Rime diverse in lengua zeneise/Resposta a Madonna Peretta Scarpa
| ←Madonna Peretta Scarpa à Messé Poro Foggietta | Rime diverse in lengua zeneise de Resposta a Madonna Peretta Scarpa |
A madonna Peretta Scarpa→ |
| acento grave = vocale curta - acento aguçço = vocale longa clicca o nummero da paggina pe 'n rafronto co-a transcriçion diplomattica |
Madonna Peretinna, zuro a Dé
Che voxe, e chiera d'angeretta havei,
E tanto bella dentro, e de fuo sei
Che in voi ven ro Pareizo i oggi mé.
Però se vei vorei ro ben dro Cé
Voi mesma dentr'un speggio mirá dei
Ch'in voi donna divinna troverei
Tutta ra luxe, e ben dra ca de Dé.
Ni luxe posso azonze a luxe tá
Anzi dre vostre luxe sempre vive
Voi de scuro ben chiero me poei fá.
Persò de veive, hò voggia, e de sentive
Ma perchè hò poira de no deslenguá
Mi rente no m'incallo de vegnive.