Ra cittara zeneize 1636/Sciù re spalle, Cavallo, ri cavelli

Ra cittara zeneize de Gian Giacomo Cavallo
Do Peo Gioxeppe Giustignan

Zena, Gioxeppe Pavon, 1636
In corscivo e ligatue. Gh'amanca i acenti aguççi.

[p. 156 modifica]DEL SIGNOR
PIER GIUSEPPE
GIUSTINIANO.

Sciù re spalle, Cavallo, ri cavelli
Tutti quenti insuppæ da ro me chiento,
Desligava Gironima à ro vento,
Chì favan chì e lì per tutto annelli.

Pareivan tenti d'Oro Canestrelli
Per da, da merenda à Amo, ch'è un fuento;
Ro Ce sareiva dro sò So contento
Se ri suoe Raggi fuissan comme quelli.

Quando ri veiva anda così zirando,
Se ben gh'era lontan chiù d'unna Picca,
Ghe fava mì assì vento sospirando.

E l'Annima ch'è mæ, ni cura bricca
De sta comeigo, à se n'andà svorando
In quell'Indie de Trezze, a fase ricca.

[p. 157 modifica]
RISPOSTA

Oura ch'in ro cangia barba, e cavelli
Chianzo con canti ro me primmo chiento,
Conoscio cos'è pascese de vento
Chiamando unna Coassa oro d'anelli.

Se quattro fire d'oro in canestrelli;
Son ligaggie da hommo, ò pu da fuento;
Cos'è un longo maprò; breve un contento;
Cose son questi giorni, e cose quelli.

Sciù ri agni primmi, quando andei zirando,
Amo servì mì assì con ra mæ Picca,
Sordatto de fortunna sospirando.

Mà visto, Giustignan, de nò fa bricca,
L'Annima conseggiei à anda svorando
A chiù nobile Amo per fase ricca.