Bolle de savon/"Baciccia" a-i sò de casa
| ←A mosca gianca | Bolle de savon de "Baciccia" a-i sò de casa |
Sangue bon....→ |
I mae cäi vëgi! Bêutto zù quattro paole in croxe,
che sän pe voî, pe tûtti, comme o dinâ da noxe:
lezeìle queste paole do vostro caga in nïo,
e poi, tûtti, all'Italia, fae ûn brindixi granïo. -
Me sento intorno, mentre scrivo, ûn gran sbatte d'äe:
seì voî, memoje belle?... seì voî, memoje cäe?...
Portae ûn odô, chi scampa, de pan doçe e d'öfêuggio....
Vegnî a sciammi! - savesci o ben che mi ve vêuggio!
vegnî! savesci o vostro ciccioâ comme o fà ben!
comme me godo a quello: - Baciccia, te sovven?!...
Strenzo i êuggi e me lascio trasportâ dä corrente
de memoje: e ve veddo tûtti, tûtte e mae gente,
a mae Zena, a mae casa là in çimma de in-o-Prion,
e in faccia ûnn-a figûa de zovena a-o barcon...
Ma poi me sveggio e diggo: - Baciccia, no bezêugna
che ti te lasci vinse dä commoscion: - verghêugna! -
T'ë ûn sordatto d'Italia, Baciccia: - ûn grixo-verde
no segge mai che d'animo comme ûn figgiêu o se perde:
a tò casa a l'é bella, ma a sä ciù bella quande
sä libera l'Italia, - a nostra casa grande:
i to paenti... a galante... ti ghe vêu ben segûo...
da-e ciöte di nemixi mettili ti a-o segûo.
Fin che o tedesco, con êuggio de porco, o mïa
l'Italia, - sciù, Balilla! drito in pê co-a tó prïa.
Ah! pellegramme, dunque l'Italia a ve fà göa?...
Vegnî, sentieì che mûxica, e veddieì che demöa,
Comme pensae a n'é cösa tanto façile e liscia:
möri de scimmia, in casa nostra no se ghe p....
En belle ste valladde.... l'é fertile sta taera....
guaera a-i tedeschi quande vêuan röbânele, guaera!
Questa a parolla d'ordine: - indietro; no se passa!
daeghe a-i barbari e a-i laddri! - indietro; no se passa!
Se ancon in zù vegnissan queste facce proibie,
sae mëgio mille votte, ve-o zûo, moî chì, per die!
comme o mae povio Steva c'o l'ha sentïo 'nn-a fïta
a-o chêu, e o m'ha dito: baxime, Ciccia,... addio! viva l'Ita...
e o m'è morto in te braççe: - bravo zoenotto! l'ho
poi misso sottotaera... Paxe all'anima, sò. -
Ma, mae cäi vëgi, staeme allegri: - ho ûnn'idea fissa:
vêuggio portâla a casa mae questa mae pellissa,
doppo però aveì visto scappâ questa canaggia,
e vêuggio in sciö cappotto grixo-verde a medaggia. -
Gh'é ancon, se dixe, a Zena di tedeschi e de spïe,
ma spero che in Portoja ghe segge ancon de prïe. -
Lezeìle ste parolle do vostro caga in nio,
e poi, paenti, all'Italia fae ûn brindixi granïo,
ch'a l'agge o vento in poppa, che no ghe manche a diccia;
e a veise presto: allegri! bonn-e feste.
1917