Bolle de savon/Passando da ûn anno all'atro
| ←Primma de piggiâ seûnno | Bolle de savon de Passando da ûn anno all'atro |
Da San Françesco de Paola→ |
| www.liberliber.it 2011 |
O tempo o l'é ûn gran sciûmme sens'onda, sensa voxe;
no se sà dove o nasce ni dove o l'agge a foxe:
o cöre sempre, - sensa pösâse o fa cammin,
e l'ommo o va cö tempo portôu da-o sò destin.
Comme ûnn-a fêuggia o ûn travo, co-a corrente o va in zù,
poi, ven ch'o passa p'êuggio: - no se ne parla ciù:
anchêu o fa a voxe grossa, o detta lezze a-o mondo,
doman, fragile barca, tûtt'assemme o va a fondo;
e tûtti, ûn doppo l'atro, - Cesare o Napolion -
se fa sto capitombolo, e no gh'é remiscion.
Ma però gh'é quarcosa chi sta de lungo a galla;
quella che Dante o ciamma «l'angelica farfalla.»
Fôu, lampo, torcia, lûxe, braxa, sciamma, scintilla,
in çimma a-e aegue storbie continuamente a brilla.
Anchêu a se ciamma Socrate, doman Cristo o Mazzin....
Mêue l'ommo, fêugo fatuo, ma lê a no l'ha mai fin,
lê, forsa onnipotente, lê, spirito chi crëa,
angelica farfalla, sciamma, scintilla - Idëa. -