Bolle de savon/Ninna-nanna

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Ninna-nanna
[p. 99 modifica]
Ninna-nanna

Oxellin, ti ë sensa ciûmme,
agnellin, ti n'hae de lann-a;
l'é giassôu l'aegua do sciûmme,
sciûscia freida a tramontann-a;
ma in ta grêuppia, in mëzo a-o fen,
cäo bambin, ti ghe stae ben,
in ta grêuppia da cabanna
ti fae a nanna.

Ti fae a nanna savio: - arriva
tanti angieti poi da-o çê,
e i pastoî vegnan co-a piva;
sà i zeneixi e sà i foestê
che o mae bae, che o mae figgiêu
o l'é chì tra l'aze e o bêu,
o l'é chì in te ûnn-a cabanna
c'o fa a nanna.

[p. 100 modifica]

Con staffê, servitoî, paggi,
con tambûi, trombe, cavalli,
vegniâ scinn-a i trei remaggi
de dä lunxi: - che regalli!
che bomboîn! e quanti boâ!
e ûnn-a stella a se pösiâ
proprio chì, sorva a cabanna...
cäo, fa a nanna.

Che in to sêunno ti no posci
vedde che o dinâ da noxe!
poi,... l'é tûtto bricchi e fosci...
poi... gh'é Giûdda, poi... gh'é a croxe…
ma vortandose inderrê
arrivae in fondo a-o sentê,
resta ancon questa cabanna...
cäo, fa a nanna.