Bolle de savon/Primma de piggiâ seûnno

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Primma de piggiâ seûnno
www.liberliber.it 2011
[p. 31 modifica]
Primma de piggiâ seûnno
(a Tripoli, vigilia de Natale)

A st'öa a Zena che allegressa!
che invexendo! che sbraggiâ!
Mezanêutte: - chi va a messa,
chi in giandon, chi va a çenâ:
«tante cöse... bonn-e feste!...»
e ûnn-a gran streita de man:
e mi invece, chì in te pèste,...
anchêu vivo.... ma, doman?...

A-o doman mi no ghe penso:
sciô che spunta ven ch'a crêuva....
Veddo a ciassa de San Loenso
co-i banchetti, ciassa nêuva....
sento i cori di zoenotti,
ûn scigoelo, ûnn-a sirena,
ûn toccâ d'amoe e de gotti....
che invexendo a st'öa gh'é a Zena!

Veddo.... cöse?... perchè sento
comme ûn gruppo chì in ta gôa?..
veddo ûn vëgio casamento,
in sciä Chêuloa, dove a st'ôa

[p. 32 modifica]

çerto a mae quattr'osse a pensa
a sò figgio chi é lontan,
e a-o sò crûzio dà da lensa
o pensciëo de l'indoman.

Povia moae! se me sovven
quante frasche quanti baxi!...
tûtte e frasche de tò moen
ti m'hae daeto, tûtti i baxi
da tò bocca.... «Ninn-a ninn-a
- mi te sento ancon cantâ -
ninn-a ninn-a corbellinn-a,
no sta a cianze, fa a nanà.»

Cöse diggo? - son zeneize
e me sento o fêugo addosso;
son chì zà da ciù d'ûn meize,
e no son cheito in to fosso:
balle e bomboe scigoâ in gïo
sento sensa parpellâ,
e nisciûn m'ha ancon scöxïo,
nisciûn m'ha visto scappâ.

O moae câ, quando ritorno
quante cöse vêuggio dïte!
ghe n'ho pe ûnn-a nêutte e ûn giorno
se me riesce vinse a lite....

[p. 33 modifica]

Ma l'Italia che zoenotti,
che sordatti! che mainae!
Ova!... beivine duî gotti...
se veddiemo presto, moae!...