sa, no se raxonn-a;
se vedde doggio e storbio,
pä tûtto monaea bonn-a;
manco se vedde a vorpe
tegnûa sotto l'ascella,
pä fêugo ûn pö de fosforo
a-o cû d'ûnn-a ciaeabella.

E lì, con quattro ciaccere,
l'ommo o l'ha faeto celo;
e i sò quattorze articoli
ne son parsi o Vangelo.
Dà in to sorchetto o merlo
a-o canto do reciammo,
e in mëzo a-e aegue storbie
o pescio o resta a-o lammo.

Vangelo?! - e no pensavimo
che ciù eterno do bronzo
in casa noî l'aveivimo,
che l'âtro o n'ëa che ûn fonzo,

[p. 111 modifica]

loffa de lô, crittogama
che quande a taera a sbogge
a spunta.... e pâ imposcibile,
tûtti emmo daeto in c...e.

Ma a mosca gianca a capita
solo de semm'in çento;
a l'é eccezion ä regola,
a l'é l'avvenimento;
s'é visto sto miracolo
e o s'é ciammôu Mazzin....
Ma o miacoo o no so replica:
o dîva Paganin.

Lezzendo e belle pagine,
Sandro, do tò volûmme,
me scordo tutto: ― nûvie,
troîn, lampi, bolezûmme,
vesce e veschighe, ― e l'anima
avvegiornïa e stanca,
a sente sempre o fascino
da nostra mosca gianca. -

1917.