Bolle de savon/E Terrasse de Zena

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
E Terrasse de Zena
[p. 144 modifica]
E Terrasse de Zena

a Amedeo Pescio
che volle da me acquerellato
questo quadretto genovese.

«Pe ri teiti dre ville hemo
«senza insì de Zena fuò.
«Quando in sciä terrassa semo
«d'ëse in villa dì se po’
«e in te l'horto e a Zena e in chà.
Dixe ancon Poro Foggetta:
«in te questa mae villetta
«a mae reixe chiantà stà.»

Pe-o zeneize l'é a terrassa
dunque, villa orto giardin:
in sciö teito lê o se passa
e ciù belle öe da mattin,
quando a fresca aja do mâ
a recùvea e o chêu a recilla,
quando tûtto intorno brilla,
fiori e fêugge, de rozâ.

Fà piaxeí quello stâ apprêuvo
a ûnn-a sciô, all'insalattinn-a;
in to nïo trovâghe l'êuvo,
e sentî cantâ a gallinn-a;

[p. 145 modifica]

andâ intorno cö stagnon,
dâ da beive all'ortiggiêu,
dove gh'é pe-o menestron
quattro puisci e sei faxêu:

vedde o livio co-a giamella,
cö porsemmo o baxaicò;
vedde o baico, e a campanella
sciù pë canne fâ bersò:
ecco a rêuza che tremâ
fà d'amô a farfalla e l'ava…
Lûmasson no fâghe a bava,
no lasciâghe, agno, a tägnâ.

A terrassa a l'é a demôa
e o recuveo do baccan,
passatempo pe-a scignôa,
pe-i figgiêu pe-o gatto e o can:
bello vedde o sô spuntâ,
bello vedde a primma stella
chi s'aççende in çê e a parpella
mentre o sô o se caccia in mâ.

A l'é l'öa che in sciä terrassa
a piggiâ o fresco ghe và
a famiggia tûtta in massa…..
i figgiêu o papà a mamà;

[p. 146 modifica]

che se ciarla co-i vexìn
de terrasse che l'é in gïo...
e pupponn-e da marïo
co-i zoenotti fan l'êuggin;

perchè san che pe l'arsella
o se bolla l'ommo in mâ,
che s'o vedde l'axinella
o a vorrieiva pelûccâ...
Zà, l'ingordo, o stende a man,
zà, o goloso, o-a mette in bocca....
- O moae caa, Togno me tocca... -
ma se cincian e ghe stan.

Passa o tempo chi n'é soppo,
son e stelle in deschinâ;
doppo tante ciarle, doppo
tanto rïe, tanto axillâ
e scorrîse e fâ l'amô,
che peccoû finî o cicioezo!
lasciâ tûtto pe andâ a vezo,
pe andâ a nanna, che brûxô!

Bonn-a seja!.... bonn-a seja!...
Se risponde dä lontan:
bonn-a seja!... seja!... seja!...
a doman!... doman!... doman!...

[p. 147 modifica]

Paan voxin vegnûi da-o çê,
ghe pä comme ûn sbatto d'äe....
Sitto! han zà e pupponn-e cäe
a testinn-a in sce l'oëgê... -