Bolle de savon/Da San Françesco de Paola

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Da San Françesco de Paola
www.liberliber.it 2011
[p. 35 modifica]
Da San Françesco de Paola

a Antonio Pastore


I.

Ûnn-a gexa, ûn convento, ûn gran ciassâ
con quattro erboetti che no pêuan scricchî,
e ûnn-a paxe da fratti; - o porto, o mâ
(pôso de Zena) lì sotta e depuî.

Mi ghe vegno ogni tanto pe passâ
a gnagnoa, pe no vedde e no sentî,
ëse solo, rescioâme e in sciö mae teâ
tesce o mae verso cö mae poco fî, -

Veddo (o stralabbio?) pe-i sentê de ville,
pe-i viali di giardin, quande l'é l'ôa
che o sô o tramonta e e crêuze son tranquille,

ombre che van e vegnan: - ven sciú allôa
da ûnn-a crêuza (e a conoscio in mëzo a mille)
adaxo, comme stanca, ûnn-a scignôa.

[p. 36 modifica]
II.

Luisa! - e memoje, a grosse onde, ghe van
a franze contra a-o chêu, contra a-o çervello,
e sbatte, a-o sò arrivâ de man in man,
comme ûnn-a veja, intorno ä testa o vello.

Son memoje d'ûn tempo zà lontan,
quando a l'aveiva ûn fùrgao pe cavello,
quando poeti e pittoî, cö baxaman,
metteivan a-i sò pê lira e pennello.

Ûn diva: bocchin d'öu, l'atro: belli êuggi:
lê a se cinciava e a se sciorbiva a lode....
Ah! pulëo maledetto e infami schêuggi.

No ciù canti, festin, cöse da matti:...
ma a sente ancon tûtto l'amê d'ûnn'ode
mentre a ven a pregâ, da-i povei fratti.


[p. 37 modifica]
III.

Quande a mente a rinven, doppo ûn pittin,
dä compascion pe-a «bella Pravexinn-a»
ecco ûnn'atra Ombra, fra i çipressi e i pin,
ne-a paxe scioïa da «villa Giuseppin-a.»

A pensa a-o sò Ideale?... a o sò cammin?...
ä sò casa de stradda Lomellinn-a?...
L'avesse vista o Poeta fiorentin
o te-a pösava drento a ûnn-a tersinn-a.

Mancando nervi, cheû, anima, mente
chi l'ha posciûo zittâ tûtto d'ûn pesso
comme ûnn-a statua michelangiolesca?

Mettei futta co-a vostra aja insolente
figûrinn-e ridicole de gesso
ch'aoa sfrûttae questa figûa dantesca. -