Rime diverse in lengua zeneise/Perchè re donne d'haura marié

Da Wikivivàgna
Sata a-a navegassion Sata a-a serchia
Rime diverse in lengua zeneise de Poro Foggetta
Perchè re donne d'haura marié
acento grave = vocale curta - acento aguçço = vocale longa; clicca o nummero da paggina pe 'n rafronto co-a transcriçion diplomattica
za pubricao da-o Zabata inta Nuova selva di varie cose piacevoli do 1570 (Steva Verdin, Tasso genovese, La Berio, 1996)
[p. 14v modifica]

Perchè re donne d'haura marié
L'amó como re figgie vuoeran fá
E a ro barcon stan sempre a chiarlatá
E re chiere han depente, e berlissé,

E veggian con re porte sbarazzé
E lassan montá sù chi voe montá
E zuoegan largo con chi vuoe zugá
E in cangiá sfersi spendan gren diné.

E fin a nonna in giesa ogni di stan

[p. 15r modifica]

E scorrattando van Zena sor(r)ette
E in cà lassan re figgie in guardia a messi

E ri marij vuoeran sottomette
E pe ra chiera a ogn'un dre neghe dan,
Mi no piggio mogié come voressi.