Bolle de savon/Chitarata

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Chitarata
[p. 142 modifica]
Chitarata

No gh'é ciù quello sciäto d'ûnn-a votta,
e a çittae a no l'é ciù coscì affestâ:
o poeta o l'é ûn bricchetto sensa botta;
ghe dixe a mûza: ti pêu andâ a spigoâ. -

E o poeta o gïa pë stradde alluveghïo,
o va de chì e de là, de sciú e de zù...
ste feste no ghe dan ciù quell'asbrïo,
e e rimme d'öu che vaeivan ûn Perù:

a gente a l'ha pe-a testa de lûçïe,
e co-a testa son tûtti in to ballon;
ben che a vadde, lê o fà vegnî da rïe:
cöran tûtti a-o reciammo do milion.

Veddeili! - pâ che vaddan in scï sgampi,
e se creddan toccâ co-a testa o çê....
vitta!... röso!... che passe sti falampi,
ste ciaebelle cö fêugo in to panê.

Sti pighêuggi infainae, queste vescighe,
lascemmoli ballâ o pelligordin;
e noî fedeli a-e costumanse antighe
stemmo a-o cäso do peì comme Martin.

[p. 143 modifica]

Portemmo a casa e ramme dell'öfêuggio,
comme l'han portôu sempre i nostri poae:
ma i bomboîn, ma e demöe costan ûn eûggio;
bezêugna, cäi bambin, fäla co-a coae.

O l'é ùn desgûsto grosso, e l'é ûnn-a croxe
o veddive fissâne, comma a dî:
- o ven scí o no questo dinâ da noxe? -
e da-i nostri figgiêu fäse scoxî.

Scinn-a o pandoçe che se fäva a Zena
coscì bon cö zebibbo e co-i pignêu,
o l'é scentôu dä natalizia scena:
scialla! se gh'é do pan de revezzêu....

Ma lascemmo che o tempo o tesce e o fïe;
doppo a boriann-a lûxe torna o sô,
doppo zenâ ven a stagion de muïe,
e doppo e spinn-e l'é ciú bella a sciô!....