Rime diverse in lingua genovese/Quando un fresco, suave, doce vento

Da Wikivivàgna
Sata a-a navegassion Sata a-a serchia
Rime diverse in lingua genovese de Bernabè Çigâ Cazê
Quando un fresco, suave, doce vento
da-e Rime diverse in lingua genovese, Bartoli, Pavia, 1588
cangiòu e u in v e viçeversa; clicca i asterischi pe l'errata corrige
[p. 94 modifica]
DEL MEDESIMO,


Quando un fresco, suave, doce vento
A ra saxon chiù bella a ra megiò
Trepà intre fogie sento
E pà cho spire Amò:
Me ven in mente quella
No Donna zà ma Stella,
Quando ro ventixò ghe sta a trepà
Dentri cavelli e ghe ri fa mescià.

2Quarche vota che sento i Oxeletti,
Como sareiva a dì ri Rosignò
Cantà su i Erboretti
Ri vaghi versi sò:
L'accorto raxonà
E ro gentì parlà
Me ven de quella ingrata dentro cò,
Ch'è atro cha sentì ro Rosignò.

3Quando mi vego quarche prao sciorio
Gianco, giano, incarnato, e Porceletta;
Coverto, e ben vestio
De verde, e frescha herbetta:
In cangio d'alegrame
Chiù sento apassioname
D'una sciò strannia chi no ha proprie fogie
Ma re cangia secondo re so vogie.

[p. 95 modifica]


4Quando mi vego quarche bosco grande
D'Ormori, e de Supressi, Erexi, e Pin,
Con i erbori dre Giande
Re Sorbe, e i Ermorin:
A ro me Cò me pà
De poeiro asomegià,
Che ro me Cò un bosco si s'è feto
Tente re frecchie son che Amò g'ha treto.

5E quando vego quarche egua corrente
Luxi* como un Crestallo netta e chiera,
Che chi ghe pone mente
In fondo ve ra gera,
E dentro si ghe brilla,
Ro Pescio con l'Anghilla:
A ro mormorà so piaxeive, e lento
Che Amò no fà giustitia me lamento.

6Quando ro Mà è grosso, e scorrosaou
Contra ri scogi ri maroxi o batte,
E de longo è alteraou
Fin che con lò o combatte:
Cosi* se l'è astrià
Quella Nerona pà,
E mi ri scogi fermi e pacienti
A ri torti, a i ingiurie, a ri tormenti.

[p. 96 modifica]


7Quando mi penso che ra Tramontanna
E* ghia de chi va pe ra marina;
E sempre ra Dianna
Innanzi di camina:
O me soven lantora
Che in strannia forma ogn'hora,
Una atra stella, ma chiù assè luxente
Ghia como a vo ra me vita dolente.

8Quando ro mondo è scuro e tenebroso
Ero* Cè s'arve, e se [vè] fora insi*
Un lampo luminoso,
Chi i ere fa luxi;*
E ro gran lume so
L'ogio aspeità no po;
Me pà ro lampo chi fa strangosciame
Se a quella Tigre piaxe d'aguardame.
 
9Quando in tempo seren' Eclipse fà
Con maravegia aguarda ognun la sù
Ni ro gran lume zà
Ven como prima chiù;
Cosi* quella crudera
Se a crove ra so chiera
Con un chiumaso, o velo delicaou
A pà ro gran Pianeta ineclipsaou,

[p. 97 modifica]


10Quando si bello, e cosi* vago apà
L'erco Celeste de coroi listaou
Quello coasso pà
Chi m'hà ro Co ligaou,
E se ro Sò compà
De nuvere acercchiaou,
O me pà veira le descavegià
Co ro capello ch'a se sta a sciugà.

11Quando ro Sò ra seira se ne và
E ro giorno con seigo se ne porta,
Nuoete assè presto sà*
E ogni coro* s'amorta;
Se ro me So va in Cà
Como l'è dentra porta,
Tutta ra terra uon* che ra contrà
Un'afforozo Limbo si me pà.

12Quando a ra stè vego ra Lunna in ere
Chi pà ch'a no se move, e fa camin,
E de corò son i ere
D'Azuro oltramarin;
In Cò me ven quell'unna
Chiù bella assè dra Lunna
Se depoi cena a se ne sta assetta*
In Villa aro barcon de caminà.

[p. 98 modifica]


13Quando a ra notte un spegio pà ro Cè
Tutto depento, e recamaou de Stelle,
Me pà de ver derrè
Vei quelle trese belle,
Che ri frexetti sò,
Re scioi, ri pointeiro,*
Stelle devennen dro Sidereo Coro,
Como han tocao quelli cavelli d'Oro.

14E quando veggo po ro Sò levaou
Chi sciuga ra Rozà ch'è sù l'herbetta,
Ro Cè netto, e spassaou
Srnza* unna Nuveretta,
Ra chiera vei me pà
De quella dexirà,
Chi esce de casa inseme con so Moere
E fa luxi* ro Mà, ra Terra, e i Ere.

15In concruxon, quando mi vego, ò sento
Fiume,[sic] Erco, Eclipse, Oxelli, Bosco, Praou,
Sò, Luna, Stelle, Ventò,*
E Lampi, e Mà astriaou,
Ro Polo, e l'Oriente,
Ro Mezzodì, e Ponente
E ogni atra cosa bella in Terra e in Cè,
Me pà che l'hagie dentro i ogi lè.

[p. 99 modifica]


16Ma se veggo lè mesma che me pà:
Cosa è de mi quando ra vego lè,
N'hò chiù che dexirà,
E d'esse me pà in Cè;
Si me sento cangià,
E trasformame in le,
Onde me tocco à vei se mi son mi
O pù quarch'atro chi m'aspete li.
 
17O versi mè, c'[]hò zà bagnaou de chiento
E po co ri sospiri v'ho sciugaou
Quanto martello sento
E s'ho ro Cò infrecchiaou,
Ognun chi ve veria*
Da voi l'intenderà,
Però ve n'anderei davanti a quella
Figia d'ogni atra chiù crudele e bella.

18Se ghe direi. Che se ben n'ho speranza
D'otegnì moè da lè nissun favò,
E in pari soe d'usanza
E mà inchietao l'Amò,
Mi pù l'honoro, e l'amò*
E sempre moè ra bramo:
Che virtuoso, e sento e* ro me fin,
E ro ben che ghe vogio si è dro fin.