Rime diverse in lingua genovese/Deh piggiame Bargaggia per gallante
| ←Se ben de fuò parei guerzo, e straloggio | Rime diverse in lingua genovese de Deh piggiame Bargaggia per gallante |
Dentra fontanna d'unna Garzonetta→ |
| da-e Rime diverse in lingua genovese, Bartoli, Pavia, 1588 cangiòu e u in v e viçeversa; clicca i asterischi pe l'errata corrige queste ottave en stæte eliminæ da-i ediçioin sucescive |
Deh piggiame Bargaggia per gallante
Che megio de Tognin te voggio mie,
E son de lè chiu bello, e bravo fante
Si ho chiu de lò gran Bestiame assie,
E un chiavacuò mi te farò galante
Con trei pezzi da lao chi pendan lie.
Chiu grossi, e belli che no g[']ha Togninna
Si te terrò de tutto ra cha chinna.
Se per Mario ti me piggi mie
Un bello tempo inseme se daremo,
E ro to con ro me voggiando tie,
Inseme tutto quanto meschieremo,
E crescie tanto ro faremo chie
Ch'in pochi meixi noi l'addoggieremo,
Che stago sodo, e tegno à cha ra testa
Ni derrè vaggo à quella brutta, e questa.
Se ti mi* piggi infin bella Fantinna
In man tutto ro mè te voggio mette,
E à cha te porterò ra borsa chinna
E sempre te farò mille fraschette,
E ra tò dotta chi aura è picchieninna
T'accrescierò, si me parrà che tette,
Si te farò portà ra coa assie
Derrè ra roba como s'usa chie.