Rime diverse in lingua genovese/Resto d'haveive vista abarlugaou
| ←Dentra fontanna d'unna Garzonetta | Rime diverse in lingua genovese de Resto d'haveive vista abarlugaou |
Quando un fresco, suave, doce vento→ |
| da-e Rime diverse in lingua genovese, Bartoli, Pavia, 1588 cangiòu e u in v e viçeversa; clicca i asterischi pe l'errata corrige |
Cigala, Casero.
Resto d'haveive vista abarlugaou,
De sorte me piaxei, bella garzona.
Me crao che m'hagie* certo afoeituraou
Che ve sei feta dro me co' patrona;
Ri Previ hagiando misso in San Donaou
Un dì nostro Segnò per sorte bona,
Mi vegniva da fà l'oracion,
E voi gh'andavi con vostra amia ancon.
2Fò dra porta de Geza mi ve vi
Per contra ra butega dro fornà:
Chi è quella genti* figgia, dissi mi,
Che a ri me ogi cosi* bella pà,
E un Zove gracioso ch'era li
Lantora me respose ell'è ra tà,
Mi dissi d'aguardara a m'inamora,
Si è ra chin* bella c'hagie visto ancora.
3E fo ro primo giorno che ve vi
E de gianco eri quello dì vestia;
Una sciò bella voi pareivi li,
Dentro una tazza de lete puria:
In testa haveivi un'aconzeura asi,*
Feto con gracia, e con galantaria,
Con quella ancora streito me ligassi,
E tutte i atre à mi poeren scoassi.
4Se mi per sorte in Gexa ve trovava
Che dro Cè fossi un'Angero me creiva,
E si davanti à voi pue me fermava
E tntte* re me cose ve dixeiva:
Po ra man reverente ve baxava,
Voi poei pensà s'ognun se ne rieiva,
E si havereivan dito, O se de crè
Ch'atro che bella figia quella sè.
5Fin a lantora no ve conosceiva
(No ve l'hagiè, Sò dro Pareizo a mà)
Che ra me sorte ancon no ro voreiva
Ma ben v'haveiva spesso odio mentà:
Che vostra Moere ha dri figiò saveiva
Ma no za che a l'havesse figia tà:
E per chiu dogia no saveiva men
Che a Zena se trovasse tanto ben.
6E se ben son passao dre vote assè
Davanti a casa vostra, che ro sò,
Per me desgracia no v'hò visto moè
Perche ra vista gueri bonna no hò,
E me dò grandemente in veritè
De no haveive per sorte vista allò,
Perche me pà ro tempo avei perduo,
Che vei si bella cosa n'ho sapuo.
7Ma de no haveive prima conosciuo
Ro doro* no staghemo a renovà:
Odi* che strannia cosa è intervegnuo
Proprio quando ve vi quella giornà:
No so se à diro mi sarò cretuo,
Po che in mezo dro Cò me fossi iutrà,*
O me pà che zughemo a Correzora
Perche sei quando dentro, e quando fora.
8In mexo dro mè Cò proprio voi stè
Como un'osso intr'un Persego arreixà,
Ma quando aro barcon poscia ve fe
Como favo diascora a scappà?
Tanto che mi no so cosa me crè,
E monto voi me fe maravegià.
Lantora digo: O mi son fo de mi,
O veramrnte* ne sei fora voi.
9E quando me ne vago pò con Dè
Intro cuò torna me ve pà sentì,
Onde me vozo subito inderrè
Perche l'è cosa chi me fa stupi,*
Si ve vego assetà co ro Panè
E in man l'agogia che voi stè à cuxì.
E comenso davei a stravania*
Si no so como vaghe esta bugà.
10Da pò stago pensando se poisse esse
Quarche gran maravegia questa chi,
E mi havesse dro tutto perduo l'esse,
E fosse devegnuo un'atra voi,
E per questa causa me paresse
de sentive comeigo notte, e dì,
Pigio ro spegio, e me ghe aguardo drento,
E si me veggo c'ho ra barba in mento.
11Lantora me ne ven quasi da rie
Perchè sò che de barba voi no havei:
Me vego sozzo dentro speggio asie,
E voi si gracioza, e bella sei:
A no va così ancora, e digo mie
Ro proprio ne vorreiva, pù savei:
E si ghe penso sù, tanto che mi
Trovo in fin che ra cosa va così:
12Trovo che l'è miracoro d'Amò
Pò che de voi son tanto inamoraou,
Chi me fa questo novo e gran favò
Dro quà ghe resterò sempre obrigaou,
O fa che sta comeigo ro me Sò,
E quando dormo, e quando son dessaou,
E ande* pu lonzi quanto vorei voi,
Sei per forza d'Amò sempre con mi.
13Così mi no bezogno d'Impentò
Chi ve veghe, e ne cave ro retreto
Dapò che dri boin Meistri ro megiò
De so man così bello me l'ha feto:
Ro Meistro che mi digo è un gran segnò
E senza pagamento o me l'hà deto,
E ro retreto ha tà proprietè
Che mi solo ro vego sempre moè.
14E tutti i atri se ro voren vei
No ro pon vei se no v'aguardan voi,
E se voi mesma ro voressi vei
Voi no poei manco senza un spegio vui;
De moò che quanto tocca pe ro vei
Goo da voi quarche avantagio mi,
Ma quanto tocca pò pe ro toccà
Voi havei avantagio, e no se po negà.
15Ee* vi dapò da quella vota in zà
Su ra chiazetta de messè Lionardo;
Un di de festa che passei de la
In compagnia de me compà Bernardo:
Ra gracia vostra li me saruà,
Con doce chiera, e con honesto sguardo
Per no esse descorteize a ro saruò,*
Che voi haveivi da mi lantora havuo.
16E da ro Sò ra nuvere* levassi
Per poeime saruà como se dè
Lantora si che voi m'abarlugassi
Dè sà como aconsassi Bernabè:
Quando ra bella chiera voi mostrassi
Ro nobile atto tanto me piaxè,
Che ro gran ben che ve voreiva prima,
Fe quello di ro cormo fin in cima.
17E como d'esse savia voi mostrè
Che ro sei ancora in feti conoscei:
E in voi regna virtù, senno, e bontè,
Quanto posse a ro mondo figia havei:
E ornà de cosi rere qualitè
Che ve pon tutte i atre invidia havei,
Corteze,[sic] bella, virtuosa, e bona
D'Imperio degna, e de Reà corona.
18E si parei Regina dre Reginne
Con ra bella presentia, e maieste,*
E tutte i atre han chiera de zaninne
Si poeren chieustri, e bergore acartè:
Se fossen vive quelle Fior de spinne
Olimpia, Bradamante, e quelle tè,
Ra spozà de Medoro, e i atre belle
Ve porreiva servì per damixelle.
19E si come havei nome Margarita
Ch'una perla significa in vorgà,
Sei quella precioza Margarita
Che tutto l'oro no ra po acatà.
Si sei, e sarei sempre ra me vita
Vaghe ro mondo como o vogie andà,
No digo bella figia atro per aura
Tegnime in gracia de vostra amia Laura.
20E ve baxo con grande reverentia
Ra bella man genti,* e delicà
E ro mesmo aora fà chi de presentia
Prontissimo a servive mè compà
E con questo da voi piggio licentia,
Ra penna alogò* dentr'ò caramà:
M'arrecomando a voi, stevè* con Dè
A piaxei vostro Bernabè Cazè.