Bolle de savon/Che l'inse?

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Che l'inse?
www.liberliber.it 2011
[p. 38 modifica]
Che l'inse?...

Viva Balilla! o zoveno
chêu popolan zeneize
che, son tosto duî secoli,
e giûsto de sto meize,
seccôu de vedde a Zena
çerte facce scassae
o l'ha dito: piggemole,
piggemole a sasciae;

che l'inse?... e o ghe desbrassa
ûn sascio, e o ciappa in pin
ûn tedesco: - pe-a ciassa,
da tutti i caroggin,
da e bûtteghe, da-i fondeghi,
da-i barcoîn, da-e terrasse,
zù, tûtti, addosso!... daeghele...
zù, tûtti, addosso!... strasse,

quello che a-e moen ve capita,
a meizoa cö cannello,
sasci, maghêu, diai, scandole,
o mortâ cö pestello...

[p. 39 modifica]

E doppo? - a cantilena
do Steva pe-a çittae:
«viva ra nostra Zena,
viva ra libertae!»[1]

Perchè, sacciaelo, o popolo
ciù bon quande o s'addescia,
addio vexin!... i austriaci
scappan in quinta e sprescia....
De faeti doppo ûn secolo,
con tûtti i sò Radeschi,
a no ghe dà o viavattene
l'Italia a sti tedeschi?

e dalli, e picca, e arrosa
i emmo desenteghae;
ma... ma gh' é ancon quarcosa
che aspëta a libertae:
se dixe che in politica
bezêugna dêuviâ e pinse:
mi sento intanto o popolo
chi sbraggia ancon: che l'inse?...

1914.

  1. STEVA DE FRANCHI: Ra Libertae vendicâ l'anno 1746 a ri 10 Dexembre.